ВОЛЕЙБОЛ БЎЙИЧА ЎСМИРЛАР ЎРТАСИДА МУСОБАҚА ЎТКАЗИЛДИ
Бугунги кунда ёш авлоднинг жисмоний тарбия ва спорт билан шуғулланишига улкан ғамхўрликлар қилинмоқда, замон талабларига мос шарт-шароитлар яратилмоқда. Уларнинг спорт турлари билан мунтазам шуғулланиши орқали ўз иродаси, кучи, имкониятларига бўлган ишончини ошириш, мардлик, ватанпарварлик туйғуларини шакллантириш, ёшлар орасидан иқтидорлиларини саралаб олиш ишлари тизимли равишда олиб борилмоқда. Барча ҳудудларда ёшлар орасида спорт турлари бўйича турли мусобақалар ўтказилиб, ғолиблар моддий-маънавий рағбатлантирилиши йўлга қўйилгани ҳам спорт оммавийлигига эришишда муҳим омил бўлаётир.
Бу борада туманимизда ҳам муайян саъй-ҳаракатлар амалга оширилаяпти. Хусусан жорий йилнинг 8 февраль куни туманимиз умумтаълим муассасалари ўқувчиларининг 2005-2006 йилларда туғилган ўсмирлар ва қизлар ўртасида спортнинг волейбол туридан Ўзбекистон «Ёшлик» жисмоний тарбия ва спорт жамиятининг туман ҳудудий бўлинмаси биринчилиги ўтказилди. Мусобақа туман Халқ таълими бўлими ҳамда туман Жисмоний тарбия ва спорт бўлими билан ҳамкорликда ўтказилди.
Мусобақани туман Жисмоний тарбия ва спорт бўлими бошлиғи Ғуломжон Қурбонбоев очиб берди ва ўқувчиларга омад тилади.
Мусобақа қизлар ўртасида 16-сонли умумий ўрта таълим муассасасининг, ўғил болалар ўртасида эса 30-сонли умумий ўрта таълим муассасасининг спорт залида ўтказилди. Мусобақада жами 252 нафар ўқувчилар иштирок қилдилар. Шундан 126 нафари қизлардир.
Мусобақа қизғин курашлар остида ўтди. Ахир ким ҳам мусобақа ғолиби бўлишни, тенгдошларидан кучли эканлигини исботлашни истамайди, дейсиз. Волейбол спорт мусобақасининг Низомида белгиланганидек, ҳар бир жамоа 9 нафар ўғил ва қизлар, жами 18 нафар ўқувчилардан иборат бўлди. Жамоалар ўзаро куч синашиб, ўз эпчилликлари ва чаққонликларини, абжирликларини намойиш этдилар. Ўқувчилар бири-биридан ортда қолмасликка интилиб, ғолиблик учун ҳаракат қилдилар. Мусобақа якунида қизлар ўртасида 1-ўринни 6-сонли умумтаълим мактаби ўқувчилари жамоаси, 2-ўринни 19-сонли умумтаълим мактаби ўқувчилар жамоаси ва 3-ўринни эса 41-сонли умумтаълим мактаби ўқувчилар жамоаси, ўсмирлар ўртасида 1-ўринни 5-сонли умумтаълим мактаби ўқувчилари жамоаси, 2-ўринни 6-сонли умумтаълим мактаби ўқувчилари жамоаси ва 3-ўринни эса 67-сонли умумтаълим мактаби ўқувчилари жамоалари эгалладилар. 1-ўринни эгаллаган 5-, 6-сонли умумтаълим мактаби ўқувчилари жамоалари мусобақанинг Қорақалпоғистон Республикаси босқичига йўлланма олдилар.
Волейбол спорт мусобақасининг туман босқичида ғолиб бўлган спортчи ўқувчилар Ўзбекистон «Ёшлик» жисмоний тарбия ва спорт жамиятининг Амударё тумани ҳудудий бўлинмаси томонидан диплом ва эсдалик совғалари билан тақдирландилар. Ўзига хос спорт байрами тусини олган мусобақа барча иштирокчиларда улкан таассуротлар қолдирди, ғолиблик учун мунтазам машғулотлар олиб бориш, ўз кучига ишонч туйғусини уйғотди.
Биз мусобақанинг кейинги босқичига йўл олган жамоаларга ғолиблик шарафи насиб этаверсин, дея тилаб қоламиз.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
