QUROL MUOMALASI SOHASIDAGI TARTIB-QOIDALARNI BILASIZMI?

Oʻzbekiston Respublikasi Vazirlar Mahkamasining 2020-yil 26-dekabr kungi 810-son “Qurol muomalasi sohasida ruxsat berish tartib-taomillarini takomillashtirishga doir qoʻshimcha chora-tadbirlar toʻgʻrisida”gi Qaroriga koʻra, yuridik va jismoniy shaxslardagi mavjud pnevmatik qurollar 2021-yil 27-iyun kuniga qadar Ichki ishlar organlarida roʻyxatga qoʻyilishi, agar belgilangan muddat oʻtganidan keyin roʻyxatga qoʻyilmagan, ruxsatnoma olinmagan pnevmatik qurol aniqlangan taqdirda Oʻzbekiston Respublikasi Jinoyat Kodeksining tegishli moddasi bilan javobgarlikka tortilishi belgilab qoʻyilgan. Shuningdek, mazkur Qarorga muvofiq ogʻiz qismidagi quvvati 7,5 jouldan kam va qalibri 4,5 millimetrgacha boʻlgan pnevmatik quroli va ogʻiz qismidagi quvvat 3 jouldan kam boʻlgan pnevmatik sport quroli hamda koʻrsatib oʻtilgan qurol turlarining oʻq-dorilari muomalasi sohasidagi  harakatlar va faoliyati vakolatli organlarning ruxsatnomalarisiz amalga oshirilishini, tigʻli, sovuq ov va signal beruvchi qurolni olish, realizatsiya qilish, saqlash, olib yurish va tashish vakolatli organlarning ruxsatnomalarimiz, ovchilik jamoat birlashmasi tomonidan berilgan ovchilik guvohnomasi asosida amalga oshiriladi.

Bundan tashqari, yuqoridagi toifaga kiruvchi pnevmatik qurolning oʻq-dorilarini olish, realizatsiya qilish, saqlash, olib yurish va tashish vakolatli organlar tomonidan berilgan maxsus ruxsatnoma va ovchilar jamoat birlashmasi tomonidan berilgan ovchilik guvohnomasi asosida amalga oshiriladi.

Tumanimizda yuqoridagi Qaror talablaridan kelib chiqib, aholi oʻrtasida pnevmatik va ov quroli uchun moʻljallangan oʻq dorilari muomalasini tartibga solish hamda mavjud qonun-qoidalarga amal qilish boʻyicha doimiy ravishda tushuntirish ishlari olib borilayotganligi sababli jismoniy shaxslarga qurol muomalasiga doir ruxsatnomalar ularning arizalariga muvofiq oʻz vaqtida rasmiylashtirilib borilmoqda. Olib borilgan tushuntirish-targʻibot tadbirlari natijasida jismoniy shaxslar qoʻlida saqlovda boʻlgan va tegishli ruxsatnomalari boʻlmagan pnevmatik quroli va ov quroli, shuningdek, oʻtkir tigʻli qurollar fuqarolar tomonidan ixtiyoriy ravishda tuman Ichki ishlar boʻlimiga olib kelib topshirilmoqda.

Xususan, Bosuv mahallasida istiqomat qiluvchi 1987-yilda tugʻilgan fuqaro Sardor Karimov ishdan kelayotib mahalla hududidagi “Qoraoʻzak metangaz” masʼuliyati cheklangan jamiyati yaqinidan qora yelim xaltaga oʻralgan oʻqotar qurol topib olib, uni zudlik bilan tuman Ichki ishlar boʻlimiga olib kelib topshirdi. Natijada loqayd bir odam ehtiyotsizligi tufayli tushirib qoldirgan ushbu oʻqotar quroli yosh bolalarning qoʻliga tushib qolishining, shu bilan birga jiddiy xavf-xatarning oldi olindi.

Oʻqotar quroli – u qaysi turda boʻlishidan qatʼiy nazar, oʻz nomi bilan sovuq qurol, undan foydalanish qoidalarini bilmagan odam uchun ham, atrofdagilar uchun ham xavfli.

Shunday ekan, qadrli yurtdoshlar! Jismoniy shaxslarning qurol muomalasiga doir ruxsatnoma berish toʻgʻrisidagi arizasi koʻrib chiqilganligi, ruxsatnomaning amal qilish muddati uzaytirilganligi, ruxsatnoma qayta rasmiylashtirilganligi va uning dublikati berilganligi uchun yigʻim undirilishi qatʼiy nazoratga olinadi va qaysi turdagi qurol egasi boʻlishidan qatʼiy nazar, jismoniy shaxslar mavjud qonun-qoidalarga amal qilishga majbur. Bundan koʻzlangan maqsad jamiyat osoyishtaligini, xalqimiz va har bir fuqaroning tinch-xotirjam hamda sogʻ-salomat yashashini taʼminlashdir.

Robiya YOʻLDOShEVA.