Iftixor tuygʻusi

Har kuni ertalab maktabga kirar ekanman, yoqimli bir hid tuyaman. Bu hidni xushboʻy, muattar soʻzlari bilan sifatlab koʻrdim, oʻxshamadi. Kitob-daftarlar, oʻquv jihozlarining hididir balki bu. Lekin har qanday attorning qimmatbaho atridan afzal va hech qachon hech kimning meʼdasiga tegmaydigan bu hidga oʻzimcha nom berdim: "Ziyoning hidi!”

Talabalik yillarimizda amaliyotda ekanmiz, bizga murabbiylik qilgan ustoz tez-tez taʼkidlab turardi: "Maktab – muqaddas dargoh. Unga poklanmasdan kirishga hech kimning haqqi yoʻq”. Avvallari men bu taʼkidni oʻqituvchini shaxsiy gigiyenaga qatʼiy amal qilishga undashi deb tushunardim.

Yillar oʻtib, ozmi-koʻpmi tajriba orttirib angladim-ki, har kuni ertalab ishga sidqidildan tayyorlanib borish har bir muallimga oddiy emas, muqaddas dargohga yoʻl olayotganligini, yodiga solib turarkan.

Mana shunday ziyo maskanlaridan biri – Amir Temur nomli ovuldagi 62-sonli maktab oʻqituvchilari 2013-2014 oʻquv yilida ishni xush-xabar bilan boshlashdi: sobiq oʻquvchimiz – Botir Ollomboyev tibbiyot institutining talabasi boʻldi. Botir maktabda oʻz bilimi va namunali xulqi bilan oʻqituvchilar mehrini qozongan edi. Tibbiyot sohasiga boʻlgan qiziqishi sababli u Nukus tibbiyot kollejida oʻqishni davom ettirdi, oʻrta maxsus maʼlumot bilan kifoyalanib qolishni xohlamadi. Chuqur tayyorgarlik koʻrib, Toshkent pediatriya tibbiyot institutining Nukus filiali, davolash ishi fakultetiga hujjat topshirdi va talabalik baxtiga muyassar boʻldi.

2014-yilning 8-yanvar kuni kechqurun telefonim jiringladi va biroz hayajonli, lekin shiddatli ovoz eshitildi:

"Ustoz, men bugun Nukus shahar kasb-hunar kollejlari, 2-bosqich oʻquvchilari orasida ona tili va adabiyoti fanidan oʻtkazilgan fanlar olimpiadasida ishtirok etib, 1-oʻrinni oldim. Endi Respublika bosqichida ishtirok etaman. Bilasizmi, suhbat jarayonida Muhammad Yusufning sheʼrini ifodali yod aytib bergandim, hakam: "Muhammad Yusuf tirilib kelgandek boʻldi”, - dedi”.

Muhammad Yusufni "tiriltirgan” yosh adabiyotchi – bizning sobiq oʻquvchimiz – Nukus pedagogika kolleji 2-bosqich oʻquvchisi Muhabbat Davlatova edi. U 2014-yil 26-27-mart kunlari Qoraqalpogʻiston Respublikasi akademik litsey, kasb-hunar kollejlari 2-bosqich oʻquvchilari orasida ona tili va adabiyoti fanidan boʻlib oʻtgan fanlar olimpiadasining Respublika bosqichida 78 ball bilan 3-oʻrinni egalladi.

Maktabimizning biologiya fani oʻqituvchisi Atayev Zokirjon ish faoliyatini boshlaganiga hali koʻp muddat boʻlmasdan, oʻzining pedagogik mahoratini namoyon qila oldi. 9-sinf oʻquvchisi Sohiba Davlatova uning yordamida biologiya fanini alohida ishtiyoq bilan oʻrgana boshladi. Natijada, joriy oʻquv yilida biologiya fanidan fanlar olimpiadasining maktab bosqichida 1-oʻrinni, hudud va tuman bosqichlarida 1-oʻrinni, Respublika bosqichida esa 82,6 ball bilan 3-oʻrinni egalladi.

Shuningdek, Zokirjon Atayev tayyorlagan 7-sinf oʻquvchisi Eldor Rahimov "Bilimlar bellashuvi” maktab bosqichida biologiya fanidan 1-oʻrinni, hudud bosqichida ikkinchi, tuman bosqichida 78 ball bilan 3-oʻrinni egalladi.

Faxrli ustozlardan biri – Gulbahor Erimbetova frantsuz tili – dunyodagi eng goʻzal tillardan biri ekanligiga maktabimiz oʻquvchilarini ishontirib ulgurgan. Uning saboqlarida bu tilning mayin talaffuziga mahliyo boʻlgan oʻquvchilardan biri Sanjar Davlatov uni mukammal oʻrganishga bel bogʻladi. Har yili "Bilimlar bellashuvi”da frantsuz tili fanidan 1- va 2-oʻrinlarni boy bermay kelmoqda va joriy yilda fanlar olimpiadasi tuman bosqichida 78 ball bilan 2-oʻrinni egalladi. Sanjar frantsuz tili bilan bir qatorda, ingliz tilini ham oʻrganmoqda. U kelajakda tarjimon boʻlmoqchi.

Shuningdek, Gulbahor opa tayyorlagan maktabimizning 7-sinf oʻquvchisi Salomatxon Yoʻldosheva frantsuz tili fanidan "Bilimlar bellashuvi” tuman bosqichida 3-oʻrinni egalladi. Salomatxon barcha fanlarni mukammal oʻzlashtirmoqda. U kelajakda zamon talabiga javob bera oladigan, bir-necha til biladigan iqtisodchi boʻlishni orzu qiladi.

Maktab hovlisida salom bergan oʻquvchi qiz - Shahlo bilan suhbatlashish istagi paydo boʻldi:

- Shahlo, ulgʻaygach, kim boʻlmoqchisan? – deb soʻrayman.

- Rus tili muallimasi boʻlmoqchiman, ustoz!

Qizaloqning javoblaridan moʻʼjazgina maktabimizda ulkan orzular yoʻlida intilayotgan yana bir navqiron yoshni kashf qilgandek boʻldim. Uning orzulariga erishishida maktabimiz pedagogika jamoasining masʼuliyati yana bir karra oshganligini his qildim.

Mohira RAHIMOVA,

62-sonli maktabning oʻquv ishlari boʻyicha direktor oʻrinbosari.