“GULZOR” MAHALLASIDA HUQUQBUZARLIKLARNING OLDINI OLIShGA BAGʻIShLANGAN YIGʻILISh OʻTKAZILDI

2020-yil 24-dekabr kuni Mangʻit shahridagi “Gulzor” mahalla fuqarolar yigʻinida Qoraqapogʻiston Respublikasida jinoyatlarni jilovlash, jinoyatchilik profilaktikasini yanada takomillashtirish, odil sudlovni taʼminlash va korruptsiyadan xoli hududga aylantirish mavzusiga bagʻishlangan yigʻilish boʻlib oʻtdi.

Yigʻilishda Jinoiy ishlar boʻyicha tuman sudi raisi Sultonmurod Davletmurodov, tuman prokurori Javlonbek Muftullayev, tuman Ichki ishlar boʻlimi boshligʻi Ulugʻbek Xudoyberganov, “Gulzor” mahalla fuqarolar yigʻini profilaktika inspektori, shu bilan birga mazkur mahalla fuqarolar yigʻini faollari, bir guruh yoshlar ishtirok etdilar.

Yigʻilish qoʻlbola usulda tayyorlangan spirtli ichimliklar oldi-sotdisi bilan shugʻullanish jinoyatini sodir etgan shaxsning qilmishlariga oid videorolik namoyish etilib, Jinoyat ishlari boʻyicha tuman sudi raisi Sultonmurod Davletmurodov ushbu videorolikda koʻrsatilgan jinoyatni sodir qilgan shaxsga nisbatan Oʻzbekiston Respublikasi Jinoyat Kodeksining tegishli moddasiga koʻra ayb qoʻyilib, 2020-yilning 24-sentyabr kuni sud hukmi bilan tegishli jazoga tortilgani toʻgʻrisida maʼlumot berdi.

Sultonmurod Davletmurodov, mazkur jinoyatning ijtimoiy xavflilik darajasi va xususiyatini eʼtiborga olib, ushbu shaxsga nisbatan belgilangan jazo choralari haqida batafsil toʻxtaldi. Bundan tashqari, mamlakatimizda odil sudlovni amalga oshirishda qoʻllanilayotgan kechirimlilik va yengillik berish choralari xususida tushunchalar berdi.

Tuman prokurori Javlonbek Muftullayev jinoyatchilik ahvoli, huquqbuzarliklar sodir etilishining sabab va shart-sharoitlari, jinoyatlarni fosh etish va aybdor shaxslarni javobgarlikka tortish boʻyicha maxsus telekoʻrsatuv tashkil etish hamda fuqarolarni huquqbuzarliklar profilaktikasi va jinoyatchilikka qarshi kurashishga chaqiruvchi videorolik tayyorlab, Amudaryo televideniyesi orqali muntazam ravishda yoritib borishni tashkillashtirish, jamiyatimizda sogʻlom maʼnaviy muhit yaratilishida muhim ahamiyat kasb etishini taʼkidladi. Shu bilan birga “Gulzor” mahalla fuqarolar yigʻini aholi vakillariga ushbu yigʻilish jarayonida  namoyish etilgan videorolikdagi spirtli ichimliklarning noqonuniy oldi-sotdisi bilan shugʻullangan shaxsga nisbatan qonunchiligimizga koʻra, ozodlikdan mahrum qilish jazosi tayinlanishi mumkinligi, lekin ayblanuvchi  yashaydigan mahalla raisi tomonidan berilgan kafolat xatiga asosan uni ozodlikdan mahrum qilish bilan bogʻliq boʻlmagan, yaʼni, 5-yil muddatga ozodlikni cheklash jazosi tayinlanganini aytib oʻtdi. Shuningdek,  milliy qonunchiligimizdagi oʻzgarishlar va yangiliklar xususida gapirib, jinoyatchilikning oldini olishda barchani birdamlikka chaqirdi.

Yigʻilishda tuman Ichki ishlar boʻlimi boshligʻi Ulugʻbek Xudoyberganov ham soʻzga chiqib, Oʻzbekiston Respublikasi Jinoyat Kodeksining tegishli moddalariga koʻra, qoʻlbola usulda tayyorlangan spirtli ichimliklar oldi-sotdisi bilan shugʻullanish jinoyatini sodir etgan shaxsga  nisbatan ozodlikdan mahrum qilish bilan bogʻliq  jazo tayinlanishi mumkinligini taʼkidladi.

Bundan tashqari, Gulzor mahallasi faollari ham soʻzga chiqib, fuqarolar oʻrtasida jinoyatchilik va huquqbuzarliklarning oldini olish boʻyicha profilaktika inspektorlari bilan hamkorlikda fuqarolar ham mahallada jinoyatchilikning oldini olishga hissa qoʻshishi lozimligini taʼkidladi.

Yigʻilishda “Gulzor” mahalla fuqarolar yigʻini profilaktika inspektori tumanimizda sodir boʻlayotgan huquqbuzarliklar boʻyicha tegishli xulosalar chiqarib, bunday holatlarning oldini olish boʻyicha mahalla faollari bilan birgalikda aholi oʻrtasida targʻibot ishlarini keng yoʻlga qoʻyish va yuqoridagi kabi jinoyat va huquqbuzarliklar boʻlmasligi uchun bir yoqadan bosh chiqarib ish olib borish kerakligi toʻgʻrisida toʻxtaldi.

Robiya YOʻLDOShEVA.