“SPORTNI SEV, SPORT BILAN YaShA!” ShIORI OSTIDA YIL DAVOMIDA SPORT FESTIVALI OʻTKAZILADI

Mamlakatimizda sihat-salomatlikning muhim garovi boʻlmish jismoniy tarbiya va sportga alohida eʼtibor qaratilmoqda. Barcha hududlarda sport – sogʻlomlashtirish inshootlari bunyod etish, aholini jismoniy faollikka jalb etish uchun turli musobaqalar tashkillashtirib, gʻoliblarni ragʻbatlantirib borish boʻyicha koʻpgina chora-tadbirlar amalga oshirilmoqda.

Butun yurtimiz boʻylab shu yilning 10-yanvaridan boshlab dekabrigacha “Sportni sev, sport bilan yasha!” shiori ostida sportning mini-futbol, basketbol, voleybol, badminton, stol tennisi hamda shaxmat-shashka turlari boʻyicha sport musobaqalari oʻtkazilmoqda.

Festival tarzidagi musobaqalar mahalla-tuman-hudud miqyosida tashkil etilgan.

Barcha bosqichlarning gʻoliblari esa mamlakatimiz poytaxtida yirik sport arenalarida boʻlib  oʻtadigan final musobaqasida ishtirok etish huquqini qoʻlga kiritadi. Ushbu sport festivalida 7 yoshdan 70 yoshgacha barcha sportsevar yurtdoshlarimiz ishtirok etishi mumkin.

Mangʻit shahridagi 16-sonli maktab sport zalida ham tumanimiz mahallalarida voleybol boʻyicha hududlar orasida “Sportni sev, sport bilan yasha!” shiori ostida oʻtkazilgan saralash musobaqalarida gʻolib boʻlgan yigitlar oʻrtasi final bellashuvlari boʻlib oʻtdi. Bungacha oʻtkazilgan quyi bosqichlarda  11 ta hududdan yaʼni Bobur, Toʻlqin, Kuyuk koʻpir, Toshyop, Boyovul, Qangli, Qilichboy ovullari yigitlaridan iborat jamoalar, qizlar oʻrtasida esa Xitoy, Toʻlqin, Qipchoq, Bobur ovullari jamoasi gʻoliblikni qoʻlga kiritib, tuman bosqichi finaliga yoʻllanma olishgan edi.

Musobaqa finalida yigitlar jamoalari 16-sonli maktab sport zalida oʻzaro kuch sinashishdi.

Shunisi eʼtiborliki, bu yerda ishtirokchilar uchun barcha sharoitlar yaratildi. Navbat kutayotgan jamoalar bellashuvga chiqqan jamoalar oʻyinlarini bemalol kuzatib, oʻzlariga kerakli xulosalar olib oʻtirishdi.

Qizgʻin bellashuvlar bilan oʻtgan musobaqa yakunlariga koʻra, Kuyuk koʻpir ovuli voleybolchi yigitlari faxrli birinchi oʻrinni, Qangli ovuli yigitlari ikkinchi, Bobur ovuli yigitlari esa uchinchi oʻrinlarni yengib  oldilar.

Ushbu musobaqaning ayollar oʻrtasidagi bahslari 82-sonli maktab sport zalida boʻlib oʻtdi. Bu yerda 4 ta hudud – Xitoy, Toʻlqin, Qipchoq va Bobur ovullarining voleybolchi qizlar jamoalari oʻzaro kuch sinashdilar.

Sportchilarda shunday ibora bor: kim mahoratli, kuchli boʻlsa, gʻalaba shuniki boʻladi. Darvoqe, toʻrtta jamoalar voleybolchi qizlari oʻrtasida gʻoyat shiddat bilan kechgan bahslarda ham oʻzlarining  mahoratini, salohiyatini namoyish etgan Bobur nomli ovul qizlari birinchi, Xitoy ovuli qizlari ikkinchi, Toʻlqin ovuli qizlari uchinchi oʻrinlarni egalladilar.

Bellashuvlar yakuniga yetgach, 16-sonli maktab sport zalida musobaqada qatnashgan barcha voleybolchilar ishtirokida gʻoliblarni taqdirlash marosimi boʻlib oʻtdi. Faxrli  oʻrinlarni egallagan jamoalarga Oʻzbekiston Respublikasi Milliy gvardiyasi Qoraqalpogʻiston Respublikasi Qoʻriqlash boshqarmasi 1-Alohida otryadi komandiri, mayor Baxtiyor Otajonov diplom topshirdi. Ular 30-31-yanvar kunlari Qoraqalpogʻiston Respublikasi gʻolibligi uchun oʻtkaziladigan bosqichda ishtirok etish huquqini ham qoʻlga kiritishdi.

“Sportni sev, sport bilan yasha!” Yil davomida shu shior ostida oʻtkaziladigan sport musobaqalari hali koʻplab iqtidorli sportchilarni kashf etadi. Aslida musobaqalarni oʻtkazishdan koʻzlangan maqsad ham shu.

O.RAJABOVA.