“SALOMATLIK KUNI” TADBIRLARI AHOLINING TIBBIY SAVODXONLIGINI OShIRDI

Koronavirus pandemiyasiga chalingan koʻplab fuqarolarning hayotdan bevaqt koʻz yumganligi yurtimiz aholisining sogʻligʻi, jismoniy yetukligi past darajada  ekanligini koʻrsatganini inobatga olib, mamlakatimiz Prezidenti 2020-yilning 30-oktyabrida “Sogʻlom turmush tarzini keng targʻib etish va ommmaviy sportni yanada rivojlantirish chora-tadbirlari toʻgʻrisida”gi qarorini qabul qilgan edi.

Qarorda zararli odatlardan voz kechib, ommaviy sport bilan doimiy shugʻullanish, toʻgʻri ovqatlanish tamoyillariga amal qilish, tarkibida tuz, qand, yogʻ miqdori koʻp boʻlgan hamda xamirli taom va shirinliklarni, non mahsulotlarini meʼyoridan ortiq isteʼmol qilmaslik, sogʻlom turmush tarzini kundalik hayotga aylantirish lozimligi taʼkidlangan edi. Boisi, shu orqali har bir fuqaroda turli kasalliklarga qarshi immun tizimi paydo boʻladi.

Shuningdek, aholi orasida sogʻlom turmush tarzini keng targʻib etish, tiklash va reabilitatsiya ishlari hamda  ommaviy jismoniy faollik tadbirlarini tizimli va samarali tashkil etish yuzasidan tegishli sohalar masʼullariga ulkan vazifalar yuklangan edi.

Ushbu vazifalar ijrosini taʼminlash yuzasida tuman Tibbiyot birlashmasida ham koʻpgina chora-tadbirlar amalga oshirilmoqda. Xususan, shu yilning  30-oktyabrida shanba – “Salomatlik kuni” munosabati bilan oʻtkazilgan tadbirlar bunga misol boʻla oladi.

Salomatlik kuni tadbirlari Tibbiyot birlashmasi maʼmuriy binosi oldidagi maydonchada gimnastika va faol yurish mashqlari bilan boshlandi. Birlashmada mehnat qiladigan turli yoshdagi xodimlarning gimnastika mashqlarini bajarishlari, faol yurishi deyarli qiyinchilik tugʻdirmadi. Negaki tibbiyot xodimlari jismoniy faollik samaralarini chuqur his qilishadi va hayotda sogʻlom yashashga intilishadi.

Shundan soʻng tibbiyot xodimlari tajribali shifokor va patronaj hamshiralar uchta guruhga boʻlinib, sogʻlom yashash tamoyillarini amaliy usulda namoyish qilib berdilar.

Birinchi – sogʻlom ovqatlanish guruhi aʼzolari Mangʻit shahridagi “Afroʻza” kafesida Navoiy nomli mahalla fuqarolar yigʻini maʼsullari va faollariga sogʻlom ovqlanish qoidalari, toʻgʻri ovqatlanish tushunchasi haqida maʼlumotlar berdilar. Bir kunda bir odam yoshi, jinsi, mehnat faoliyati turidan kelib chiqib, isteʼmol qilishi mumkin boʻlgan oziq-ovqat miqdori va sarflanadigan energiya mosligi haqida koʻrgazmali ravishda tushuntirildi.

Ikkinchi guruh aʼzolari esa mahalla hududidagi sunʼiy qoplamali mini futbol maydonchasida mahalla aholisi ishtirokida “Otam, onam va men – sportchi!” shiori ostida sport musobaqalarini oʻtkazishdi.

Uchinchi guruh aʼzolari Navoiy nomli mahalla masʼullari va faollari ishtirokida mahalladagi xonadonlarda sanitariya-gigiyena qoidalariga amal qilinishini koʻzdan kechirdilar. Oilada har kimning shaxsiy gigiyena qoidalariga rioya qilish, qoʻl yuvish tartibi, oshxonani ozod saqlash qoidalari aholiga koʻrgazmali ravishda tushuntirildi.

Salomatlik kuni tadbirlari davomida aholi oʻzlariga zarur koʻpgina tibbiy bilimlarga ega boʻldilar.

Hayotda odamning baxtiyor va emin-erkin yashashi koʻp jihatdan uning salomatligiga bogʻliq. Jismoniy faollik – sogʻlom boʻlish shartlaridan biri ekanligi Salomatlik kunida keng targʻib qilindi.

Oygul RAJABOVA.