Аҳоли бандлигини таъминлаш – жамият иқтисодий фаровонлигининг асосидир

Коронавирус пандемияси туфайли дунё миқёсида иқтисодий ўсиш суръатлари пасаяётган ҳозирги даврда аҳолининг ижтимоий ҳимояга муҳтож қатламини ҳимоя қилиш, янги иш ўринларини яратиш орқали уларнинг бандлигини ва маълум  даромад манбаига эга бўлишларини таъминлаш муҳим устувор аҳамият касб этмоқда. Ўзбекистон Республикаси Бандлик ва меҳнат муносабатлари вазирлиги маълумотларига кўра, коронавирус пандемияси даврида мамлакатимизда ишсизлар сони 1,35 миллиондан 2 миллионгача кўпайган. Туманимизда ҳам қўшни 2020 йилнинг март ойидан 2021 йилнинг шу давригача чет давлатлари ҳудудларига ишлаш учун чиқиб кетаолмаган шахслар ва туманимизда “Темир дафтар”, “Аёллар дафтари”, “Ёшлар дафтари” рўйхатига киритилган фуқаролар туман Аҳоли бандилигига кўмаклашиш маркази томонидан алоҳида тизимга олиниб, уларнинг бандлигини таъминлаш чоралари кўрилди.

Жорий йилнинг январь-апрель ойларида 556 нафар доимий ишсиз, кам таъминланган ва “Темур дафтар”, “Аёллар дафтари”, “Ёшлар дафтари” рўйхатларига киритилган фуқаролар бандлигини таъминлаш мақсадида жамоат ишларига жалб қилинди. Жамоат ишларига жалб қилинганларнинг 260 нафари ёшлар, 277 нафари эса аёллардир. Айни кунларда 258 нафар фуқаролар шаҳар ва аҳоли пунктларини, маҳалла гузарларини ободонлаштириш, кўкламзорлаштириш, турли хил чиқиндилардан тозалаш, маданий-маиший объектлар, зиёратгоҳлар, қабристонлар ҳамда  кўча ариқларини тозалаш ишларида иштирок этишмоқда. 191 нафар кам таъминланган, ижтимоий ҳимояга муҳтож фуқаро эса саноат тармоқлари ва хизмат кўрсатиш соҳаси ташкилотларида фаолият юритишлари учун шароит яратилди.

Шунингдек, “Чорва насл” агентлигига 16 нафар фуқаро ҳамда тумандаги 43 та овул ва маҳалла фуқаролар йиғинларига 43 нафар ёшлар жамоат тартибини сақлаш бўйича инспектор ёрдамчилари сифатидаги жамоат ишларига жалб қилинди.

Жорий йилнинг апрель ойида 376 нафар ишсих ва юқоридаги учта дафтар рўйхатига киритилган фуқароларни жамоат ишларига жалб қилиш чоралари кўрилди. Унга кўра, 10 нафар фуқаро “Mang’it invest plyus” масъулияти чекланган жамиятининг иссиқхона тармоғига ишчи сифатида, 10 нафар фуқаро “Фурруҳ-Бунёдбек” масъулияти чекланган жамиятига тикувчи, 8 нафар фуқаро эса “Дилбарой-Зарнигор” хусусий корхонасига ёрдамчи ишчи сифатида ишга жойлаштирилди.

Манғит шаҳрининг Чордара маҳалласи ҳудудида ободонлаштириш ишларини олиб бориш мақсадида 5 нафар фуқаронинг бандлиги таъминланиб, уларнинг барчаси айни пайтда маҳалла ҳудудини кўкаламзор ва обод гўшага айлантириш мақсадида амалга оширилаётган ободонлаштириш тадбирларида фаол иштирок этишмоқда.

Туман Аҳоли бандлигига кўмаклашиш марказида ишсизлик мақомини олган ва иш қидирувчи сифатида рўйхатда турган шахсларни касбга тайёрлаш, уларнинг малакасини, ошириш ва қайта тайёрлаш борасида ҳам тизимли ишлар амалга оширилмоқда. Хусусан ишсизлик бўйича нафақалар ва қонун ҳужжатларига мувофиқ ишсизларга моддий ёрдам бериш, аҳолини иш билан таъминлашга доир муаммоларни ўз вақтида, қонуний ҳал этиш мақсадида корхона, идора ва ташкилотлар ҳамда йирик тадбиркорлик субъектларидаги вакант иш ўринларини аниқлаш, бўш иш ўринлари ярмаркаларини ўтказишда шаффофликка риоя этиш юзасидан самарали ишлар амалга оширилмоқда.

Кўрилаётган барча чора-тадбирлар фуқароларнинг бандлигини таъминлаш орқали уларнинг оилаларида, қолаверса, жамиятда иқтисодий барқарорликка эришишдир.

Фарҳод ОРАЗБОЕВ, туман Аҳоли бандлигига кўмаклашиш маркази директори.