TAʼQIQLANGAN HUDUDLARDA ChOʻMILMANG!

Toʻrtta fasl oʻz jozibasi va goʻzalligini namoyon etadigan yurtimiz tabiati har bir insonga huzur-halovat bagʻishlaydi. Ayniqsa, yoz faslining issiq tafti, maftunkor manzaralari insonni soya-salqin, bahavo joylarga chorlaydi. Bunda huzurbaxsh, yoz quyoshi singgan suvda choʻmilish inson vujudiga huzur bagʻishlaydi.

Biroq choʻmilish insonga qanchalik huzur bagʻishlamasin, suvda choʻmilish, suzishni bilishdan tashqari, suvning sanitariya-gigiyena  qoidalariga mos kelish-kelmasligini aniqlash va ana shundan keyingina choʻmilish  zarur. Belgilanmagan joylarda, xususan, anhorlar, tezoqar katta va chuqur kanallar, daryolarda, zax suvlarda choʻmilish aslo mumkin emas. Ana shunday joylarda “suvda choʻkish men va mening yaqinlarim bilan sodir boʻlmaydi”, qabilidagi befarqlik, beparvolik tufayli har yili dunyo boʻylab 300 ming nafarga yaqin insonlar, koʻpincha yosh bolalar, bevaqt hayotdan koʻz yumishmoqda.

Suvda choʻkish bilan bogʻliq oʻlim holatlarining qariyb 90-95 foizi ota-onalar tomonidan nazoratsiz qoldirilgan yosh bolalar hissasiga toʻgʻri keladi. Bunday baxtsiz hodisalar koʻpincha kattalarning spirtli ichimlik ichib, belgilanmagan hududlarda, oʻzboshimchalik bilan taʼqiqlangan joylarda choʻmilishi oqibatida ham sodir boʻlayotgani juda achinarli.

Tumanimizda ham yoz mavsumi kelishi bilan koʻpincha oqar suv havzalari, anhor va katta kanallar choʻmiluvchilar bilan gavjum boʻladi. Shu bois, yoz mavsumi kelishi bilan kattalar va yosh bolalar choʻmilishi mumkin boʻlmagan suv havzalarida tuman Sanitariya epidemiologiya osoyishtalik markazi va Jamoat salomatligi boʻlimi, tuman Favqulodda vaziyatlar boshqarmasi mutaxassislari hamkorligida nazorat tadbirlari oʻtkazilib, aholi va yosh bolalarning taʼqiqlangan hududlarda choʻmilishining oldi olinmoqda.

Qoraqalpogʻiston Respublikasi Vazirlar Kengashining 2021-yil 26-may kungi “2021-yil choʻmilish mavsumi mobaynida koʻl, daryo va kanallar akvatoriyalarida yasama havzalar hamda choʻmilish taʼqiqlangan hududlarda odamlarning hayoti va sogʻligini muhofaza qilish boʻyicha chora-tadbirlar” rejasining ijrosini taʼminlash maqsadida Amudaryo tumani hokimlining maxsus chora-tadbirlar rejasi ishlab chiqildi va ishchi guruh tuzilib, faoliyati yoʻlga qoʻyildi. 2021-yil 26-may kunidan boshlab har kuni ishchi guruh aʼzolari bilan tuman hududidan oʻtuvchi Amudaryoning choʻmilish taʼqiqlangan hududlarida reydlar tashkil qilinib, fuqarolarning belgilanmagan joylarda choʻmilishlarining oldini olish boʻyicha tushuntirish ishlari olib borilmoqda. Aholi gavjum joylarga, qoʻl, daryo va kanallar boʻylariga “Belgilanmagan joylarda choʻmilish hayot uchun xavfli” mazmunida bannerlar oʻrnatilib, ommaviy axborot vositalari orqali aholiga zarur tushunchalar berilib borilmoqda.

Yoz mavsumining ilk kunlaridanoq tumanimiz hududidan oqib oʻtuvchi yirik suv havzalari – Qilichboy arna, Mangʻit arna, Qipchoq arna, Bosuv kanallari hamda Toshyop katta arigʻi va yirik zaxkashlarda tez-tez nazorat tadbirlari amalga oshirilmoqda.

Xususan, yosh bolalarni aslo nazoratsiz qoldirmaslik, ularning tez oquvchi va boʻylama chuqurligi oʻta chuqur boʻlgan katta kanallarda, ayniqsa, daryoda choʻmilishlariga yoʻl qoʻymaslik, maboda, bolalar orasida suvga choʻkish, koʻp miqdorda suv yutish holatlari yuz bergan taqdirda birinchi yordam koʻrsatish boʻyicha maslahat va tavsiyalar berilib, choʻmilishda nimalarga eʼtibor berish zarurligi boʻyicha bukletlar tarqalildi.

Robiya YOʻLDOShEVA.