SUV TEJOVChI TEXNOLOGIYaLARNI JORIY QILISh BOʻYIChA KOʻRGAZMALI SEMINAR-KENGASh BOʻLIB OʻTDI

Mamlakatimizda suv resurslariga boʻlgan talab tobora ortib borayotgani inobatga olinib, undan tejamli va samarali foydalanish asosida sugʻoriladigan maydonlardan olinadigan hosil miqdorini oshirish, oziq-ovqat mahsulotlari ishlab chiqarish hajmini kengaytirish, sifatini yaxshilash hamda ichki bozorning  toʻkinligini taʼminlash orqali aholi turmush darajasini yaxshilash borasida izchil islohotlar olib borilayapti.

Butun respublikamizda boʻlgani kabi tumanimizda ham sugʻorish yoʻllari bosqichma-bosqich tozalanib, gidrotexnik inshootlar oʻz vaqtida taʼmirlanmoqda, suvni koʻp talab qiluvchi ekinlar oʻrniga yangi intensiv bogʻlar barpo etilayotir. Natijada suvni tezkor boshqarish, isteʼmolchilarga oʻz vaqtida yetkazib berish taʼminlanmoqda, suv isrofiga barham berilayotir.

Shuningdek, suv tejovchi texnologiyalarning keng joriy etilishi ham keyingi yillarda har uch-toʻrt yilda bir marta takrorlanayotgan suv tanqisligini  yumshatishga hissa boʻlib qoʻshilmoqda. Bunga egatga plyonka toʻshab sugʻorish, oʻqariqlar oʻrniga egiluvchan quvurlardan foydalanish, tomchilatib sugʻorish usullari kiradi.

17-yanvar kuni tumanimizning “Xizr eli” mahallasida faoliyat yuritayotgan “Rajabov-Omonboy” fermer xoʻjaligi dalasida tomchilatib sugʻorish texnologiyasining afzalligini targʻib etish, joriy qishloq xoʻjaligi yilida ushbu texnologiyadan foydalanish evaziga suv taqchilligining oldini olish mavzusida koʻrgazmali seminar-kengash boʻlib oʻtdi.

Tadbirga tumanimizdagi muqobil mashina-traktor parklari, fermer xoʻjaliklari raislari, qishloq xoʻjaligi sohasi mutaxassislari ishtirok etdilar.

“Rajabov Omonboy” fermer xoʻjaligi - koʻp tarmoqli xoʻjalik hisoblanadi. Joriy yilda xoʻjalikning 45 gektar yeriga paxta ekish va shuning 30 gektariga tomchilatib sugʻorish texnologiyasini oʻrnatish rejalashtirilgan.

Koʻrgazmali seminar-kengashda ishtirok etgan Qoraqalpogʻiston Respublikasi Qishloq xoʻjaligi vaziri Alisher Yoqubov, Qoraqalpogʻiston Respublikasi suv xoʻjaligi vazirining oʻrinbosari Aloviddin Mamadkarimov, Oʻzbekiston Respublikasi qishloq xoʻjaligi vazirligining shartnoma boʻlimi xodimi Bekturdi Quvvaqov, tuman hokimi oʻrinbosari Fayzulla Saʼdullayevlar tumanimizda 2021-yilda ekin maydonlarda suv tejovchi tomchilatib sugʻorish usulini keng joriy etish, bundan kutiladigan ijobiy natijalar xususida batafsil tushuntirdilar va ushbu usulni qoʻllash amaliyoti bilan tanishtirdilar.

Shunisi eʼtiborliki, joriy yilda tumanimizning 2 ming 860 gektar ekin maydonini tomchilatib sugʻorish usulida sugʻorish rejalashtirilmoqda va buning uchun fermer xoʻjaliklari raislari tomchilatib sugʻorish texnologiyasini oʻrnatish boʻyicha pudratchi tashkilotlar bilan shartnoma tuzgan.

Koʻrgazmali seminar-kengashda bu borada amalga oshirilishi lozim boʻlgan chora-tadbirlar atroflicha tushuntirildi. Muqobil mashina-traktor parklari mutaxassislari, fermer xoʻjaliklari raislari mavzu yuzasidan masʼullarga oʻzlarini qiziqtirgan savollarni berib, atroflicha javoblar oldilar.

Oygul RAJABOVA.