Amudaryo tumanida gʻalla oʻrim-yigʻimi mavsumi boshlandi
Tumanimizda 2021 yil hosili uchun ekilgan boshoqli don ekinini nes-nobud qilmasdan qisqa muddatlarda yigʻib olish ishlari boshlab yuborildi. Xususan, 7-iyun kuni Oʻrta qalʼa ovulidagi "Qadamboy Poʻlat" fermer xoʻjaligida gʻalla oʻrim-yigʻimining boshlanishi munosabati bilan koʻrgazmali seminar oʻtkazildi.
Unda Qoraqalpogʻiston Respublikasi Qishloq xoʻjaligi vaziri Alisher Yakubov, tuman hokimi Sultonboy Yoʻldashev, soha mutasaddilari, MMTP raislari va fermer xoʻjaliklari rahbarlari ishtirok etdilar. Seminarda mutasaddilar tumanda boshoqli don mahsulotlari, xususan, gʻalla ekish borasida olib borilayotgan ishlar xususida toʻxtaldilar.
Qayd etilganidek, oʻtgan yilgi ekish mavsumida tuman boʻyicha 324 ta fermer xoʻjaliklarining 3800 gektar maydoniga gʻalla ekilgan boʻlib, amudaryolik gʻallakorlar joriy yilda 9 500 tonnadan ortiq "qirmizi don" hosilini davlat omborlariga topshirishni reja qilishgan. Shundan 25 ta fermer xoʻjaliklari tasarrufidagi 316,8 gektar maydondan 950 tonna urugʻlik don yetishtirish rejalashtirilgan.
Tumanda 2021-yil hosili uchun ekilgan boshoqli don ekinlarini qisqa muddatlarda oʻrib-yigʻib olish boʻyicha tuman shtabi tashkil etilgan. Bu borada ishlab chiqilgan chora-tadbirlar dasturiga koʻra yetishtirilgan boshoqli don hosilini 16-iyundan 5-iyulgacha oʻrib-yigʻib olish grafiklar tuzildi.
Oʻrim-yigʻim ishlarini uyushqoqlik bilan oʻtkazish boʻyicha 18 ta oʻrim-yigʻim otryadlariga jami 109 nafar maʼsullar, 18 ta kombaynlar biriktirilgan hamda ular soz holatga keltirilib, mavsum davomida tinimsiz ishlashini taʼminlash maqsadida ehtiyot qismlar zahiralari yaratilgan. Ushbu otryadlarga zarur texnika va mexanizmlardan 54 ta yuk avtomabillari, 36 ta transport tirkamalar, 18 ta koʻchma taʼmirlash ustaxonalari, 18 ta yoqilgʻi tashish agregatlari jalb etilgan.
Maʼlumot tariqasida keltirilishicha, tumanda joriy yilgi gʻalla oʻrim-yigʻimi, gʻallani tashish, somondan tozalash va gʻalladan boʻshagan maydonlarda peshma-pesh shudgorlash ishlarini tashkil qilish uchun jami 1 mlrd 601 mln soʻmlik pul mablagʻlari zarur boʻladi. Ushbu tadbirlar mutasaddi idoralar tomonidan tegishli tartibda moliyalashtirilgan.
Seminarda oziq-ovqat xavfsizligini taʼminlash maqsadida joriy yil hosili uchun ekilgan gʻalla ekinidan boʻshaydigan maydonlarning 1997 gektariga takroriy ekinlar ekish borasida ham keng tushinchalar berildi. Xususan, 258 gektar yerga sabzavot, 35 gektar yerga kartoshka, 337 gektar yerga dukkakli ekinlar, 900 gektar yerga sholi, 373 gektar yerga moyli ekinlar, 94 gektar yerga ozuqa ekinlar ekish rejalashtirilganligi qayd etildi.
Shu kuni tumanda ilk bora "Qadamboy Poʻlat" fermer xoʻjaligida joriy yilgi gʻalla oʻrim-yigʻimi ishlariga kirishildi. Ishonamizki, amudaryolik gʻallakorlar bu yil ham har yilgi anʼanalarga sodiq qolgan holda gʻalla topshirish boʻyicha majburiyatlarini ortigʻi bilan ado qiladilar va xalqimiz dasturxonining toʻkin-sochinligiga munosib hissa qoʻshadilar.
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
