OʻZBEKISTON ChEMPIONATI GʻOLIB VA SOVRINDORLARI TANTANALI KUTIB OLINDI

Mamlakatimizda aholisi, ayniqsa yoshlarning jismoniy tarbiya va sport bilan muntazam shugʻullanishini taʼminlash orqali ularning jismonan sogʻlom, faol boʻlishiga erishishga alohida eʼtibor qaratilmoqda. Bu orqali ularga sogʻlom turmush tarziga intilish va sportga qiziqish singdiriladi.
Tumanimizda shu maqsadlarga xizmat qiluvchi sport sogʻlomlashtirish maydonchalari qurilib, jihozlanayapti.
Tumandagi Bolalar-oʻsmirlar sport maktabida tumanimizning 1494 nafar sportsevar oʻgʻil-qizlari 20 ta sport turi boʻyicha mashgʻulotlarda qatnashib, mahoratini oshirishga muvaffaq boʻlishayapti. Ular joriy yilning oʻtgan davrida Oʻzbekiston chempionatlarida 2 ta oltin, 1 ta kumush, 3 ta bronza medallarini qoʻlga kiritishdi. Shugʻullanuvchilarga 59 nafar tajribali murabbiylar mashgʻulotlarni qunt bilan olib borishmoqda.
Sport maktab rahbariyati va murabbiylari saʼy-harakatlari natijasida yosh sportchilar yutuqlari tobora koʻpaymoqda.

Shu yilning 19-20-fevral kunlari Toshkent shahrida kattalar va yoshlar oʻrtasida sportning oʻzbek jang sanʼati boʻyicha oʻtkazilgan Oʻzbekiston chempionati tuman Bolalar-oʻsmirlar sport maktabi shugʻullanuvchilari uchun omadli keldi.
Ustozlari va ota-onalarining duolarini olib, tumanimiz sport sharafini himoya qilishga otlangan Qutlimurod Pirimbetov, Mahmudjon Safarboyevlarning shogirdlari chempionatda yorqin gʻalabalarni qoʻlga kiritdilar.
Tumanimizdagi 69-sonli umumiy oʻrta taʼlim maktabi oʻquvchilari boʻlgan sport maktabning oʻzbek jang sanʼati guruhi aʼzolaridan 10-11 yoshli qizlar orasida 33 kilogramm vazn toifasida Lolagul Tozaboyeva ikkinchi, 12-13 yoshli qizlar oʻrtasida 45 kilogramm vazn toifasida Hilola Tursunboyeva birinchi oʻrinni, 43 kilogram vazn toifasida Kumushoy Otajonova ikkinchi oʻrinni, 14-15 yoshli qizlar oʻrtasida 50 kilogramm vazn toifasida Sevinchoy Nurimbetova uchinchi oʻrinni egallab, chempionat shohsupasiga koʻtarildilar. Yorugʻ yuz bilan qaytgan Oʻzbekiston chempionati gʻolib va sovrindorlari 23-fevral kuni tuman Bolalar-oʻsmirlar sport maktabida tantanali kutib olindi.
Sovrindorlar sharafiga sport maktabida tantanali yigʻilish boʻlib oʻtdi. Tantanada tuman Jismoniy tarbiya va sport boʻlimi boshligʻi Gʻulomjon Qurbonboyev, maktab direktori Chorsham Tojimurodovlar sportchi qizlarni qizgʻin qutlab, kelgusida ham muvaffaqiyatlar yor boʻlishini tiladilar.
Albatta, har qanday yutuq – mehnat mahsuli. Shugʻullanuvchi qizlarni shu darajaga yetkazgan murabbiylar xizmati ham alohida eʼtirof etildi.
Shundan keyin tadbir sportchi qizlar taʼlim olayotgan 69-sonli umumiy oʻrta taʼlim maktabida davom etdi. Barcha oʻqituvchilar, oʻquvchilar ularni kuy-qoʻshiqlar sadosi ostida, olqishlar bilan qarshi oldilar.
Maktab direktori Dilshod Boboniyozov gʻoliblarni qizgʻin qutlab, murabbiylariga, ota-onalariga chuqur minnatdorchilik bildirdi. Ustozlar, doʻstlar tabriklaridan quvongan chempionat gʻolibi va sovrindorlari kelgusida bundan-da nufuzli musobaqalarda tumanimiz sport sharafini munosib himoya qilishga soʻz berdilar.
Sportchilarga koʻrsatilgan hurmat-ehtirom koʻpgina oʻquvchilar koʻnglida havas, sport bilan shugʻullanishga ragʻbat uygʻotdi.

O.RAJABOVA.