Сайлов жараёнига муносиб тайёргарлик кўрилмоқда
Жорий йилда давлатимиз ва халқимиз ҳаётида муҳим сиёсий воқеа – Ўзбекистон Республикаси Президенти сайлови бўлиб ўтади. Сайлов жараёни кўп босқичли ташкилий тайёргарликни талаб қилганлиги боис ушбу жараённи қонунийлик, адолатлилик, холислик принциплари асосида ташкил этиш ва ўтказишда сайлов комиссиялари зиммасига катта масъулият юкланади.
Мамлакатимизда мазкур сиёсий жараёнга муносиб тайёргарлик кўриш мақсадида кенг қамровли чора-тадбирлар амалга оширилмоқда. Шу хусусдан бутун юртимиз бўйлаб бошланган сайлов комиссиялари аъзолари ва сайлов жараёнининг бошқа иштирокчиларининг малака ва кўникмасини оширишга қаратилган семинар-тренинглар туманимизда ҳам изчил давом этмоқда. Ана шундай ўқув машғулотлари 7-июнь санасида туманимиздаги 82-сонли умумтаълим мактабида бўлиб ўтди. Қайд этиш керакки, жорий йил 7-18 июнь кунлари давомида Амударё туманида участка сайлов комиссиялари аъзолигига номзодларнинг малакасини ошириш бўйича ташкил этиладиган семинар-тренингларни ўтказиш юзасидан барча ташкилий ишлар олиб борилмоқда. Участка сайлов комиссияси раиси, раис ўринбосари ва котиби лавозимига номзодлар 11 та гуруҳга бўлинган холда семинар-тренингларда иштирок этмоқдалар. Жами 191 нафар участка сайлов комиссияси аъзолигига номзодлар учун ҳар бир гуруҳ 16 академик соат, яъни тўлиқ 2 кунлик машғулотлар тумандаги мазкур 82-сонли мактабда ўтказилиши белгиланган.
Туманимизда ташкил этилаётган ўқув-машғулотларини туман адлия бўлими бош маслаҳатчиси Жамшид Бекимбетов, туман прокурори ўринбосари Рахман Санкибаев, Ҳуқуқбузарликлар профилактикаси бошқармаси вояга етмаганларга ижтимоий-ҳуқуқий ёрдам кўрсатиш маркази бошлиғи Рустем Балтаниязов, Қорақалпоқ давлат университети катта ўқитувчиси Гулназ Бердимуратовалар мураббий сифатида олиб бормоқдалар.
Семинар-тренингларни ўтказишдан асосий мақсад – сайлов жараёнининг асосий ташкилотчилари бўлган сайлов комиссияси раиси ва аъзолигига номзодлар малакасини ошириш, уларга услубий кўмаклашиш ва сайлов қонунчилиги ва жараёни бўйича билим ҳамда кўникмаларини оширишга қаратилган. Шу мақсадда бошланаётган машғулотларда секторлар раҳбарлари ҳамда оммавий ахборот воситалари вакиллари ҳам иштирок этдилар.
Мазкур ўқувлар туман марказида жойлашган намунавий сайлов участкаларида интерактив усулларда ташкил этилмоқда ҳамда иштирокчилар олган билимларни амалий жиҳатдан мустаҳкамлашлари учун барча имкониятлар яратилмоқда.
Шу билан бирга аҳолининг кенг қатлами ва мутахассислар фойдаланишлари мумкин бўлган “Сайлов – 2021” мобил иловасини яратиш устида самарали ишлар олиб борилиб, мазкур иловада ҳам маъруза матнлари, тақдимотлар, инфографикалар, тегишли қонунчилик ҳужжатлари, билимни мустаҳкамлашга оид топшириқлар, видеороликлар каби ўқув материаллар жойлаштирилмоқда. Ушбу маълумотлар онлайн режимда янгиланиб борилади ҳамда илованинг ишга туширилиши сайлов жараёни иштирокчилари бўлган барча аҳоли қатламларининг сайловга оид билимларини мустаҳкамлашга кўмаклашади.
Семинарда сайлов округлари ва участкаларини тузиш, округ ва участка сайлов комиссиялари таркибини шакллантириш ва уларнинг ишини ташкил этиш механизмларига алоҳида эътибор қаратилмоқда ҳамда ўқув жараёнлари мониторинг қилиниб, тингловчиларнинг билими мунтазам баҳолаб борилмоқда.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
