BIR QULTUM OQ OGʻUNING OQIBATLARI
Mastlik – ixtiyoriy telbalik, deyishadi. Haqiqatan ham shisha ichiga sigʻgan oq ogʻuni isteʼmol qilgan inson juda qisqa fursat ichida osongina shayton izmiga kiradi-qoʻyadi. Shisha ichidagi bir qultum ogʻu har qanday baquvvat, ongli odamni telbaga aylantiradi. Agar shunday boʻlmaganida tumanimiz mahallalaridan birida yashovchi Bahrom Arslonov (ism-sharifi oʻzgartirildi) mast holatda avtomobil boshqarmagan, oʻzining va yana bir necha shaxslarning sogʻligiga, oilalari iqtisodiga zarar yetkazmagan boʻlardi.
Doʻstining toʻyida qaynotasining nomida boʻlgan avtomobilni tegishli hujjatlarsiz, mast holatda boshqarib, “gulyanka”ga chiqqan Bahromboy spirtli ichimlik taʼsirida boshqaruvni yoʻqotib, qarama-qarshi yoʻnalishda, yoʻl harakati qoidalariga muvofiq harakatlanib ketayotgan boshqa bir avtomashina bilan toʻqnashib ketgan. Natijada ikkinchi avtomashinada boʻlgan ikki nafar fuqaroning biri salomatligi uchun xavfli boʻlgan ogʻir, ikkinchisi yengil tan jarohatlari bilan shifoxonaga yotqizilgan. Yana bir shaxs – fuqaroviy daʼvogar, Bahrom Arslonovning qaynotasi esa avtohalokat tufayli kattagina miqdorda moddiy zarar koʻrgan.
Amudaryo IIB maʼmuriy binosida boʻlib oʻtgan jinoiy ishlar boʻyicha tuman sudining sayyor sud majlisida Bahrom Arslonov qarshisiga toʻplangan mazkur jinoiy ishi jabrlanuvchilar hamda fuqaroviy daʼvogar shaxslar ishtirokida atroflicha muhokama etildi.
Sudda Bahrom Arslonov qarshisiga toʻplangan barcha hujjatlar, sud-tibbiy ekspertiza xulosalari, tomonlarning koʻrgan moddiy va maʼnaviy zararlari gumonlanuvchi B.Arslonov tomonidan toʻliq qoplab berilganligi boʻyicha oʻz daʼvolaridan voz kechganlari haqidagi arizalari batafsil oʻrganildi va ushbu ish boʻyicha yarashtiruv instituti qoʻllanilib, Oʻzbekiston Respublikasi Jinoyat Kodeksi hamda Jinoyat protsessual Kodeksining tegishli moddalariga koʻra, ayblilik haqidagi masalasi hal qilinmasdan harakatdan toʻxtatildi.
Boʻlib oʻtgan sayyor sud majlisida tomonlar biri-birini kechirib, yarashdilar. Lekin aynan ana shu yarashuv daqiqalarigacha jabrlanuvchilar. fuqaroviy daʼvogarlar jismonan va ruhan azoblandilar. B.Arslonovning qaltis harakati, mast holda, zarur hujjatlarsiz avtomobil boshqargani oqibatida uning oila aʼzolari to sud yarashtiruv institutini qoʻllagunga qadar aziyat chekishdi. Oʻz ixtiyori bilan spirtli ichimlik ichib, ixtiyoriy ravishda telbalarcha harakat qilgan Bahromboy esa nafaqat qaynotasi va oila aʼzolari, balki jamiyat oldida ham uyalib qoldi.
S.DAVLETMURATOV, Jinoyat ishlari boʻyicha Amudaryo tuman sudi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
