SUVNI BEHUDA ISROF QILMAYLIK!
Har qatra suv – hayot kabi aziz va qadrlidir. Suvsiz hayot kechirishning aslo imkoni yoʻq.
Sayyoramizda ekologik muvozanatni saqlovchi suvning hayotiy zarurat ekanligi barchamizga maʼlumdir. Suv borasidagi isrof haddan oshganligi oqibatida yuz berayotgan muammolarni bugun barchamiz koʻrib-bilib, his etib turibmiz. Obi hayot muammosi Birlashgan Millatlar Tashkiloti darajasida 1972-yildan buyon muhokama qilinib kelinadi.
“Qoraqalpoq suv taʼminoti” MChJ tuman filialida 67 nafardan ortiq ishchi xodimlar tun-u kun oʻz xizmat vazifalarini fidokorona bajarib, aholiga ichimlik suvini yetkazib bermoqdalar. Yozning ayni issiq, jazirama kunlarida ichimlik suvi isteʼmoli sezilarli darajada oshib ketmoqda. Aholi tomonidan ichimlik suvidan ekinlarni sugʻorish hollari koʻp kuzatilmoqda. Bu esa boshqa hududlarda ichimlik suvi yetkazib berishning samarali tashkil etilishiga oʻzining salbiy taʼsirini oʻtkazmoqda.
Ichimlik suvidan ekinlarni sugʻorish hamda boshqa maishiy maqsadlarda foydalanish tufayli tuman hududida joylashgan koʻp qavatli uy-joylarning yuqori qavatlariga va markaziy tarmoqdan suv oluvchi chekka hududlardagi aholiga suv yetib bormasligi qator ijtimoiy muammolarga, suvning taqsimlanishi va taʼminotining sezilarli darajada izdan chiqishiga sabab boʻlmoqda.
Shu sababli noqonuniy foydalanuvchi, isrofgarchilikka yoʻl qoʻyib kelayotgan isteʼmolchilarga nisbatan tegishli tartibda choralar koʻrilmoqda.
Joriy 2021-yilning oʻtgan 5 oyi davomida 20 dan ortiq ulgurji korxonalar va aholi orasida ichimlik suvidan noqonuniy foydalanish holatlari aniqlandi. Birgina oʻtgan davrni, xususan, qish, bahor va yoz mavsumlarini tahlil qilganimizda qish mavsumiga oʻrtacha bir oyga 70 ming m3 ichimlik suvi ishlatilgan boʻlsa, bahorga kelib, 120 ming.m3 atrofida, yozning issiq kunlarida 200 ming m3 atrofida ichimlik suv sarflangan. Bu asosan bahor va yoz oylarida suvdan noqonuniy foydalanish holatlari koʻpayganidan dalolatdir.
Xalqimiz uchun qulaylik yaratish maqsadida 2021-yilda 18,9 km. uzunlikdagi ichimlik suvi tarmogʻi yangidan yotqizilib, 6 ta suv inshooti yangidan qurilmoqda. Lekin shu oʻrinda yana bir narsani aytish lozimki, ichimlik suvidan, mavjud jihozlardan oqilona foydalanish, xalq, jamiyat mulkini asrab-avaylash oʻrniga ayrim fuqarolar tomonidan suv quduqlari qopqoqlarini oʻgʻirlash, sindirib tashlash, katta-katta yuk mashinalarining bu jihozlarga talofat yetkazish holatlari juda koʻp uchramoqda.
Qanchadan-qancha, milliardlab soʻm mablagʻ sarflanib, ne-ne mashaqqatlar orqali yetkazib berilayotgan ichimlik suvini asrab-avaylash barchamizning insoniy burchimizdir. Isteʼmol qilingan suv toʻlovlarini oʻz vaqtida amalga oshirsak, har bir tomchisidan oqilona foydalanish orqali tejamkorlikka hissa qoʻshsak, ayni muddao boʻlar edi.
A.RAJAPOV,
“Qoraqalpoq suv taʼminoti” MChJ Amudaryo tumani filiali boshligʻi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
