MEHNATGA MUNOSIB EʼTIROF

Jamiyatimizda mahalla tizimi rivojiga munosib hissa qoʻshib kelayotgan fidoyilarni ragʻbatlantirish maqsadida taʼsis etilgan “Mahalla iftixori” koʻkrak nishoni bugungi kunda oʻz egalariga topshirilmoqda.

Hamisha elim, yurtim deb, xalq dardini oʻz dardidek koʻrib, hayotini jamiyat rivojiga hissa qoʻshishga baxshida etib kelayotgan yurtdoshlarimizdan biri Xonimjon Rajabova ham mana shu mukofotga, yuksak eʼtirofga sazovor boʻldi. Ushbu mukofot ayni paytda tumandagi “Barkamol avlod” bolalar maktabi direktori, shuningdek, Mahalla va oilani qoʻllab-quvvatlash boʻlimida “Buvijonlar maktabi”ga raislik qilib kelayotgan el fidoyisiga Mahalla tizimi xodimlari kuniga bagʻishlab, Nukus shahrida oʻtkazilgan katta tadbirda tantanali ravishda topshirildi.

Asli mutaxassisligi jurnalist boʻlgan Xonimjon Rajabova uzoq yillar tuman matbuotida faoliyat koʻrsatdi. Toshkent Davlat Universitetini 1979-yilda tugatib, tuman gazetasi tahririyatiga kelganida uni darhol maxsus muxbir vazifasiga ishga qabul qilishdi. Ishga chanqoq, sermahsul va qalami oʻtkir ijodkor sifatida elga tanila boshlagan yosh jurnalistni oz fursat ichida tahririyatning qishloq xoʻjalik boʻlimiga mudir qilib tayinlashdi. Mahoratli jurnalist tahririyatda madaniyat boʻlimi mudiri, masʼul kotiblikdan tortib, muharrirlikkacha boʻlgan vazifalarda jonbozlik koʻrsatib, samarali mehnat qildi. Turli mavzularda qalam tebratib, xalq dardini, jamiyatdagi muammolarni yoritishga, shu orqali ularga yechim topishga harakat qildi. Sermahsul ijodi, tashkilotchiligi, tashabbuskorligi bilan nafaqat tumanda, Qoraqalpogʻiston, Oʻzbekiston miqyosida ham malakali jurnalist, jamiyat va yurt fidoyisi sifatida elga tanildi.

Matbuot sohasida xizmat qilib, maʼnaviyatni targʻib qilishga munosib hissa qoʻshgani uchun uni 1995-yilda Qoraqalpogʻiston Respublikasida xizmat koʻrsatgan madaniyat xodimi unvoni bilan taqdirlashdi. Jamiyat va xalq eʼtirofi boʻlgan ushbu unvon Xonimjon Rajabovani yanada koʻproq mehnat qilishga undadi.

1995-yilda yangidan joriy etilgan Amudaryo tuman xotin-qizlar qoʻmitasi raisi lavozimiga munosib koʻrilgani unga yanada katta masʼuliyat yuklagani boisdan xotin-qizlarning jamiyatdagi nufuzini oshirishga doir ishlarni hal etishga, ular oʻrtasida yechimini kutayotgan koʻplab muammolarga yechim topishga bor imkoniyatini safarbar etdi. Har bir oilaga, xonadonga kirib borib, ayol-qizlarning dardini tinglagan, yillar davomida har birining tashvishiga yelka tutgan, yoʻl koʻrsatib, turmushiga fayz olib kirgan Xonimjon Rajabova katta-yu kichikning hurmatiga sazovor boʻldi. Ushbu lavozimda 17-yil, matbuot sohasida esa 16-yil mehnat qilib, jonkuyarligi, xalqparvarligi, tashabbuskorligini koʻrsatdi, koʻplab ezgu ishlarni amalga oshirib, elda obroʻ qozondi.

Tinib-tinchimas Xonimjon opani mehnat nafaqasiga chiqqanidan keyin 2013-yilda tumandagi “Barkamol avlod” bolalar markaziga direktor qilib tayinlashdi. Tashkil qilinganiga hali uncha koʻp boʻlmagan, yoʻlga qoʻyilishi qiyin boʻlayotgan mazkur sohada ham Xonimjon Rajabova koʻp ter toʻkishiga toʻgʻri keldi. Dastlab ishni markaz uchun ajratilgan bino va uning atrofini obododlashtirishdan boshladi. Mashgʻulotlar oʻtkaziladigan xonalarni, ulardagi mavjud inventarlarni tartibga keltirdi. Tashabbus koʻrsatib, yangidan taʼmirlatishga, kerakli, zarur jihozlarni keltirishga, sharoitni yaxshilashga harakat qildi.

Shundan soʻng, kadrlar salohiyatini, malakasini oshirishga, yosh avlod taʼlim-tarbiyasi borasida sifat darajasini, koʻrsatkichlarni yuqori koʻtarishga alohida eʼtibor qaratdi. Markazda toʻgarak turlarini koʻpaytirishga, ularga koʻplab bolajonlarni jalb etishga erishildi. Toʻgaraklarda mohir ustozlardan taʼlim olib, hunar oʻrgangan yoshlar tuman, Qoraqalpogʻiston, Oʻzbekiston miqyosidagi turli koʻrik-tanlovlarda ishtirok etib, oʻz iqtidorlarini namoyish etdilar va faxrli oʻrinlar gʻoliblari boʻldilar.

Markaz 2017-yilda Qoraqalpogʻistonda eng namunali  “Barkamol avlod” bolalar markazi deb topildi. Yosh avlod taʼlim-tarbiyasi yoʻlidagi fidoyiligi uchun markaz direktori Xonimjon Rajabova 2019-yilda Qoraqalpogʻiston xalq  taʼlimi aʼlochisi unvoni bilan ham taqdirlandi.

2020-yildan “Barkamol avlod” bolalar maktabi sifatida faoliyat koʻrsata boshlagan, ayni paytda obod va fayzli maskanga aylangan ushbu muassasada estrada-vokal, liboslar dizayni, mental arifmetika, kompyuter savodxonligi, aviamodel va avtomodel kabi 43 ta toʻgaraklarda 1 180 nafar bolalarga turli hunarlar oʻrgatilmoqda.

Namunali oila sohibasi umr yoʻldoshi Safarboy Oʻrozaliyev bilan 6 nafar farzandni jamiyat koriga yaraydigan insonlar qilib voyaga yetkazishdi. Ayni damda u nafaqat 15 nafarga yetgan oʻz nevaralarining, balki butun amudaryolik bolajonlarning sevimli buvijoniga aylandi. Tuman Mahalla va oilani qoʻllab-quvvatlash boʻlimining jamoatchilik asosidagi “Buvijonlar maktabi”da ham raislik qilib, yosh avlod tarbiyasiga hissa qoʻshayotgan Xonimjon Rajabovaning barcha mehnatlari davlatimiz tomonidan yana bir bor eʼtirof etilib, “Mahalla iftixori” koʻkrak nishoniga munosib deb topildi.

Oʻzini, hayotini, butun salohiyatini xalq xizmatiga bagʻishlagan, nafaqat mahalla, balki butun Amudaryo iftixoriga aylangan fidoyi ayol Xonimjon Rajabovani ushbu yuksak mukofot yanada koʻproq ezguliklar qilishga undaydi. El-yurt ravnaqiga, jamiyat rivojiga hissa qoʻshishdan aslo charchamaydi.

Ozoda Xudoyberganova.