“СПОРТНИ СЕВ, СПОРТ БИЛАН ЯША!” ШИОРИ ОСТИДА ЙИЛ ДАВОМИДА СПОРТ ФЕСТИВАЛИ ЎТКАЗИЛАДИ

Мамлакатимизда сиҳат-саломатликнинг муҳим гарови бўлмиш жисмоний тарбия ва спортга алоҳида эътибор қаратилмоқда. Барча ҳудудларда спорт – соғломлаштириш иншоотлари бунёд этиш, аҳолини жисмоний фаолликка жалб этиш учун турли мусобақалар ташкиллаштириб, ғолибларни рағбатлантириб бориш бўйича кўпгина чора-тадбирлар амалга оширилмоқда.

Бутун юртимиз бўйлаб шу йилнинг 10 январидан бошлаб декабригача “Спортни сев, спорт билан яша!” шиори остида спортнинг мини-футбол, баскетбол, волейбол, бадминтон, стол тенниси ҳамда шахмат-шашка турлари бўйича спорт мусобақалари ўтказилмоқда.

Фестивал тарзидаги мусобақалар маҳалла-туман-ҳудуд миқёсида ташкил этилган.

Барча босқичларнинг ғолиблари эса мамлакатимиз пойтахтида йирик спорт ареналарида бўлиб  ўтадиган финал мусобақасида иштирок этиш ҳуқуқини қўлга киритади. Ушбу спорт фестивалида 7 ёшдан 70 ёшгача барча спортсевар юртдошларимиз иштирок этиши мумкин.

Манғит шаҳридаги 16-сонли мактаб спорт залида ҳам туманимиз маҳаллаларида волейбол бўйича ҳудудлар орасида “Спортни сев, спорт билан яша!” шиори остида ўтказилган саралаш мусобақаларида ғолиб бўлган йигитлар ўртаси финал беллашувлари бўлиб ўтди. Бунгача ўтказилган қуйи босқичларда  11 та ҳудуддан яъни Бобур, Тўлқин, Куюк кўпир, Тошёп, Бойовул, Қангли, Қиличбой овуллари йигитларидан иборат жамоалар, қизлар ўртасида эса Хитой, Тўлқин, Қипчоқ, Бобур овуллари жамоаси ғолибликни қўлга киритиб, туман босқичи финалига йўлланма олишган эди.

Мусобақа финалида йигитлар жамоалари 16-сонли мактаб спорт залида ўзаро куч синашишди.

Шуниси эътиборлики, бу ерда иштирокчилар учун барча шароитлар яратилди. Навбат кутаётган жамоалар беллашувга чиққан жамоалар ўйинларини бемалол кузатиб, ўзларига керакли хулосалар олиб ўтиришди.

Қизғин беллашувлар билан ўтган мусобақа якунларига кўра, Куюк кўпир овули волейболчи йигитлари фахрли биринчи ўринни, Қангли овули йигитлари иккинчи, Бобур овули йигитлари эса учинчи ўринларни енгиб  олдилар.

Ушбу мусобақанинг аёллар ўртасидаги баҳслари 82-сонли мактаб спорт залида бўлиб ўтди. Бу ерда 4 та ҳудуд – Хитой, Тўлқин, Қипчоқ ва Бобур овулларининг волейболчи қизлар жамоалари ўзаро куч синашдилар.

Спортчиларда шундай ибора бор: ким маҳоратли, кучли бўлса, ғалаба шуники бўлади. Дарвоқе, тўртта жамоалар волейболчи қизлари ўртасида ғоят шиддат билан кечган баҳсларда ҳам ўзларининг  маҳоратини, салоҳиятини намойиш этган Бобур номли овул қизлари биринчи, Хитой овули қизлари иккинчи, Тўлқин овули қизлари учинчи ўринларни эгалладилар.

Беллашувлар якунига етгач, 16-сонли мактаб спорт залида мусобақада қатнашган барча волейболчилар иштирокида ғолибларни тақдирлаш маросими бўлиб ўтди. Фахрли  ўринларни эгаллаган жамоаларга Ўзбекистон Республикаси Миллий гвардияси Қорақалпоғистон Республикаси Қўриқлаш бошқармаси 1-Алоҳида отряди командири, майор Бахтиёр Отажонов диплом топширди. Улар 30-31 январь кунлари Қорақалпоғистон Республикаси ғолиблиги учун ўтказиладиган босқичда иштирок этиш ҳуқуқини ҳам қўлга киритишди.

“Спортни сев, спорт билан яша!” Йил давомида шу шиор остида ўтказиладиган спорт мусобақалари ҳали кўплаб иқтидорли спортчиларни кашф этади. Аслида мусобақаларни ўтказишдан кўзланган мақсад ҳам шу.

О.РАЖАБОВА.