Aholi bandligini taʼminlash – jamiyat iqtisodiy farovonligining asosidir

Koronavirus pandemiyasi tufayli dunyo miqyosida iqtisodiy oʻsish surʼatlari pasayayotgan hozirgi davrda aholining ijtimoiy himoyaga muhtoj qatlamini himoya qilish, yangi ish oʻrinlarini yaratish orqali ularning bandligini va maʼlum  daromad manbaiga ega boʻlishlarini taʼminlash muhim ustuvor ahamiyat kasb etmoqda. Oʻzbekiston Respublikasi Bandlik va mehnat munosabatlari vazirligi maʼlumotlariga koʻra, koronavirus pandemiyasi davrida mamlakatimizda ishsizlar soni 1,35 milliondan 2 milliongacha koʻpaygan. Tumanimizda ham qoʻshni 2020-yilning mart oyidan 2021-yilning shu davrigacha chet davlatlari hududlariga ishlash uchun chiqib ketaolmagan shaxslar va tumanimizda “Temir daftar”, “Ayollar daftari”, “Yoshlar daftari” roʻyxatiga kiritilgan fuqarolar tuman Aholi bandiligiga koʻmaklashish markazi tomonidan alohida tizimga olinib, ularning bandligini taʼminlash choralari koʻrildi.

Joriy yilning yanvar-aprel oylarida 556 nafar doimiy ishsiz, kam taʼminlangan va “Temur daftar”, “Ayollar daftari”, “Yoshlar daftari” roʻyxatlariga kiritilgan fuqarolar bandligini taʼminlash maqsadida jamoat ishlariga jalb qilindi. Jamoat ishlariga jalb qilinganlarning 260 nafari yoshlar, 277 nafari esa ayollardir. Ayni kunlarda 258 nafar fuqarolar shahar va aholi punktlarini, mahalla guzarlarini obodonlashtirish, koʻklamzorlashtirish, turli xil chiqindilardan tozalash, madaniy-maishiy obʼektlar, ziyoratgohlar, qabristonlar hamda  koʻcha ariqlarini tozalash ishlarida ishtirok etishmoqda. 191 nafar kam taʼminlangan, ijtimoiy himoyaga muhtoj fuqaro esa sanoat tarmoqlari va xizmat koʻrsatish sohasi tashkilotlarida faoliyat yuritishlari uchun sharoit yaratildi.

Shuningdek, “Chorva nasl” agentligiga 16 nafar fuqaro hamda tumandagi 43 ta ovul va mahalla fuqarolar yigʻinlariga 43 nafar yoshlar jamoat tartibini saqlash boʻyicha inspektor yordamchilari sifatidagi jamoat ishlariga jalb qilindi.

Joriy yilning aprel oyida 376 nafar ishsix va yuqoridagi uchta daftar roʻyxatiga kiritilgan fuqarolarni jamoat ishlariga jalb qilish choralari koʻrildi. Unga koʻra, 10 nafar fuqaro “Mang’it invest plyus” masʼuliyati cheklangan jamiyatining issiqxona tarmogʻiga ishchi sifatida, 10 nafar fuqaro “Furruh-Bunyodbek” masʼuliyati cheklangan jamiyatiga tikuvchi, 8 nafar fuqaro esa “Dilbaroy-Zarnigor” xususiy korxonasiga yordamchi ishchi sifatida ishga joylashtirildi.

Mangʻit shahrining Chordara mahallasi hududida obodonlashtirish ishlarini olib borish maqsadida 5 nafar fuqaroning bandligi taʼminlanib, ularning barchasi ayni paytda mahalla hududini koʻkalamzor va obod goʻshaga aylantirish maqsadida amalga oshirilayotgan obodonlashtirish tadbirlarida faol ishtirok etishmoqda.

Tuman Aholi bandligiga koʻmaklashish markazida ishsizlik maqomini olgan va ish qidiruvchi sifatida roʻyxatda turgan shaxslarni kasbga tayyorlash, ularning malakasini, oshirish va qayta tayyorlash borasida ham tizimli ishlar amalga oshirilmoqda. Xususan ishsizlik boʻyicha nafaqalar va qonun hujjatlariga muvofiq ishsizlarga moddiy yordam berish, aholini ish bilan taʼminlashga doir muammolarni oʻz vaqtida, qonuniy hal etish maqsadida korxona, idora va tashkilotlar hamda yirik tadbirkorlik subʼektlaridagi vakant ish oʻrinlarini aniqlash, boʻsh ish oʻrinlari yarmarkalarini oʻtkazishda shaffoflikka rioya etish yuzasidan samarali ishlar amalga oshirilmoqda.

Koʻrilayotgan barcha chora-tadbirlar fuqarolarning bandligini taʼminlash orqali ularning oilalarida, qolaversa, jamiyatda iqtisodiy barqarorlikka erishishdir.

Farhod ORAZBOYeV, tuman Aholi bandligiga koʻmaklashish markazi direktori.