Mangʻit dehqon bozorida “Navroʻz” bayrami arafasida savdo yarmarkasi faoliyati yoʻlga qoʻyildi

Mamlakatimiz aholisini kundalik isteʼmoli uchun zarur boʻlgan ijtimoiy ahamiyatga ega asosiy turdagi oziq-ovqat mahsulotlari, shuningdek, arzon, sifatli qishloq xoʻjalik mahsulotlari bilan uzluksiz taʼminlashga va narx-navo barqarorligini saqlashga alohida eʼtibor qaratilmoqda. Shu maqsadda tegishli vazirliklar tumanlar hokimliklari hamkorligida aholi sonidan kelib chiqib, kundalik ehtiyojga zarur oziq-ovqat hamda qishloq xoʻjalik mahsulotlarining bozorlarda sotilishi nazoratga olinmoqda hamda narxlarning barqarorligini saqlash choralari koʻrilayapti. Buning uchun fermer xoʻjaliklari, dehqon xoʻjaliklari va yer egalari tomonidan yetishtirilgan qishloq xoʻjalik mahsulotlari birinchi navbatda tuman aholisiga sotilishi uchun dehqon bozorlariga olib chiqilmoqda.

Mangʻit dehqon bozorlarida  oziq-ovqat va qishloq xoʻjaligi mahsulotlari fermer, dehqon hamda  shaxsiy tomorqa yer egalaridan toʻgʻridan-toʻgʻri, qoʻlma-qoʻl oʻtib, bahosi oʻsishiga yoʻl qoʻyilmasdan sotilishi ustidan nazorat oʻrnatilmoqda. Bozorda sanitariya, veterinariya qoidalariga rioya etilishi, tozalik, mahsulotlarning sifati, isteʼmolga yaroqliligini oʻrganish doimiy olib borilmoqda. Navroʻz bayrami arafasida Mangʻit dehqon bozori oldida savdo yarmarkasi tashkil etildi

Shuningdek, Amudaryo tuman hokimligi tomonidan tasdiqlangan roʻyxat asosida tumandagi chorvachilik fermer xoʻjaliklari hamda goʻsht mahsulotlari sotish bilan shugʻullanuvchi yakka tartibdagi tadbirkorlar tomonidan aholining goʻshtga boʻlgan ehtiyojining maʼlum qismini taʼminlash borasida yirik shoxli qoramollar soʻyilib, maxsus rastalarda har bir kilogrammi 45000 soʻmdan, kartoshka 3000-3500 soʻmdan, tuxum 900-1000 soʻmdan sotilmoqda.

Amudaryo tuman davlat Soliq inspektsiyasi bilan birgalikda bozor hududida davlat roʻyxatidan oʻtmasdan, noqonuniy olib sotarlik bilan shugʻullanayotgan shaxslar aniqlanib, belgilangan tartibda soliqqa tortilayapti, narxlarning oʻsishiga olib keladigan omillar birma-bir oʻrganilib, bartaraf etish choralari koʻrilayotir. Jumladan, Oʻzbekiston tovar xom-ashyo birjasi savdolaridagi oziq-ovqat mahsulotlari (oʻsimlik yogʻi, shakar, un mahsulotlari) narxlari toʻgʻrisida maʼlumotlar olinib oʻrganilmoqda. Bundan maqsad tadbirkorlik subʼektlari tomonidan birja savdolarida sotib olingan oziq-ovqat mahsulotlari noqonuniy olib sotarlik bilan shugʻullanayotgan shaxslar qoʻllariga oʻtib, narx koʻtarilib ketishining oldini olishdir.

Savdo yarmarkasida sotuvchilar va xaridorlar uchun qulay sharoit yaratish maqsadida bostirma qilinib, peshtaxta qoʻyildi. Ushbu savdo oʻrinlarida va bozorda narxlarning barqarorligini taʼminlash maqsadida doimiy nazorat olib borilayapti. Bu bilan yurtdoshlarimizning kundalik hayotidagi zarur boʻlgan oziq-ovqat va qishloq xoʻjaligi mahsulotlariga boʻlgan ehtiyojlari qoplanishinini taʼminlash koʻzda tutilgan.

Navroʻz bayrami arafasida tashkil etilgan savdo yarmarkasi tumanimiz mehnatkashlari arzon, sifatli va xavfsiz oziq-ovqat mahsulotlarini xarid qilish imkonini yaratdi.

Zafar Saburov, departamentning Amudaryo tuman boʻlim boshligʻi.