Jayxun ilhomlari

Toʻrtliklar

Sendan uzoqlashdim dilbar, ushbu dam,

Juda yiroq ketdim xomush, dilda gʻam.

Olisladim, desam, Yo, Rab, oldinda,

Ketib bormoqdasan mendan-da ildam.

* * *

Hijronlar qalbimni oʻrtaydi tokay,

Mayli, dil daftarin manguga yopay.

Yozmoqqa kuch topdim ushbu soʻzlarni,

Seni unutmoqqa qaydan kuch topay!

* * *

Ayriliq tunlari naqadar uzun,

Hijronli dillarga bergaysan toʻzim.

Dilimda borini toʻkib soldim, lek,

Aytolmay turibman “alvido” soʻzin.

* * *

Magʻrursan, dunyoni bepisand koʻrding,

Jabr koʻrmading hech, besitam yurding.

Himmatliman, deysan, biroq yoʻlimga,

Ne uchun uqubat uylarin qurding?

* * *

Har ishni mehr bilan boshlash kerak,

Qadding tik, dadil qadam tashlash kerak.

Tugamaydi dunyoning hech tashvishlari,

Bu hayotda havas bilan yashash kerak.

* * *

Noligan, dunyodan nolib oʻtadi,

Sabrli, gʻamlardan gʻolib oʻtadi.

Boriga shukrona qilmasang agar,

Bu hayot berganin olib oʻtadi.

Oʻrozali REYIMOV.

Seni kutdim intizor

Bahor keldi bogʻlarimizga,

Qir-u adir, togʻlarimizga.

Kutgan edik uni intizor,

Joylab, qalb sozlarimizga.

 

Endi boʻlar Xudo xohlasa,

Har kunimiz toʻy-u tomosha.

Chunki keldi yurtimga Navroʻz,

Qancha oʻlka, dala, qir osha.

 

Bayramlarga boy erur Bahor!

Yangilanish, yasharish fasli.

Barchadan koʻp boʻlib intizor,

Seni kutgan mendirman, asli!

Gulmirza SOLAYeV,

2-sonli maktab oʻqituvchisi.

Goʻzal fasl

O, Bahor! Naqadar goʻzal faslsan,

Olamga yangidan baxsh etguvchi jon.

Fasllar ichida oʻzing aslsan,

Seni kutaverar jumlai jahon.

 

Togʻlar, adirlarni bezaysan gulga,

Samoda varraklar uchadi chunon.

Betimsol oshyonsan xushxon bulbulga,

Senga yetdik shukur, el-u yurt omon.

 

O, Bahor! bayramlar fasli oʻzingsan,

Sumalak qaynaydi doshqozonlarda.

Momolarim aytgan eng ezgu soʻzdan,

Nurlanar koʻngillar tong – azonlarda.

Tursunoy OʻROZBOYeVA,

8-MTT tarbiyachisi.

Xush kelding, bahor

Bahor kelgach sepini yoyib,

Dala-dashtda qizib ketdi ish.

Chumoli-yu boychechaklar ham,

Yer yuzida berdi koʻrinish.

 

Togʻlarda ham oʻsibdi lola,

Suvlar oqar boʻlib shalola.

Bu fasldan quvonchga toʻlar,

Keksa-yu yosh, hattoki bola.

 

Choʻpon bobo tayogʻin olib,

Qir-adirga qoʻylarin haydar.

Sumalaklar pishirsa yoshlar,

Onaxonlar bosh-u qosh boʻlar.

 

Dehqon bobo yarogʻin olib,

Dalasiga yoʻl olar bu kun.

Jannatlarga qiyos elimning,

Dasturxonin qilay deb toʻkin.

 

Temir tulporini mohir boshqarib,

Traktorchi yigit dalaga chiqdi.

Qorongʻi tushguncha dalani haydab,

Ekinlar ekishga tayyorlab qoʻydi.

 

Yangi yil atalgan Navroʻzi olam,

Xush kelding elimga, safo kelibsan.

Sendan umidim koʻp, koʻpdir orzular,

Oʻsha umidlarim ushalsin endi.

 

Yurtim omon boʻlsin, doʻstlar shod boʻlsin,

Elim dasturxoni neʼmatga toʻlsin.

Har inson yetishsin, albat, murodga,

Barkamol avlodlar dono, sogʻ boʻlsin.

 

Oʻqisin, oʻrgansin, kamolga kelib,

Yurtim rivojiga hissasin qoʻshsin.

Ota-onalari bundan shod boʻlib,

Qoʻllarini tilak, duoga ochsin.

Gulchehra OTABOYeVA.

Koʻklam

 

Sen bilan Navroʻz,

Kelar rizq-u roʻz.

Sumalak qaynab,

Bulbullar sayrab.

 

Gullar ochilar,

Har yon sochilar,

Varraklar uchar,

Samoni quchar.

 

Quvnab bolalar,

Terar lolalar.

Koʻklamdan darak –

Yashillik demak.

Shahinoy ShOMURODOVA,

40-sonli maktab oʻquvchisi.

Vatanga taʼzim

Ona yurtim, Vatanim,

Chiroyingga ming taʼzim.

Bagʻring misli jannatim,

Gul-bogʻingga ming taʼzim!

 

Quchogʻingda topgan baxt,

Yuzdan-da ortiq millat.

Xalqingdir ahil, inoq,

Oʻgʻlonlaring azamat.

 

Gullagan bogʻ, togʻingga,

Dasht-u vodiy, choʻlingga.

Taʼzim bilan yashayman,

Mehr berib elimga.

Oltinoy JUMABOYeVA,

36-sonli maktab oʻquvchisi.

Goʻzal fasl

O, Bahor! Naqadar goʻzal faslsan,

Olamga yangidan baxsh etguvchi jon.

Fasllar ichida oʻzing aslsan,

Seni kutaverar jumlai jahon.

 

Togʻlar, adirlarni bezaysan gulga,

Samoda varraklar uchadi chunon.

Betimsol oshyonsan xushxon bulbulga,

Senga yetdik shukur, el-u yurt omon.

 

O, Bahor! bayramlar fasli oʻzingsan,

Sumalak qaynaydi doshqozonlarda.

Momolarim aytgan eng ezgu soʻzdan,

Nurlanar koʻngillar tong – azonlarda.

Tursunoy OʻROZBOYeVA,

8-MTT tarbiyachisi.

Umr

Umr oʻtar, toʻxtamaydi hech,

Oqar suvday oqar erta-kech.

Yoshlik davri oʻtib ketadi,

Vaqt kutib turmas uni hech.

 

Kunlar oʻtar, tunlar ham oʻtar,

Qush qanotin qoqqaniday tez.

Baxtli, gʻamli damlaring oʻtar,

Tun ortidan kelganday kunduz.

 

Bu umr koʻp jumboqli umr,

Har kim izlar jumboq yechimin.

Gar umrida xatolar boʻlsa,

Izlayverar uning yechimin.

 

Yillar oʻtar, oylar ham oʻtar,

Yoshlik bizni ketadi tashlab,

Vaqt yoʻqotgan, baxtin yoʻqotar,

Afsus chekar koʻzini yoshlab.

Jazira BAZARBAYeVA,

3-sonli maktab oʻquvchisi.

Mehribonim

ayajon

Ayajonim yonimda

Boʻling har qachon.

Yonimda boʻlsangiz,

Quvnayman shodon.

Meni erkalab quchgan,

Mehribonim ayajon!

 

Tarixni koʻp bilgansiz,

Menga aytib bergansiz.

Koʻp nasihat qilgansiz,

Doim omon yuringiz,

Ulgʻaytirdingiz meni,

Mehribonim ayajon!

 

Siz boʻlsangiz men,

Xursand va shodman.

Koʻzim quvnaydi.

Dilim yayraydi,

Mehribonim ayajon,

Doim boʻling siz omon.

Nafisa HAMROYeVA,

46-sonli maktab

oʻquvchisi.

Chuchmoma koʻz ochdi

Bahor keldi.

Uygʻonmoqda zamin-u zamon.

Yerlar koʻm-koʻk,

Qushlar bilan toʻldi-ku osmon.

 

Uyqudagi chuchmoma ham,

Koʻz ochdi asta.

Daraxtlarga gul-kapalak,

Boʻldi payvasta.

 

Chor atrofda xush-xandonlik,

Nurli tuygʻular.

Har bir dilda kelajakka,

Ishonch tugʻilar.

 

Bulbul qoʻndi gul shoxiga,

Yuragi xasta.

Andalibim, kel,senga men,

Boʻlay vobasta.

Shirin Oʻrozimbetova, 6-sonli maktab oʻqituvchisi.

Vatanim

Vatan, sen dunyoda men uchun aziz,

Doimo sevib men ardoqlagayman.

Vatan, sen oʻzing jon-u dilimsan,

Oʻlsam ham men sendan ayro boʻlmayman,

Ona yurt, seni hech kimga bermayman!

 

Istayman, bagʻringda mangu qolmoqni,

Kelajakka sogʻlom nazar solmoqni.

Barkamol avlodman safingda turgan,

Aziz nomingga hech gard yuqtirmayman,

Ona yurt, seni hech kimga bermayman!

 

Toʻmaris iziman, qalbimda gʻurur,

Hech kimga bosh egmay turaman magʻrur.

Yuksaklarda bayrogʻing tursa hilpirab,

Xalqim qudratlanur, har on gurkirab!

Ona yurt, seni hech kimga bermayman!

 

Ota makonimsan, ona diyorim,

Oʻzingsan aslida nurli iqbolim,

Vatan shaʼni uchun toʻkilsa qonim,

Tandagi jonimni qoʻshib bergayman,

Ona yurt, seni hech kimga bermayman!

Dildora RAJABOVA.

Xushboʻy ifor

Bahor keldi qishloqqa,

Gul-u adir oʻtloqqa.

Xushboʻy, nafis havosi,

Uriladi dimoqqa.

 

Barcha xursand boʻldilar,

Quvonchlarga toʻldilar.

Bogʻning hushboʻy ifori,

Qalblarga kuy soldilar.

 

Togʻlarda, adirlarda,

Gul ochildi qirlarda.

Quvonchdan koʻnglim toʻlib,

Gul tutamiz doʻstlarga.

Dilnura RAHIMBOYeVA.

Vaqt

Yashasang, hech koʻngling toʻlmasa,

Kulsang-u yuzlaring kulmasa.

Yashashdan maqsading boʻlmasa,

Dardingga darmoning vaqtdir!

 

Kimgadir qolgansan bogʻlanib,

Ketishga oshiqib, chogʻlanib.

Uxlay olmasang toʻlgʻonib,

Dardingga darmoning vaqtdir!

 

Eslayman, har nafas olganda.

Oʻylanib, xayolga tolganda.

Yigʻlayman, bir oʻzim qolganda,

Bilarman, darmonim vaqtdir!

Surayyo RAJABOVA, 44-sonli maktab oʻquvchisi.