XALQ DEPUTATLARI AMUDARYo TUMAN KENGAShINING 30-SESSIYaSI TOʻGʻRISIDA AXBOROT

2021-yil 26-mart kuni Amudaryo tumani hokimligining majlislar zalida Xalq deputatlari Amudaryo tuman Kengashining 30-sessiyasi boʻlib oʻtdi.

Sessiya majlisida sektor rahbarlari, tuman hokimi oʻrinbosarlari, hokimlik masʼul xodimlari, huquq-tartibot organlari, boʻlimlar rahbarlari hamda ommaviy axborot vositalari vakillari ishtirok etdilar. Sessiyaga tuman hokimi Sultonboy Yoʻldashev raislik qildi.

Kun tartibiga havola qilingan birinchi masala, yaʼni sudlar tomonidan fuqarolar huquqlari va erkinliklarini, korxonalar, muassasalar va tashkilotlarning huquqlari hamda qonun bilan qoʻriqlanadigan manfaatlarini himoya qilish hamda odil sudlovni amalga oshirishga doir  2021-yilning yanvar-fevral oylaridagi faoliyati toʻgʻrisida Jinoyat ishlari boʻyicha Amudaryo tuman sudi raisi Sultonmurod Davletmurodovning axboroti tinglandi.

2021-yilning yanvar-fevral oylari davomida Jinoyat ishlari boʻyicha Amudaryo tuman sudiga jami 23 shaxsga nisbatan 20 ta jinoyat ishi, jami 279 shaxsga nisbatan 231 ta maʼmuriy ishlar kelib tushgan va koʻrib chiqilgan.

Sessiya kun tartibiga qoʻyilgan Oʻzbekiston Respublikasi Prezidentining 2020-yil 18-dekabrdagi “Hududlarda muhandislik-kommunikatsiya infratuzilmasini yanada rivojlantirish chora-tadbirlari toʻgʻrisida”gi Qarori ijrosi haqidagi ikkinchi masala yuzasidan tuman hokimi oʻrinbosari Jasur Narimov axborot berib oʻtdi.

Axborotda taʼkidlanganidek, joriy yilda tumanimizning 16 ta ovul va mahallalari hududidagi umumiy qiymati 7 mlrd 800 mln soʻmlik 49 km uzunlikdagi elektr tarmoqlarini tortish, 14 ta transformator punktlarining holatini yaxshilash, 1 ming 105 ta elektr simyogʻochlarini yangilash rejalashtirilgan.

Gaz taʼminotini yaxshilash maqsadida 2,2 km gaz tarmoqlarini rekonstruktsiya qilish, 1 ta gaz taqsimlash punktini mukammal taʼmirlash, 230 ta gaz taqsimlash punktlarini taftish qilish, 35 km gaz quvurlarini zichlikka sinash, 15,8 km yer osti gaz quvurlarining holatini tekshirish va 5 km gaz tarmoqlarini boʻyoq qilish ishlarini amalga oshirish rejalashtirilgan.

Sessiya kun tartibidagi navbatdagi masala, yaʼni “Tabiiy gaz nazorati va hisobining avtomatlashtirilgan tizimini joriy etish” loyihasini amalga oshirish borasida olib borilayotgan ishlar toʻgʻrisida “Amudaryotumangaz” gaz taʼminoti boʻlimi boshligʻi Jasur Yermetov hisoboti tinglandi.

Hisobotda qayd etilganidek, tuman boʻyicha 13210 ta xonadonga zamonaviy gaz hisoblash uskunalarini oʻrnatish rejalashtirilgan boʻlib, hozirgi kungacha 582 ta xonadonga “aqlli” hisoblagichlarni oʻrnatish ishlari yakuniga yetkazilgan.

Kun tartibiga kiritilgan “Tumanda suv resurslarini boshqarish, suv xoʻjaligi obʼektlarining texnik holatini yaxshilash, shuningdek suv tejovchi sugʻorish texnologiyalarini joriy etish holati toʻgʻrisida”gi masala yuzasidan tuman Irrigatsiya boʻlimi boshligʻi Jamol Rajabov hisobot berdi.

Hisobotda taʼkidlanganidek, 2021-yilda shoʻr yuvish davri uchun ajratilgan suv limiti suv isteʼmolchilariga oʻn kunliklar boʻyicha taqsimlanib, suv isteʼmolchilari uyushmasi bilan suvdan foydalanish boʻyicha shartnomalar toʻliq tuzilgan. Irrigatsiya boʻlimi va suv isteʼmolchilari uyushmasi oʻrtasida 328 ta suvning doimiy hisob-kitob jurnallari tashkil etilgan. 2021-yilgi shoʻr yuvish davri uchun tuman boʻyicha 157,5 mln kub metr suv limiti belgilangan boʻlib, amalda 121,3 mln. kub metr suv isteʼmolchilarga yetkazib berildi. Ushbu olingan suv miqdori bilan 24 ming 142 gektar maydon sugʻorilgan boʻlib, suvdan foydalanish koeffitsiyenti 0,91 ni tashkil qilmoqda.

Shundan soʻng, Amudaryo tumani Xalq taʼlimi boʻlimiga qarashli maktablarda boʻsh turgan direktor lavozimlariga oʻtkazilgan tanlov yakunlari boʻyicha   nomzodlarga kelishim berish masalasi koʻrib chiqildi.

Maʼlumki, 2020-yil 6-noyabrda Oʻzbekiston Respublikasi Prezidentining “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida”gi Farmoni qabul qilingan edi. Farmonning 11-bandiga muvofiq 2021-yil 1-yanvardan boshlab, umumtaʼlim muassasalari direktorlarini lavozimga tayinlash hamda ish beruvchining tashabbusiga koʻra lavozimidan ozod etishning Qoraqalpogʻiston Respublikasi Xalq taʼlimi vazirligi, viloyatlar boshqarmalari va Toshkent shahar bosh boshqarmasi tomonidan tegishli xalq deputatlari tuman Kengashlari bilan kelishilgan holda amalga oshirish tartibi joriy etilgan.

Sessiyada tumandagi 9-, 18- va 25-sonli maktablarda direktor lavozimi vakant hisoblanib, Qoraqalpogʻiston Respublikasi xalq taʼlimi vazirligi tomonidan ushbu vakant direktor lavozimlari uchun eʼlon berilganligi, tanlovda ishtirok etish uchun talabgorlar ariza bilan murojaat etganligi, nomzodlarning hujjatlari, ularning belgilangan malaka talablariga mosligi oʻrganib chiqilganligi hamda bir necha nomzodlar tuman Kengashi sessiyasiga koʻrib chiqish uchun tavsiya etilganligi maʼlum qilindi.

Maktab direktori lavozimiga nomzodlar kelgusi 3-yil ichida maktabda taʼlim sifatini yaxshilash boʻyicha oʻzlarining dasturlarini deputatlar eʼtiboriga havola qildi. Taqdimotlardan keyin deputatlar yashirin ovoz berish orqali eng munosib nomzodlarni tanladilar.

Yashirin ovoz berish natijalariga koʻra “Qizilcholi” mahallasidagi 9-sonli umumtaʼlim maktabi direktori lavozimiga Yakubov Shuxrat Qurbonboyevich, Amir Temur ovulidagi 25-sonli umumtaʼlim maktabi direktori lavozimiga Djabbarov Amanmurod Gaipovich va “Qipchoq” ovulidagi 18-sonli umumtaʼlim maktabi direktori lavozimiga Radjapov Ibragim Arzimbetovichlar nomzodi munosib deb topildi.

Sessiya kun tartibiga kiritilgan barcha masalalar atroflicha koʻrib chiqildi. Koʻrilgan masalalar yuzasidan tegishli qarorlar qabul qilindi.

Tuman hokimligining axborot xizmati.