FHDYo organida bir kun

Kundalik hayotimizda oʻz turmush tarzimiz bilan bogʻliq muammolarimiz yuzasidan turli idora va tashkilotlarga murojaat qilamiz. Qaysi maqomdagi idora yoki tashkilot boʻlishidan qatʼiy nazar, yaqin-yaqinlargacha rahbarlar huzuriga kirish, arz-hol aytish anchayin mushkul boʻlganini hammamiz yaxshi bilamiz. Qogʻozbozlik, ertaga kel, indinga kel, qabilidagi ortga siltashlar xalqimizni qanchalar ovorai-sarson qilganini eslasak, bugungi rahbar bilan kechagi rahbarning maʼnaviy saviyasi biri-biridan keskin farq qilishini anglash qiyin emas.

Darvoqe, rahbar maʼnaviyati uning muomalasidan tortib, jamiyat ichida oʻzini tutishi-yu, oʻzi rahbarlik qilayotgan idora yoki tashkilotning xalq bilan qanchalik yaqinligida namoyon boʻladi. Bekorga Prezidentimiz “Xalq davlat idoralariga emas, balki davlat idoralari xalqimizga xizmat qilishi kerak”, degan tamoyilni barcha boʻgʻindagi rahbarlar uchun xalq bilan ishlashishning asosiy mezoni sifatida kun tartibiga aylantirmadilar. Bugun quyidan yuqorigacha barcha toifadagi rahbar xodimlar xalq oʻz muammolari bilan huzuriga kelishini kutib oʻtirganlari yoʻq, balki ularning taklif va muammolarini bevosita xalq ichiga kirib borib, joyida hal etishmoqda. Tuman FHDYo boʻlimining bir kunlik faoliyati bilan tanishganimizda buning yaqqol guvohi boʻldik.

Joriy yilning 9-iyul sanasida FHDYo boʻlimi xodimlari tomonidan amalga oshirilishi rejalashtirilgan ishlar yuzasidan ertalabki besh daqiqalik suhbatda barcha xodimlar jam boʻlishib, karantin qoidalariga qatʼiy amal qilgan holda, ertalabki soat 9 dan ishga kirishdilar. Fuqarolarni qabul qilishda ham har bir kishi karantin qoidalariga boʻysunishi lozimligi tushuntirildi. Shu kungi rejaga koʻra, Vasiylik va homiylik organi vakili boquvchisiz yoki qarovsiz qolgan bolalarga tugʻilganlik haqidagi hujjatlarni rasmiylashtirish yuzasidan FHDYo boʻlimiga kelib, tumanning turli hududlarida yashovchi, lekin tugʻilganligi haqidagi guvohnomasini olmagan bolalar boʻyicha zarur maslahatlar oldi.

Toryop mahalla fuqarolar yigʻini maʼmuriyati tomonidan koʻrsatilgan ijtimoiy yordam tufayli ushbu hududda yashovchi fuqarolar Bazarbayev Yergʻaliy Jubatxanovich va Muhayyo Tursunboyevalarning 2017-yil, 2-mart kuni tugʻilgan va vaqtida tugʻilishi qayd etilmagan qiz farzandiga tugʻilganlik haqida guvohnoma hamda ushbu er-xotinning qonuniy nikohi qayd qilinib, nikoh tuzilganligi haqidagi guvohnomalari topshirildi.

Bu ishlar FHDYo boʻlimi ofisida amalga oshirilgan boʻlsa, shu kunning oʻzida FHDYo boʻlimi mudirasi Sanobar Xolboyeva Amir Temur nomli ovulda istiqomat qiluvchi fuqaro Shamshed Berdiboyevaga taalluqli ish yuzasidan fuqarolik ishlari boʻyicha tuman sudida ishtirok etib, oʻz fikr-mulohazalarini bildirdi.

Uning ish kuni tushlikka yaqin Oʻrta qalʼa ovulidagi xonadonlardan birida davom etdi. Tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova hamda Oʻrta qalʼa OFY raisining oila, xotin-qizlar va ijtimoiy-maʼnaviy masalalar boʻyicha oʻrinbosari F.Qurbonovalar bilan hamkorlikda bir oilaning ajrashib ketishining oldini olishga muvaffaq boʻlishdi. Ikki yoshning oʻzaro kelishmovchiligiga barham berildi.

Xalq orasiga kirib borib, muammolarini joyida hal etish borasidagi ishlar izchil davom ettirildi. S.Xolboyeva mahallalardagi kam taʼminlangan oilalarga kirib bordi. Xususan, Mangʻit shahrining Chordara mahallasida istiqomat qiluvchi ikki nafar voyaga yetmagan yosh bolalari bor yolgʻiz ona Intizor Qurbonboyevaning muammolarini oʻrgandi va kundalik oziq-ovqat mahsulotlarini xayriya sifatida topshirdi.

FHDYo boʻlimi tomonidan xalqqa xizmat koʻrsatish sifatini yanada yaxshilash, muammolarini joylariga chiqib oʻrganish va ijobiy hal etishga qaratilgan bu kabi ishlar salmogʻi juda keng qamrovli boʻlib, har bir fuqaroning murojaatiga alohida eʼtibor va hurmat nazari bilan qaraladi. Soʻnggi yillarda aholiga tezkor va sifatli huquqiy xizmatlarni taqdim etish maqsadida FHDYo xodimlari arxiv hujjatlarini raqamlashtirish boʻyicha ish olib borishmoqda.

– Hozirgi kunda FHDYo boʻlimi arxivida 1935-yildan to bugungi kungacha boʻlgan arxiv maʼlumotlari, yaʼni tugʻilganlik, nikoh, oʻlim va nikohdan ajralganlik haqidagi dalolatnoma yozuvlari saqlanmoqda, – deydi boʻlim mudirasi Sanobar Xolboyeva. – 2014-yilga qadar 233 mingga yaqin turli toifadagi hujjatlar raqamlashtirilib, yagona elektron FHDYo arxiviga kiritildi. Bu jami arxiv hujjatlarining 70 foizini tashkil etadi.

FHDYo boʻlimi xodimlarining bir kunlik ish jarayoni bilan tanisharkanmiz, bugungi FHDYo organlari tom maʼnoda xalqqa tezkor va sifatli, shu bilan birga samarali xizmat koʻrsatayotganiga guvoh boʻldik.

Robiya YOʻLDOShEVA.