Joriy yilning 7 oyi davomida tuman FHDYo boʻlimi tomonidan 2666 ta tugʻilganlik holati qayd etildi

Maʼlumki, Oʻzbekiston Respublikasi Prezidentining 2020-yil 18-fevral kungi “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi Farmoni bilan 2020-yil 1-apreldan boshlab fuqarolik holati dalolatnomalarini yozish organlari Adliya vazirligi tasarrufiga oʻtkazilgan edi.

Oʻtgan qisqa vaqt mobaynida Amudaryo tumani Fuqarolik holati dalolatnomalarini yozish boʻlimida barcha qogʻoz hujjatlar raqamlashtirilib, tugʻilish, nikoh, ajrim, oʻlim holatlarini qayd qilish va boshqa qogʻoz hujjatlar elektron bazaga kiritildi.

Ayni paytda boʻlimda fuqarolarga samarali xizmat koʻrsatilmoqda. Boʻlim xodimlari ovul va mahallalarga chiqqan holda, sayyor ravishda ham fuqarolarning murojaatlarini oʻrganib, huquqiy maslahatlar berish, amaliy yordamlar koʻrsatish maqsadida muntazam ravishda uchrashuvlar tashkil etib kelmoqda. Ushbu uchrashuvlar, koʻrsatilayotgan huquqiy xizmatlar aholiga juda katta qulaylik yaratmoqda va huquqiy bilimlarini oshirishda muhim ahamiyat kasb etmoqda.

Joriy yilning 7 oyi davomida boʻlim tomonidan 2666 ta tugʻilganlik holati qayd etilgan boʻlsa, shundan oʻgʻil bolalar 1388 nafar, qiz bolalar 1278 nafarni tashkil qildi. Ushbu davr mobaynida 849ta nikoh qayd etilgan boʻlib, shundan 108tasi tantanali tarzda qayd etilgan. Nikohdan ajralish holati esa 97ta boʻlib, shundan 14tasi oʻz arizasi asosida Fuqarolik holati dalolatnomalarini yozish boʻlimida, 83tasi sud qaroriga koʻra amalga oshirilgan. 7 oy davomida 678 ta oʻlim holati qayd etilgan.

Hozirgi paytda mamlakatimiz boʻylab Fuqarolik holati dalolatnomalarini yozish boʻlimlarida Vazirlar Mahkamasining 2022-yil 28-sentyabr kungi “Fuqarolik holati dalolatnomalarini yozish tartiblarini yanada takomillashtirish chora-tadbirlari toʻgʻrisida”gi Qarorida koʻrsatilgan tartibda xizmat koʻrsatish yoʻlga qoʻyilmoqda. Qarorga muvofiq, tugʻilganlikni tibbiyot muassasalari orqali fuqarolik holati dalolatnomalarini yozish boʻlimlarida qayd etish tartibi 2023-yil 1-yanvardan Toshkent shahrida boshlangan boʻlsa, shu yil 1-iyundan butun respublika hududida joriy etila boshlandi.

Endilikda tugʻilganlik holati Fuqarolik holati dalolatnomalarini yozish boʻlimlarida qayd qilinganligi haqida tibbiyot muassasalari tomonidan QR-kod tasviri tushirilgan maʼlumotnoma beriladi. Ushbu maʼlumotnoma tugʻilganlik haqidagi gerbli guvohnomaga tenglashtiriladi. Mazkur maʼlumotnomani davlat organlari va tashkilotlari tomonidan qabul qilishni rad etish taqiqlanadi.

Shuningdek, qarorda nikoh tuzish va nikohdan ajratishni qayd etish uchun arizalarni Sirdaryo viloyatida Davlat xizmatlari markazlari orqali qabul qilish boʻyicha huquqiy eksperiment oʻtkazilishi, huquqiy eksperiment 2022-yil 1-noyabrdan 2023-yil 1-iyulgacha amalga oshirilishi koʻrsatilgan edi. Shunga koʻra, qaror bilan nikoh tuzish va nikohdan ajratishni qayd etish uchun davlat xizmatlari markazlari orqali arizalar qabul qilish tartibi toʻgʻrisidagi vaqtinchalik maʼmuriy reglament tasdiqlandi. Nikohga kirish haqida ariza berilganda nikohlanuvchi shaxslarning yashash joyidagi mahalla fuqarolar yigʻinini xabardor qilish tartibi bekor qilindi.

Undan tashqari, endilikda nikohdan ajratish haqida ariza berilganda er-xotinni yarashtirish boʻyicha tegishli choralar koʻrish uchun er-xotin yashash joyidagi tuman oila va xotin-qizlar boʻlimlariga elektron axborot tizimi orqali xabar berish tartibi yoʻlga qoʻyiladi. Fuqarolar familiya, ism va ota ismini oʻzgartirishda tekshiruv oʻtkazish uchun fuqarolik holati dalolatnomalarini yozish boʻlimlari tomonidan “Fuqarolik holati dalolatnomalarini yozish yagona elektron arxivi” axborot tizimi orqali ichki ishlar organlariga soʻrovnoma yuborish va xulosa olish tartibi ham joriy qilinadi.

Tizim orqali amalga oshirilayotgan, fuqarolarga yaratilayotgan qulayliklardan yana biri bu – tugʻilganlik haqidagi guvohnoma shakllantirilayotganda shu vaqtning oʻzida bolani doimiy yashaydigan manziliga roʻyxatga va Maktabgacha taʼlim tashkilotiga navbatga qoʻyishdir. Bundan tashqari, bir martalik beriladigan nafaqa puliga roʻyxatga qoʻyish ham shu vaqtning oʻzida amalga oshirilmoqda.

Fuqarolik holati dalolatnomalarini yozish organlari faoliyatida eksterritorial tamoyilning yoʻlga qoʻyilgani fuqarolarga yanada qulay boʻlmoqda. Fuqarolar doimiy yoki vaqtincha roʻyxatdan oʻtgan joyidan va yuridik shaxslarning pochta manzili, yaʼni joylashgan yeridan qatʼiy nazar, istalgan hududda Fuqarolik holati dalolatnomalarini yozish idoralariga murojaat qilish imkoniyatidan foydalanishmoqda. Bu esa aholi va tadbirkorlarni ortiqcha vaqt hamda mablagʻ sarflashdan xalos qilayotgani bilan nihoyatda ahamiyatlidir.

O.Xudoyberganova.