VOLEYBOL BOʻYIChA OʻSMIRLAR OʻRTASIDA MUSOBAQA OʻTKAZILDI

Bugungi kunda yosh avlodning jismoniy tarbiya va sport bilan shugʻullanishiga ulkan gʻamxoʻrliklar qilinmoqda, zamon talablariga mos shart-sharoitlar yaratilmoqda. Ularning sport turlari bilan muntazam shugʻullanishi orqali oʻz irodasi, kuchi, imkoniyatlariga boʻlgan ishonchini oshirish, mardlik, vatanparvarlik tuygʻularini shakllantirish, yoshlar orasidan iqtidorlilarini saralab olish ishlari tizimli ravishda olib borilmoqda. Barcha hududlarda yoshlar orasida sport turlari boʻyicha turli musobaqalar oʻtkazilib, gʻoliblar moddiy-maʼnaviy ragʻbatlantirilishi yoʻlga qoʻyilgani ham sport ommaviyligiga erishishda muhim omil boʻlayotir.

Bu borada tumanimizda ham muayyan saʼy-harakatlar amalga oshirilayapti. Xususan joriy yilning 8-fevral kuni tumanimiz umumtaʼlim muassasalari oʻquvchilarining 2005-2006-yillarda tugʻilgan oʻsmirlar va qizlar oʻrtasida sportning voleybol turidan Oʻzbekiston «Yoshlik» jismoniy tarbiya va sport jamiyatining tuman hududiy boʻlinmasi birinchiligi oʻtkazildi. Musobaqa tuman Xalq taʼlimi boʻlimi hamda tuman Jismoniy tarbiya va sport boʻlimi bilan hamkorlikda oʻtkazildi.

Musobaqani tuman Jismoniy tarbiya va sport boʻlimi boshligʻi Gʻulomjon Qurbonboyev ochib berdi va oʻquvchilarga omad tiladi.

Musobaqa qizlar oʻrtasida 16-sonli umumiy oʻrta taʼlim muassasasining, oʻgʻil bolalar oʻrtasida esa 30-sonli umumiy oʻrta taʼlim muassasasining sport zalida oʻtkazildi. Musobaqada jami 252 nafar oʻquvchilar ishtirok qildilar. Shundan 126 nafari qizlardir.

Musobaqa qizgʻin kurashlar ostida oʻtdi. Axir kim ham musobaqa gʻolibi boʻlishni, tengdoshlaridan kuchli ekanligini isbotlashni istamaydi, deysiz. Voleybol sport musobaqasining Nizomida belgilanganidek, har bir jamoa 9 nafar oʻgʻil va qizlar, jami 18 nafar oʻquvchilardan iborat boʻldi. Jamoalar oʻzaro kuch sinashib, oʻz epchilliklari va chaqqonliklarini, abjirliklarini namoyish etdilar. Oʻquvchilar biri-biridan ortda qolmaslikka intilib, gʻoliblik uchun harakat qildilar. Musobaqa yakunida qizlar oʻrtasida 1-oʻrinni 6-sonli umumtaʼlim maktabi oʻquvchilari jamoasi, 2-oʻrinni 19-sonli umumtaʼlim maktabi oʻquvchilar jamoasi va 3-oʻrinni esa 41-sonli umumtaʼlim maktabi oʻquvchilar jamoasi, oʻsmirlar oʻrtasida 1-oʻrinni 5-sonli umumtaʼlim maktabi oʻquvchilari jamoasi, 2-oʻrinni 6-sonli umumtaʼlim maktabi oʻquvchilari jamoasi va 3-oʻrinni esa 67-sonli umumtaʼlim maktabi oʻquvchilari jamoalari egalladilar. 1-oʻrinni egallagan 5-, 6-sonli umumtaʼlim maktabi oʻquvchilari jamoalari musobaqaning Qoraqalpogʻiston Respublikasi bosqichiga yoʻllanma oldilar.

Voleybol sport musobaqasining tuman bosqichida gʻolib boʻlgan sportchi oʻquvchilar Oʻzbekiston «Yoshlik» jismoniy tarbiya va sport jamiyatining Amudaryo tumani hududiy boʻlinmasi tomonidan diplom va esdalik sovgʻalari bilan taqdirlandilar. Oʻziga xos sport bayrami tusini olgan musobaqa barcha ishtirokchilarda ulkan taassurotlar qoldirdi, gʻoliblik uchun muntazam mashgʻulotlar olib borish, oʻz kuchiga ishonch tuygʻusini uygʻotdi.

Biz musobaqaning keyingi bosqichiga yoʻl olgan jamoalarga gʻoliblik sharafi nasib etaversin, deya tilab qolamiz.

O.RAJABOVA.