Jayxun ilhomlari
Zulfiya tugʻilgan kun
Qish toʻnini yechmasdan,
Esdi bahor shamoli.
Hut qilichi sinmasdan,
Maysa ochdi jamolin.
Derazamdan moʻralab,
Yashillandi gul, chechak.
Men koʻk terdim avaylab,
Soʻngra qurdim halinchak.
Quyosh sochar nurini,
Bahorga yoʻldosh umrim.
Zulfiya tugʻilgan kunni,
Shodlana nishonladim.
Yomgʻirli kun kamalak,
Bogʻ ustida yoy tortdi.
Qaynab chiqqan sumalak,
Boʻyi yerni uygʻotdi.
Z.AHMEDOVA.
BAHORNI SOGʻINIB
Tashqarida esar izgʻirin,
Junjikadi yurak qafasda.
Osmonimda kezmoqda bulut,
Goʻyo olam qolgandek tunda...
Iltijo-la koʻkka tikilgan,
Koʻzlar bunda jalasin quyar.
Duolarga ochilgan qoʻllar,
Qalbdan sogʻinch, alam toʻkilar.
Dilda kezar oʻy-u xayollar,
Nelar qildim, qanday xatolar...
Allohimning sinovlaridan,
Qanday oʻtgum, bosib qadamlar.
Tashqarida esar izgʻirin,
Qalbim ezar alam toʻfoni.
Qachon kelar bahor...
esar shabada...
Qaldirgʻochim chugʻuri,
Tutar ayvonni...
Bahorim.., yozim...
Kutaman seni
Dilda sogʻinch,
Ilhaqlik ila.
Musichalarim...
Qish ayozidan
omon chiqsin
Allohim deya...
Gulnora Yusupova.
Oʻzbek ayoli
Maqtagayman pokiza oʻzbek ayolin,
Axir kimdan kamdir oʻzbek ayoli?
Mayli, boʻlsin qoʻl – kosov, sochi supurgi,
Lek qalbi pok, vafodor oʻzbek ayoli.
Mehnatdan boʻlsa hamki, qoʻllari qadoq,
Mudom kular yuzlari, koʻzlari chaqnoq.
Kelajak shu qiz-u ayollar-la porloq,
Aytinglar, kimdan kamdir oʻzbek ayoli?
Mayli, sodda boʻlsin, dunyo kezmasin,
Farzandidan izlar ertasin, dunyosin.
Yerga qaratmas zinhor elining yuzin,
Aytinglar, kimdan kamdir oʻzbek ayoli?
Ayol boʻlib dunyoga kelmoq bir sinov,
Bu sinovni sabr-la yenggangina ayol.
Ayol emas, farishta – oʻzbek ayoli,
Dunyolardan ustundir oʻzbek ayoli.
Laylo Olimova.
Yurtimda koʻklam
Mana kirib keldi yurtimga koʻklam,
Oʻzgacha tus oldi goʻyoki olam.
Xudoga yetibdi nahotki nolam,
Buncha sogʻintirding, bunchalar bahor.
Issiq nafasingga zordir bu koʻngil,
Gullaring hididan yashnayapti dil.
Togʻlar koʻz oldimda goʻyo lolazor,
Bunchalar sogʻintirding, bunchalar bahor.
Qushlar chugʻurlashib seni qoʻmsaydi,
Qaldirgʻoch uylardan seni izlaydi.
Bulutlar sogʻinib yigʻlaydi zor-zor,
Bunchalar sogʻintirding, bunchalar bahor!
Sveta XUDOYoROVA.
Vatan
Kim anglaydi bu soʻzni,
Bilarmikan maʼnosin.
Goʻdak ochib koʻzlarin,
Tanirmikan onasin?
Osmonda yulduz chiqar,
Ona yerga yetolmay.
Sogʻinib takror-takror,
Oyning izidan qolmay.
Yer deb atalgan dunyo
Vatan hissini berar.
Unda oqqan daryolar
Tuproqni oʻpib koʻrar.
Qir-adirlar yastanib,
Goʻzallikni yaratar.
Inson xursand boʻlsin deb,
Yer shirin suvga qonib.
Azal-azaldan hayot
Tiriklarga berilgan.
Oʻz-oʻziga qoʻshib ot,
Vatan soʻzi topilgan
Uzoq umr koʻrganlar
Koʻp narsani biladi.
Yer qadrini bilganlar
Vatan qadrin biladi.
Oʻrozboy TAJIYeV.
Men ham onaman
Onajonim yoʻl qaraydi,
Kelib qolar bolam deb.
Topganini oʻzi yemay,
Olib qoʻyar menga deb.
“Bolajonim yeya qolgin”,
Deydi menga moʻltirab.
Men esa bekitaman,
Oʻzim yemay, bolam deb.
Onajonim men haqimda,
Kecha-kunduz oʻylasa.
Kelib qolarmikan deb,
Yoʻllarimga qarasa.
Men onamni emas, balkim,
Oʻz farzandim oʻylasam.
Bu qandayin sir-sinoat,
Taqdir, yozuq shundaymi?
Bolam, deya joni halak,
Mehri ummon ayolning.
Onamdan ham ortiqmi,
Bolam mening, Xudoyim!
Bilolmadim koʻksimdagi,
Jonim mening bolammi?
Onajonim, onajonim – Bosh egay poyingizga.
Sizga loyiq boʻlolsam,
Yarasam-koringizga,
Endi men ham onaman.
Shirin nevarangizga!
Jumagul YuNUSOVA.
Sizdir dunyo goʻzali
Mehringiz adogʻi yoʻq,
Bunchalar zoʻrsiz, onam.
Sizdir dunyo goʻzali,
Goʻzalim mening, onam.
Nur taratar yuzingiz,
Kulib turar koʻzingiz.
Jon onam-a, jon onam
Buncha shirin soʻzingiz.
Doim bizni oʻylaysiz,
Erta-yu kech, tinmaysiz.
Shirin-shakar nevara
Baxtlarini koʻrgaysiz.
Yuzga kiring onajonim,
Hech qachon boʻlmang kasal.
Dadam bilan hali birga
Qilasiz hajga safar!
Dildora RAJABOVA.
Olma
Sargʻish, qizil, yashil rang,
Olmalar turfa, qarang.
Olmalarning sarasi,
Bizning bogʻning mevasi,
Ogʻzingda qolar taʼmi,
Tatib koʻr, doʻstim, qani.
Ogʻabek BOZORBOYeV,
16-sonli IDUM oʻquvchisi.
Fasli navbahor
Kelsa bahor jumla jahon,
Koʻz-koʻz qilar jamolini.
Tabiatga ham kirib jon,
Sochar ranglar jilosini.
Yashil maysa va ochilgan,
Oppoq oʻrik gullari.
Dilga ilhom baxsh etadi,
Bahorning sof yellari.
Rizq-nasiba bahor bilan,
Olam goʻzal bahor bilan.
Koʻnglimdagi xush navolar,
Sen tufayli, fasli navbahor!
Umida ERDOShEVA.
Buvijonim
Yoʻllarimga qaragan,
Sochlarimni taragan.
Doim bizni oʻylagan,
Mehribonim buvijon!
Dil sandigʻini ochgan,
Meni deb borin sochgan.
Tunlari bedor boʻlgan,
Jonajonim buvijon!
Aytmaydi hech yomon soʻz,
“Bolajonim tegmasin” koʻz, –
Deb taʼkidlar har bir kez
Xushzabonim buvijon!
Bizni oʻylab chiqar kun,
Bizni oʻylab botar tun.
Baxtimiz koʻrsin butun,
Mehnatkashim buvijon!
Bogʻimizning bogʻboni,
Uyimiz charogʻboni.
Koʻngilda yoʻq gʻubori,
Sofdilligim buvijon!
Zulfizar OʻROZBOYeVA,
16-sonli IDUM oʻquvchisi.
ONAJON
Mening farishtam,
Goʻzal, sarishtam.
Mehri bir ummon –
Gʻamxoʻrim onam!
Har soʻzida maʼnolar,
Koʻzlarida mehr bor.
Yuragida sehr bor,
Quvonchim onam!
Soʻzlari dona-dona,
U dunyoda yagona.
Siylar uni Allohim,
Tayanchim onam!
Qadriga yeting doim,
Quyoshim deng va Mohim.
U bordir goʻzal olam,
Suyanchim onam!
Nozima Shomurodova, 22-sonli maktab oʻquvchisi.
Mehribonim
Mehr berib oʻstirdingiz,
Dilga mador soʻzlaringiz.
Qatorimdan kam qilmasdan,
Ham avaylab asradingiz.
Siz quyoshsiz osmonimda,
Kecha-kunduz posbonim-da.
Mehr koʻshkin yaratdingiz,
Ota uyim – makonimda.
Onajonim, omon boʻling,
Porloq quyosh, oyim boʻling.
Muhabbati dunyoga teng –
Toshqin daryo, soyim boʻling.
Muhabbat OʻRINBOSAROVA,
3-sonli maktab oʻquvchisi.
Onajonim mening
Quvontirgan, kuldirgan,
Mehr berib oʻstirgan.
Yuragidan joy bergan,
Mehribon onajonim.
Uyimiz farishtasi,
Pazanda, sarishtasi.
Udir baxt rishtasi,
Mehribon onajonim.
Manzura BOTIROVA, 13-maktab oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
