Saylov jarayoniga munosib tayyorgarlik koʻrilmoqda

Joriy yilda davlatimiz va xalqimiz hayotida muhim siyosiy voqea – Oʻzbekiston Respublikasi Prezidenti saylovi boʻlib oʻtadi. Saylov jarayoni koʻp bosqichli tashkiliy tayyorgarlikni talab qilganligi bois ushbu jarayonni qonuniylik, adolatlilik, xolislik printsiplari asosida tashkil etish va oʻtkazishda saylov komissiyalari zimmasiga katta masʼuliyat yuklanadi.

Mamlakatimizda mazkur siyosiy jarayonga munosib tayyorgarlik koʻrish maqsadida keng qamrovli chora-tadbirlar amalga oshirilmoqda. Shu xususdan butun yurtimiz boʻylab boshlangan saylov komissiyalari aʼzolari va saylov jarayonining boshqa ishtirokchilarining malaka va koʻnikmasini oshirishga qaratilgan seminar-treninglar tumanimizda ham izchil davom etmoqda. Ana shunday oʻquv mashgʻulotlari 7-iyun sanasida tumanimizdagi 82-sonli umumtaʼlim maktabida boʻlib oʻtdi. Qayd etish kerakki, joriy yil 7-18-iyun kunlari davomida Amudaryo tumanida uchastka saylov komissiyalari aʼzoligiga nomzodlarning malakasini oshirish boʻyicha tashkil etiladigan seminar-treninglarni oʻtkazish yuzasidan barcha tashkiliy ishlar olib borilmoqda. Uchastka saylov komissiyasi raisi, rais oʻrinbosari va kotibi lavozimiga nomzodlar 11 ta guruhga boʻlingan xolda seminar-treninglarda ishtirok etmoqdalar. Jami 191 nafar uchastka saylov komissiyasi aʼzoligiga nomzodlar uchun har bir guruh 16 akademik soat, yaʼni toʻliq 2 kunlik mashgʻulotlar tumandagi mazkur 82-sonli maktabda oʻtkazilishi belgilangan.

Tumanimizda tashkil etilayotgan oʻquv-mashgʻulotlarini tuman adliya boʻlimi bosh maslahatchisi Jamshid Bekimbetov, tuman prokurori oʻrinbosari Raxman Sankibayev, Huquqbuzarliklar profilaktikasi boshqarmasi voyaga yetmaganlarga ijtimoiy-huquqiy yordam koʻrsatish markazi boshligʻi Rustem Baltaniyazov, Qoraqalpoq davlat universiteti katta oʻqituvchisi Gulnaz Berdimuratovalar murabbiy sifatida olib bormoqdalar.

Seminar-treninglarni oʻtkazishdan asosiy maqsad – saylov jarayonining asosiy tashkilotchilari boʻlgan saylov komissiyasi raisi va aʼzoligiga nomzodlar  malakasini oshirish, ularga uslubiy koʻmaklashish va saylov qonunchiligi va jarayoni boʻyicha bilim hamda koʻnikmalarini oshirishga qaratilgan. Shu maqsadda boshlanayotgan mashgʻulotlarda sektorlar rahbarlari hamda ommaviy axborot vositalari vakillari ham ishtirok etdilar.

Mazkur oʻquvlar tuman markazida joylashgan namunaviy saylov uchastkalarida interaktiv usullarda tashkil etilmoqda hamda ishtirokchilar olgan bilimlarni amaliy jihatdan mustahkamlashlari uchun barcha imkoniyatlar yaratilmoqda.

Shu bilan birga aholining keng qatlami va mutaxassislar foydalanishlari mumkin boʻlgan “Saylov – 2021” mobil ilovasini yaratish ustida samarali ishlar olib borilib, mazkur ilovada ham maʼruza matnlari, taqdimotlar, infografikalar, tegishli qonunchilik hujjatlari, bilimni mustahkamlashga oid topshiriqlar, videoroliklar kabi oʻquv materiallar joylashtirilmoqda. Ushbu maʼlumotlar onlayn rejimda yangilanib boriladi hamda ilovaning ishga tushirilishi saylov jarayoni ishtirokchilari boʻlgan barcha aholi qatlamlarining saylovga oid bilimlarini mustahkamlashga koʻmaklashadi.

Seminarda saylov okruglari va uchastkalarini tuzish, okrug va uchastka saylov komissiyalari tarkibini shakllantirish va ularning ishini tashkil etish mexanizmlariga alohida eʼtibor qaratilmoqda hamda oʻquv jarayonlari monitoring qilinib,  tinglovchilarning bilimi muntazam baholab borilmoqda.

Charos Arslonova, tuman hokimligining Axborot xizmati rahbari.