Tumanimizda energiyaning muqobil manbalaridan foydalanish koʻrsatkichi ortmoqda

Mamlakatimizda iqtisodiyot barqaror oʻsishini taʼminlashga va aholining farovonlik darajasini oshirishga, yoqilgʻi-energetika resurslariga boʻlgan talab-ehtiyojni uzluksiz qanoatlantirishga qaratilgan neft-gaz, elektr energetika, koʻmir, kimyo, qurilish sohalarini rivojlantirish borasida keng qamrovli ishlar amalga oshirilmoqda.

Bugungi kunda butun mamlaktimiz boʻylab mavjud yoqilgʻi-energetika resurslaridan oqilona foydalanish maqsadida energiya tejovchi manbalarining joriy qilinishi jarayonlari yanada jadal tus olmoqda. Amudaryo tumanining Olmazor mahallasidagi yangidan qurilayotgan koʻp qavatli uy-joylarning tom qismiga ana shunday energiya tejovchi manbalardan quyosh panellari oʻrnatilmoqda hamda qurilish-montaj ishlari olib borilmoqda.

"Oʻz energo inspektsiya" Qoraqalpogʻiston Respublikasi hududiy boʻlimi tomonidan amalga oshirilayotgan bu kabi ishlar qizgʻin koʻrinish kasb etmoqda. Olmazor mahallasidagi uylarga quyosh panellarini oʻrnatish orqali xonadonlarni elektr energiyasi bilan taʼminlash koʻzlangan. Shu maqsadda koʻp qavatli uylarning tom qismiga 48 dona energiya tejovchi quyosh panellari oʻrnatilmoqda.

Aytish kerakki, bugun iqtisodiyot tarmoqlari va ijtimoiy sohaning energiya samaradorligini oshirish, energiya tejovchi texnologiyalar va qayta tiklanuvchi energiya manbalarini keng joriy etish davlat siyosatining hozirgi bosqichdagi dolzarb yoʻnalishlaridan biri boʻlib qolmoqda.

Oʻzbekiston Respublikasi Prezidentining “Iqtisodiyot tarmoqlari va ijtimoiy sohaning energiya samaradorligini oshirish, energiya tejovchi texnologiyalarni joriy etish va qayta tiklanuvchi energiya manbalarini rivojlantirishning tezkor chora-tadbirlari toʻgʻrisida”gi qarori ijrosini taʼminlash maqsadida tumanda ham tizimli ishlar olib borilmoqda.

Taʼkidlash kerakki, ushbu qarorga muvofiq maʼmuriy binolarda, aholi punktlarida va ishlab chiqarish obʼektlarida energiya samaradorligini oshirish, energiya tejovchi texnologiyalarni keng joriy etish va qayta tiklanuvchi energiya manbalaridan foydalanish boʻyicha kompleks chora-tadbirlar qabul qilinishi belgilangan boʻlib, ushbu qaror asosida qayta tiklanuvchi energiya manbalaridan foydalanish sohasidagi qator imtiyoz va afzalliklar koʻrsatilgan. Xususan, qayta tiklanuvchi energiya manbalarining qurilmalarini ishlab chiqaruvchilar davlat roʻyxatidan oʻtkazilgan sanadan eʼtiboran besh yil muddatga soliqning barcha turlarini toʻlashdan, qayta tiklanuvchi energiya manbalari qurilmalarini oʻrnatganlik uchun ular foydalanishga topshirilgan paytdan eʼtiboran oʻn yil muddatga mol-mulk soligʻini hamda ushbu qurilmalar bilan band boʻlgan uchastkalar boʻyicha yer soligʻini toʻlashdan ozod etilishi koʻrsatilgan.

Shuningdek, ishlab turgan energetika resurslari tarmoqlaridan toʻliq uzib qoʻyilgan yashash uchun moʻljallangan joylarda qayta tiklanuvchi energiya manbalaridan foydalanuvchi shaxslar qayta tiklanuvchi energiya manbalaridan foydalanilgan oydan eʼtiboran uch yil muddatga yer soligʻini toʻlashdan ozod etiladi.

Qayd etish kerakki, tumanimizdagi Bolalar suv sport saroyi binosi yoniga quyosh energiyasidan foydalangan holda suv isitgich radiatori oʻrnatilgan boʻlib, suv sport saroyidagi suvni isitishda foydanib kelinmoqda. Endilikda ham shu kabi quyosh batareyalarini aholi xonadonlariga oʻrnatish ishlarini yanada kengaytirish rejalashtirilmoqda.

Quyosh orqali isitishning asosiy afzalligi quyoshdan oladigan energiyaning bepul ekanligidir. Quyoshli issiq suv isitgichi kamdan-kam hollarda elektr yoki gaz tizimini almashtirishga qodir, ammo issiq suv tizimiga quyosh isitish panellari qoʻshilsa, suvni isitish uchun xarajatlarni ikki baravar kamaytirishi mumkin. Xuddi shunday, issiqlik uchun quyosh energiyasi ham anʼanaviy pechlarni toʻldirishi va qish oylarida xarajatlarni kamaytirishi mumkin, bu esa eng sovuq ob-havo uchun yoqilgʻini tejashga imkon beradi.

"Oʻz Energo inspektsiya" Qoraqalpogʻiston Respublikasi hududiy boʻlimi xodimlari energiya tejovchi manbalarning, jumladan, quyosh batareyalari, quyosh panellaridan foydalanishning afzalliklarini yurtdoshlarimizga yanada kengroq tushuntirishmoqda. Shu maqsadda aholi va tadbirkorlik subektlariga tushuntirish targʻibot ishlarini jadal surʼatlarda olib bormoqdalar.

Charos Arslonova, tuman hokimligining Axborot xizmati rahbari.