HOSILNI YoNGʻINDAN ASRAYLIK!

Ayni damlarda tumanimizda paxta yigʻim-terimiga tayyorgarlik ishlari qizgʻin olib borilmoqda. Yigʻim-terim davrida yongʻin xavfining oldini olish alohida ahamiyat kasb etadi.

Shu bois, barcha fermer xoʻjaliklarida paxta xirmonlari, paxta quritish oʻrinlari suv xavzalari yoki suv hovuzlari mavjud boʻlgan joylarga yaqin boʻlishi taʼminlandi. Yetishtirilgan hosilni paxta qabul qilish shoxobchalariga eltishda alohida eʼtibor va masʼuliyat zarur. Traktor tirkamalariga ortilgan paxta ustiga sholcha yoki brezent yopilishi kerak, aks holda yongʻin kelib chiqishi mumkin. Paxta qabul qilish punktlarida va paxta dalalarida chekish, ochiq olovdan foydalanish hamda paxta hosilini yoʻl chetlarida quritish qatʼiyan maʼn qilinadi. Xirmon joylar, yoʻl boʻylari hamda paxta qabul qilish shoxobchalari «Paxtani olovdan asraylik!», «Chekilmasin!», «Olovdan foydalanish maʼn qilinadi!» kabi pannolar va birlamchi yongʻin oʻchirish vositalari bilan toʻliq taʼminlanishi zarur.

«Amudaryo paxta tozalash» ochiq aktsiyadorlik jamiyati hamda unga qarashli paxta qabul qilish shoxobchalarida paxta hosilini qabul qilishga tayyorgarlik ishlari nihoyasiga yetib, dastlabki hosilni qabul qilish ishlari boshlandi. «Amudaryo paxta tozalash» ochiq aktsiyadorlik jamiyati hamda unga qarashli shoxobchalar yongʻinga qarshi birlamchi yongʻin oʻchirish vositalari bilan toʻliq taʼminlangan. «Paxta – 2020» yigʻim-terim mavsumiga yordamga kelgan hasharchilarning yashash joylarida yongʻin xavfsizligi choralari koʻrildi va tartib-qoidalar toʻgʻrisida suhbatlar oʻtkazilib, yoʻriqnomalar berildi. Paxta qabul qilish shoxobchalarida koʻngilli yongʻin oʻchirish guruhlari tuzilib, guruh aʼzolariga tegishli vazifalar yuklatildi, shu bilan birga Mangʻit shahar 3-son Kasbiylashtirilgan yongʻin-qutqaruv qismi xizmatchilari va 2 ta jangovar ekipajlari, «Amudaryo paxta tozalash» ochiq aktsiyadorlik jamiyatining koʻngilli yongʻin oʻchirish guruhi va 1 ta jangovar ekipaji bilan paxta tozalash zavodida va paxta qabul qilish shoxobchalarida yongʻin oʻchirish amaliy mashqlari oʻtkazildi.

Qadrli yurtdoshlar! Bu yilgi «Paxta – 2020» yigʻim-terim mavsumida faol qatnashish bilan birga, yongʻin xavfsizligi boʻlinmasi xodimlarining tavsiyalarini oʻz vaqtida bajarib, milliy boyligimiz – paxta hosilini yongʻindan asrashga oʻz hissamizni qoʻshaylik.

A.YuSUPOV,

tuman FVB mutaxassisi katta serjant.