ENG TEJAMKOR OILA

(Hajviya)

“Beshterak” mahallasida “Eng tejamkor oila” nomli tanlov oʻtkazildi. Alohida komissiya aʼzolari uch guruhga boʻlingan holda kecha-yu kunduz yurib, navbatma-navbat kuzatuvlar olib borishdi. Barcha diqqat-eʼtibor elektr energiyasini tejashga qaratildi.

Nihoyat tanlov natijalari eʼlon qilinadigan kun ham yetib keldi. Bu majlisga mahalla ahli toʻliq qatnashdi.

– Hurmatli mahalladoshlar, – deb tantanali ravishda soʻz boshladi mahalla oqsoqoli – mana, tanlov nihoyasiga yetdi. Hozir kuzatuv olib borgan har uchala guruh rahbarlariga navbati bilan soʻz beramiz. Ular oʻz kuzatuvlari natijalarini bayon qilishadi. Soʻz birinchi guruh rahbariga!

Birinchi guruh rahbari tomonidan diqqatga sazovor deb topilgan oila aʼzolari umuman gazeta-jurnal oʻqimas, televizorda koʻrsatilayotgan voqea-hodisalarga ishonmaganligidan umuman televizor ham koʻrmas ekanlar.

– Demak, – xulosa qildi u, – birinchi oʻringa shu oila munosib!

Nomi zikr etilgan oila aʼzolari quvonchdan bir qalqib tushishdi. Axir har ishda ham bir hikmat bor-da! Kunduz uy ishlari bilan ovora boʻlsa, kechasi tok ketkazib, gazeta-jurnal oʻqimasa, televizor koʻrmasa, nima boʻlibdi, mana nomi yaxshilar qatorida chiqib turibdi.

– Gʻoliblikka bizning tomonimizdan koʻrsatilajak oila munosib, – dedi ikkinchi guruh boshligʻi biroz kerilib, – bu oila aʼzolari mana bir yarim oydan beri uylariga tortilgan elektr simlari uzilganiga eʼtibor bermay, elektrsiz oʻtirishibdi. Agarda elektr tarmoqlari idorasidan montyorlar  oʻzlari kelib ulab ketishmaganida haliyam elektrni tejab oʻtirishgan boʻlardi. Ana tejamkorlik!

Uchinchi guruh aʼzolari esa barchani hayratda qoldirib, bosh sovrin Madi piyonning oilasiga berilishi kerakligini taʼkidlashdi. Ular Madi piyonning uyida shu oʻtgan ikki oy davomida biror marta ham elektr chirogʻi yonmaganligini bir ogʻizdan tasdiqlashdi.

Xullas, uzoq tortishuvlardan keyin bosh sovringa Madi piyon ega chiqdi.

Xotini arazlab, uch oy burun onasinikiga ketib qolganiga xafa boʻlib, kecha-yu kunduz ichib, uyiga ham kelmay, duch kelgan joyda yotib yurgan Madi piyonning quvonchi cheksiz edi. Axir uning shu hayot tarzi tanlovning qatʼiy talabiga toʻliq javob bergan edi.

Yigʻilganlar tanlov natijasidan norozi boʻlishib, gʻala-gʻovur koʻtarishdi.

– Xafa boʻlmanglar, – deya ularni yupatdi mahalla oqsoqoli, – yaqinda “Eng jim-jit oila”, “Qoʻshnisi bilan urishmaydigan oila” tanlovlarini oʻtkazamiz, oʻshanda sizlar ham, albatta, gʻolib boʻlasizlar!

Yigʻilganlar bosh sovrinni olib gandiraklaganicha ketayotgan Madi piyonga hadik bilan qarab qoʻyishdi. Ularning qarashlarida “bu ketishda navbatdagi sovrinni ham shu egallamasa edi”, degan xavotir bor edi.

Axir xotinsiz uyda na shovqin-suron, na qoʻshni bilan janjal boʻlmasligi barchaga ayon-ku!

Madi piyon esa dunyo tashvishlaridan bexabar, parvoyi-palak ketib borardi...

Oʻrozali REYIMOV.