17 TURDAGI XUJJATLARNI TALAB QILISh BEKOR QILINIShIDAN XABARDORMISIZ?

Aholiga davlat xizmatlari koʻrsatish tizimini isloh qilish, ishbilarmonlik muhitini tubdan yaxshilash, ortiqcha byurokratik toʻsiqlarni bartaraf etish borasida izchil chora-tadbirlar amalga oshirilib, Davlat organlari, mahalliy ijro etuvchi hokimiyat organlari va boshqa davlat tashkilotlarida eskirgan byurokratik tartibotlar, shu jumladan elektron tizim orqali olish imkoniyati mavjud boʻlgan maʼlumotlarni qogʻoz koʻrinishida soʻrab olish, ish faoliyatini tashkil etish uchun muhim boʻlmagan hujjatlarni talab qilish natijasida aholi va tadbirkorlik subʼektlarini ovora qilish amaliyotini, davlat xizmatlarini koʻrsatishda byurokratizm, sansalorlik va boshqa maʼmuriy toʻsiqlarni bartaraf etish, eskirgan, zamon talablariga mos kelmaydigan tartib-taomillarni tubdan qisqartirish maqsadida Oʻzbekiston Respublikasi Prezidentining 2021-yil 23-martdagi “Aholi va tadbirkorlik subektlariga davlat xizmatlaridan foydalanishda yanada qulay sharoitlar, bu borada byurokratik toʻsiqlarni qisqartirish boʻyicha qoʻshimcha chora-tadbirlar toʻgʻrisida”gi Farmoni qabul qilindi.

Farmonga muvofiq 2021-yil 1-iyundan boshlab davlat organlari, xoʻjalik birlashmalari, mahalliy ijro etuvchi hokimiyat organlari, davlat tashkilotlari va muassasalari tomonidan aholidan, shu jumladan tadbirkorlik subʼektlaridan quyidagi xujjatlarni talab qilish bekor qilinadi;

• Ruhiy kasalliklar boʻyicha dispanser hisobida turishi yoki turmasligi;
• Narkologiya boʻyicha dispanser hisobida turishi yoki turmasligi;
• Sudlanganlik;
• Manzil-maʼlumot axboroti;
• Fuqaroning nomida shaxsiy uy-joy mavjud yoki mavjud emasligi;
• Turar joyning maydoni;
• Soliq qarzi mavjud yoki mavjud emasligi;
• Soliq toʻlovchi jismoniy shaxslarning davlat soliq xizmati organlarida hisobga qoʻyilganligi;
• Pensiya va nafaqa miqdori;
• Pensiya va nafaqa oluvchilar roʻyxatida mavjud yoki mavjud emasligi;
• Nikoh qayd etilganligi, nikohda turmasligi yoki nikohdan ajralganligi;
• Shaxsni tasdiqlovchi hujjatning nusxasi;
• Shaxsning belgilangan shakldagi fotosurati;
• Tibbiy-ijtimoiy ekspert komissiyalarining maʼlumotnomalari;
• Mehnat daftarchalari va ularning nusxalari (fuqarolarga pensiya tayinlash jarayonida ushbu hujjatni «Yagona milliy mehnat tizimi» idoralararo dasturiy-apparat kompleksi orqali olish imkoniyati mavjud boʻlmagan hollarda soʻrash bundan mustasno);
• Ish haqi va ish stajini, oliy va oʻrta maxsus taʼlim muassasasida oʻqiganlikni tasdiqlovchi arxiv maʼlumotnomalari (fuqarolarga pensiya tayinlash jarayonida ushbu hujjatni «Yagona milliy mehnat tizimi» idoralararo dasturiy-apparat kompleksi orqali olish imkoniyati mavjud boʻlmagan hollarda soʻrash bundan mustasno);
• Kadastr hujjatlari va ularning nusxalari.

Talab qilinish bekor qilingan xujjatlarni davlat organlari va tashkilotlari jismoniy shaxslarga davlat xizmatlarini koʻrsatishda, ishga qabul qilish jarayonida va boshqa maʼmuriy tartib-taomillarni amalga oshirishda masʼul davlat organlari va tashkilotlaridan mustaqil ravishda, shu jumladan «Elektron hukumat» tizimi idoralararo integratsiyalashuv platformasi orqali soʻrab oladi.

Yuqorida keltirilgan hujjat yoki maʼlumotlarning davlat organlari va tashkilotlari tomonidan aholidan talab qilinishi davlat xizmatlari koʻrsatish sohasidagi qonunchilik hujjatlari talablarini buzish deb hisoblanadi.

Shuningdek mazkur Farmonga muvofiq joriy yil 1-iyunidan boshlab Davlat xizmatlari Agentligi yuridik shaxslarni (nodavlat notijorat tashkilotlari, banklar va kredit byurolaridan tashqari) davlat roʻyxatidan oʻtkazish boʻyicha yagona vakolatli organ hisoblanadi.

Davlat organlari va tashkilotlari, yuridik shaxslar birlashmalari, bogʻdorchilik-uzumchilik shirkatlari, matlubot, ishlab chiqarish va qishloq xoʻjaligi kooperativlari hamda advokatlik tuzilmalarini davlat roʻyxatidan oʻtkazish davlat xizmatlari markazlari tomonidan amalga oshiriladi.

Bu kabi tartib-tamoyillarning joriy qilinishi aholi va tadbirkorlik subektlari uchun qulay muhit yaratadi.

Mansur Sadikov, tuman Davlat xizmatlari markazi direktori