ЎЗБЕКИСТОН ЧЕМПИОНАТИ ҒОЛИБ ВА СОВРИНДОРЛАРИ ТАНТАНАЛИ КУТИБ ОЛИНДИ

Мамлакатимизда аҳолиси, айниқса ёшларнинг жисмоний тарбия ва спорт билан мунтазам шуғулланишини таъминлаш орқали уларнинг жисмонан соғлом, фаол бўлишига эришишга алоҳида эътибор қаратилмоқда. Бу орқали уларга соғлом турмуш тарзига интилиш ва спортга қизиқиш сингдирилади.
Туманимизда шу мақсадларга хизмат қилувчи спорт соғломлаштириш майдончалари қурилиб, жиҳозланаяпти.
Тумандаги Болалар-ўсмирлар спорт мактабида туманимизнинг 1494 нафар спортсевар ўғил-қизлари 20 та спорт тури бўйича машғулотларда қатнашиб, маҳоратини оширишга муваффақ бўлишаяпти. Улар жорий йилнинг ўтган даврида Ўзбекистон чемпионатларида 2 та олтин, 1 та кумуш, 3 та бронза медалларини қўлга киритишди. Шуғулланувчиларга 59 нафар тажрибали мураббийлар машғулотларни қунт билан олиб боришмоқда.
Спорт мактаб раҳбарияти ва мураббийлари саъй-ҳаракатлари натижасида ёш спортчилар ютуқлари тобора кўпаймоқда.

Шу йилнинг 19-20 февраль кунлари Тошкент шаҳрида катталар ва ёшлар ўртасида спортнинг ўзбек жанг санъати бўйича ўтказилган Ўзбекистон чемпионати туман Болалар-ўсмирлар спорт мактаби шуғулланувчилари учун омадли келди.
Устозлари ва ота-оналарининг дуоларини олиб, туманимиз спорт шарафини ҳимоя қилишга отланган Қутлимурод Пиримбетов, Маҳмуджон Сафарбоевларнинг шогирдлари чемпионатда ёрқин ғалабаларни қўлга киритдилар.
Туманимиздаги 69-сонли умумий ўрта таълим мактаби ўқувчилари бўлган спорт мактабнинг ўзбек жанг санъати гуруҳи аъзоларидан 10-11 ёшли қизлар орасида 33 килограмм вазн тоифасида Лолагул Тозабоева иккинчи, 12-13 ёшли қизлар ўртасида 45 килограмм вазн тоифасида Ҳилола Турсунбоева биринчи ўринни, 43 килограм вазн тоифасида Кумушой Отажонова иккинчи ўринни, 14-15 ёшли қизлар ўртасида 50 килограмм вазн тоифасида Севинчой Нуримбетова учинчи ўринни эгаллаб, чемпионат шоҳсупасига кўтарилдилар. Ёруғ юз билан қайтган Ўзбекистон чемпионати ғолиб ва совриндорлари 23 февраль куни туман Болалар-ўсмирлар спорт мактабида тантанали кутиб олинди.
Совриндорлар шарафига спорт мактабида тантанали йиғилиш бўлиб ўтди. Тантанада туман Жисмоний тарбия ва спорт бўлими бошлиғи Ғуломжон Қурбонбоев, мактаб директори Чоршам Тожимуродовлар спортчи қизларни қизғин қутлаб, келгусида ҳам муваффақиятлар ёр бўлишини тиладилар.
Албатта, ҳар қандай ютуқ – меҳнат маҳсули. Шуғулланувчи қизларни шу даражага етказган мураббийлар хизмати ҳам алоҳида эътироф этилди.
Шундан кейин тадбир спортчи қизлар таълим олаётган 69-сонли умумий ўрта таълим мактабида давом этди. Барча ўқитувчилар, ўқувчилар уларни куй-қўшиқлар садоси остида, олқишлар билан қарши олдилар.
Мактаб директори Дилшод Бобониёзов ғолибларни қизғин қутлаб, мураббийларига, ота-оналарига чуқур миннатдорчилик билдирди. Устозлар, дўстлар табрикларидан қувонган чемпионат ғолиби ва совриндорлари келгусида бундан-да нуфузли мусобақаларда туманимиз спорт шарафини муносиб ҳимоя қилишга сўз бердилар.
Спортчиларга кўрсатилган ҳурмат-эҳтиром кўпгина ўқувчилар кўнглида ҳавас, спорт билан шуғулланишга рағбат уйғотди.

О.РАЖАБОВА.