YaGONA INTERAKTIV DAVLAT XIZMATLARI PORTALI HAQIDA BILASIZMI?

Tobora ommalashib borayotgan my.gov.uz — Yagona interaktiv davlat xizmatlari portali foydalanuvchilarning interaktiv davlat xizmatlari toʻgʻrisidagi maʼlumotlardan erkin foydalanishini, shuningdek, elektron shaklda davlat xizmatlari koʻrsatishni taʼminlovchi internet tarmogʻidagi Oʻzbekiston Respublikasining hukumat portalidagi maʼlumot-axborot portalidir. U hukumat tomonidan tashkil etilgan va hukumat nazorati ostidagi dasturdir.

Yagona portal foydalanuvchilar tomonidan interaktiv davlat xizmatlaridan, shu jumladan, pulli asosda erkin foydalanish maqsadida tashkil etilgan.

Portaldan toʻlaqonli foydalanish hamda davlat organlariga murojaat qilish uchun eng avvalo siz portalda roʻyxatdan oʻtgan boʻlishingiz kerak. Buning uchun portaldagi login orqali, ID.uz – Yagona identifikatsiya tizimidan roʻyxatdan oʻtgan boʻlishingiz zarur. Shu bilan birga, bugungi kunda elektron raqamli imzo va UzCard yordamida ham portaldan roʻyxatdan oʻtish mumkin.

“Jismoniy va yuridik shaxslarning murojaatlari toʻgʻrisida”gi Qonunga binoan, jismoniy shaxsning familiyasi (ismi, otasining ismi), uning yashash joyi toʻgʻrisidagi maʼlumotlar yoki yuridik shaxsning toʻliq nomi, uning joylashgan yeri (pochta manzili) toʻgʻrisidagi maʼlumotlar koʻrsatilmagan yoxud ular haqida yolgʻon maʼlumotlar koʻrsatilgan, shuningdek, imzo (elektron raqamli imzo) bilan tasdiqlanmagan murojaatlar anonim murojaatlar deb hisoblanadi. Shuning uchun ham davlat portalidan foydalanishda bir qator rasmiyatchilikni bajarish talab qilinadi.

ID.uzdagi raqamingiz bilan portaldan roʻyxatdan oʻtganingizdan soʻng, shaxsiy maʼlumotlaringiz aks etgan darcha paydo boʻladi. Siz ushbu maʼlumotlarni tasdiqlab yoki tahrir qilib, “ruxsat berish”tugmasini bosasiz.

“Mening arizalarim” boʻlimida Siz yuborgan arizalar roʻyxati, ularning holati va ularga berilgan javob xatlari bilan tanishishingiz mumkin.

Mansur TOJIBOYeV, tuman Davlat xizmatlari markazi boʻlim boshligʻi.