"MAShAQQATLARDA TOBLANGAN UMR" KITOBINING TAQDIMOTI BOʻLIB OʻTDI
Kitob – beminnat ustoz. Bilim va maʼnaviy yuksalishga erishishning eng asosiy manbai hisoblanadi. Insonning bilimli, tarbiyali, kasb-hunarli va albatta baxtli va davlatli boʻlishining muhim omil – bu kitobga doʻst boʻlish, hamisha kitob oʻqish va kitob mutolaasini umr boʻyi kanda qilmaslikdir. Ayniqsa, yoshlarning baxtu kamoli, osoyishta va farovon hayotida kitobning alohida oʻrni bor. Chunki, yaxshi kitob insonda Vatanga muhabbat, umummilliy va umuminsoniy qadriyatlarga hurmat tuygʻularini yuksaltirib, yaxshilik hamda ezgulikka undaydi.
Joriy yilning 14-iyun kuni amudaryolik tadbirkor, mehnat faxriysi Tursunboy Ahmedovning mashaqqatli umr yoʻllari haqida hikoya qiluvchi “Mashaqqatlarda toblangan umr” kitobining taqdimot marosimi boʻlib oʻtdi. Jurnalist Oygul Rajabova qalamiga mansub ushbu kitob Tursunboy Ahmedovning bosib oʻtgan yoʻllari, yoshlarimizga oʻrnak boʻluvchi ibratli hikoyalardan tashkil topgan.
Tadbirda tuman mahalla va oilani qoʻllab-quvvatlash boʻlimidan Bekman Allaberganov, mahalla faollaridan Oʻrinboy Berdibayev, Norboy Ibodullayev, Sherimbat Bekimbatov, Ataxon Quralov, Sapargul Xoʻjamuratova, tadbirkor Sobir Erimbetov, fermer Ozod Tajimuratov, Beruniy mahalla fuqarolar yigʻini raisi Ozod Kamolov, shu mahalla xotin-qizlar masalalari boʻyicha oʻrinbosari Mahfuza Ibrahimovalar ishtirok etishdi.
Kitob – qalb chirogʻi, tafakkur qanoti. Ayniqsa, bosma kitobdan taralayotgan oʻziga xos yoqimli hidni tuyib, varaqlash asnosida moʻjizaviy sahifalarning sirli shitirlashidan koʻngil cheksiz zavqqa toʻladi. Bunday kitoblarni mutolaa qilish va uning mazmuni haqida boshqa kitobxonlar bilan fikrlashishning huzur halovati tamoman oʻzgachadir.
Taqdimot kechasini Bekman ota Allaberganov ochib berdi. Taqdimot davomida Xalq deputatlari tuman Kengashiga Beruniy mahallasidan saylangan deputat Nilufar Davletova, tadbirkorning shogirdi Ozod Tajimuratovlar soʻzga chiqib, Tursunboy akaning faoliyati, qilgan mehnatlari haqida batafsil toʻxtalib oʻtdilar. Soʻzga chiqqanlar Tursunboy Ahmedovning ish faoliyati davomida hattoki, qoʻl ostidagi haydovchilar, ishchilar bilan rahbar emas, balki doʻstlardek muomalada boʻlganliklarini, hodimlarining hayotlaridagi muammolariga hech qachon befarq qaramasliklarini, namunali ishchi-xodimlarni ragʻbatlantirib borishni va boshqa insoniy xislatlarini alohida taʼkidlab oʻtdi.
Chindan ham, hayotining salkam yarim asrida rahbarlik lavozimlarida ishlab, mashaqqatlarda toblangan, "Qoraqalpogʻistonda xizmat koʻrsatgan kommunal, maishiy xizmat va savdo xodimi" unvoni, "Oʻzbekiston Respublikasi mustaqilligiga 25" yil koʻkrak nishoni sohibi, 36-yildan ortiq vaqtdan beri "Mangʻit" masʼuliyati cheklangan jamiyatiga raislik qilib kelayotgan Tursunboy aka Ahmedovning hayot yoʻli koʻpchilik uchun ibrat maktabidir.
Muhtaram Prezidentimiz taʼkidlab oʻtganidek, bugungi murakkab va tahlikali zamonda yozuvchining bashariyatning ertangi kunini oʻylab, odamlarni ezgulikka, insof-diyonat, mehr-oqibat va bagʻrikenglikka daʼvat etishga qaratilgan haroratli soʻzi har qachongidan ham muhim ahamiyat kasb etmoqda. Shunday ekan, ijodkorning har bir asari kitobxonlar uchun maʼnaviyat ummonining bir chashmasi sifatida qadrlidir. Jurnalist Oygul Rajabova ham zamonamiz qahramonlaridan biri haqida hikoya qiluvchi “Mashaqqatlarda toblangan umr” kitobi bilan ana shu ummonning yanada mavjli boʻlishiga hissa qoʻshdi.
Tadbir nihoyasida yigʻilganlarga “Mashaqqatlarda toblangan umr” kitobi sovgʻa qilindi.
Sevara ISMOILOVA
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
