“EL EʼTIROFI – MEN UChUN BAXT”

Bobur ovulida tugʻilib oʻsgan Luiza Yangiboyeva umr boʻyi tibbiy punktda feldsher  boʻlib ishlasa-da, ovuldoshlari “Toʻliboy  doʻxtir” deya hurmat bilan tilga oladigan, ehtiyoj tugʻilganida yarim kechalari ham eshik qoqib kelgandan yordamini ayamaydigan, elga qilgan xizmatidan hech  ogʻrinmaydigan otasiga oʻxshashni orzu qilib, tibbiyot sohasiga qadam qoʻydi. Maktabni tugatgach, Andijon tibbiyot bilim yurtining akusherlik boʻlimiga oʻqishga kirdi. Bilim yurtini muvaffaqiyatli tugatib, Andijon shahar tugʻruq kompleksida akusherka boʻlib ishlay boshladi.

Oʻsha yillar uning tanlagan kasbining masʼuliyatini teran anglab yetgan, akusherlik mahoratini oshirishi yoʻlida muhim davr boʻlib qoldi hayotida.  Tugʻruq jarayoniga har bir ayolni qabul qilgan vaqtida doim onasining “ayol bolasini  jonini xatarga qoʻyib, ikki dunyo oraligʻida turib dunyoga keltiradi, ularga qoʻlingdan kelganicha yordam bersang, shirin soʻzing bilan tasalli bersang, savob boʻladi”, degan soʻzlari quloqlarida yangrardi.

Ota-onasidan olisda, ular sogʻinchi bilan yashab yurgan qiz butun mehrini koʻzi yoriyotgan ayollarga koʻrsatar, toʻlgʻoq azobi ham ayol uchun baxt ekanligini, hademay farzandini bagʻriga olishini aytib, ularni yupatar,  tasalli berardi.

1999-yilning iyulida tumanimizga qaytib, 2005-yilgacha tuman Tibbiyot birlashmasining tugʻruqxona boʻlimida katta doya boʻlib, 2015-2018-yillarda homilador ayollar patologiyasi boʻlimida hamshira boʻlib ishladi. 2018-yildan hozirgi kungacha tuman Tibbiyot birlashmasining katta hamshirasi boʻlib ishlab kelmoqda.

Oʻz kasbiga masʼuliyati, mehri uni doimo jamoasida obroʻ-eʼtiborli qilib kelmoqda.

– Odam oʻz faoliyatidan qoniqsa, kasbida ixlos bilan ishlasa, charchamaydi, – deydi Luiza Yangiboyeva kulib. – Aksincha, vaqt oʻtishini sanab, bu ishni ertaga qilsam ham boʻlar deb, yo qoʻl uchida ishlagan odam doim horgʻin yuradi. Bizning sohada ikkinchi darajali ishning oʻzi yoʻq.

Luiza oʻz ishiga ana shunday yondoshgani uchun ham ishlab charchamaydi. Ishdan kelib oilasida farzandlari tarbiyasi bilan shugʻullanadi, oʻqishlarini, xulqini nazorat qiladi, mol boqib oilasida qoʻshimcha daromad manbai yaratilishiga, tomorqa yerida oilasi ehtiyojiga zarur mahsulotlar yetishtirilishiga koʻmaklashadi.

Bugun u baxtli oila sohibasi. Turmush oʻrtogʻi bilan hamjihatlikda voyaga yetkazayotgan farzandlari orzu-intilishlariga qanot. Toʻngʻichi Eldor xorijiy oliygohning, qizi Iroda esa tibbiyot oliygohi talabalari. Kichkinasi esa hali maktab oʻquvchisi.

Oliy toifali hamshira Luiza Yangiboyeva oʻz faoliyatida hamkasblarining, odamlarning eʼtiroflaridan ruhiy quvvat olib, gʻayrat-shijoat bilan ishlashga, oʻrta tibbiyot xodimlariga odilona munosabatda boʻlib, mehnatlarini munosib baholab, kamchiliklarini oʻz vaqtida bartaraf etishiga koʻmaklashishga intiladi. Buni oʻzi uchun ulkan baxt deb hisoblaydi.

Yurtimizda 8-mart – Xalqaro xotin-qizlar kuni keng nishonlanayotgan ushbu sururli damlarda oʻz kasbining fidoyisi boʻlgan Luizaxonni ham bayram bilan qutlab qolamiz.

Oygul RAJABOVA.