Masʼuliyat – muvaffakiyat garovidir

2014-yil 14-aprel kuni Doʻrman qishloq xoʻjalik kasb-hunar kollejida tuman prokurori F.Allaberganov milliy xavfsizlik xizmati xodimi hamda prokuror katta yordamchisi Rasul Xolmurodov, tuman xotin-qizlar qoʻmitasi raisi M.Ahmedovalar bilan uchrashuv oʻtkazildi. Shu kuni ular kollej oʻquvchi-yoshlariga 10 ta kompyuter sovgʻa qildilar.

Tuman prokurori F.Allaberganov"Taʼlim toʻgʻrisida”gi Qonunning 3-moddasiga toʻxtalib, 12 yillik taʼlimning uzluksizligi, izchilligi, shuningdek umumiy oʻrta va oʻrta maxsus taʼlimning majburiy va bepul taʼlim ekanligi haqida oʻquvchilarga tushuncha berdi.

Tadbirda Oʻzbekiston Respublikasi Maʼmuriy javobgarlik toʻgʻrisidagi Kodeksining 47-moddasiga muvofiq "Bolalarning majburiy umumiy oʻrta taʼlim, oʻrta maxsus kasb-hunar taʼlim olishlariga ota-onalar yoki ularning oʻrnini bosuvchi shaxslar tomonidan toʻsqinlik qilishi eng kam ish haqi hisobida jarima solish” jazosi bilan jazolanishi kollejda taʼlim olayotgan oʻgʻil-qizi bor ota-onalar zimmasiga oʻta jiddiy masʼuliyat yuklashi haqida oʻquvchi-yoshlarga tushuntirishlar berildi. Tadbirda ishtirok etgan ota-onalar tuman prokurori F.Allaberganovga oʻzlarini qiziqtirgan savollar bilan murojaat qildilar va qoniqarli javoblar olib, mamnun boʻldilar.

Bugungi oʻquvchi-yoshlar – yurtimizning ertangi kuni egalari. Ularning har jihatdan yetuk va bilimdon inson boʻlib voyaga yetishlari uchun esa mamlakatimizda zarur qonuniy asoslar yaratilgan. Bas, shunday ekan, aziz ota-onalar, farzandlaringiz oʻz vaqtida taʼlim olishlari uchun befarq boʻlmang. Ularga imkon qadar sharoit yaratib bering. Masʼuliyatingizni his qiling. Farzandingiz yurt kelajagi, demak, sizning ham kelajagingiz. Farzand sizning ishonchingiz, tayanchingiz, kerak boʻlsa, gʻururingiz ekanligini unutmang. Masʼuliyat – barcha muvaffaqiyatlar garovidir.

X.Davletova,

Doʻrman qishloq xoʻjalik kasb-hunar kolleji huquqiy maslahatchisi.