Koronavirus pandemiyasi bilan bogʻliq epidemiologik vaziyat yuzasidan Amudaryo tumani hokimi S.Yoʻldashevning tuman aholisiga MUPOJAATI

Assalomu alaykum, hurmatli yurtdoshlar!

Bugungi kunda butun dunyo aholisini tashvishga solayotgan koronavirus pandemiyasiga qarshi kurashish, kasallik tarqalishining oldini olish maqsadida koʻplab chora-tadbirlar amalga oshirilmoqda.

Ushbu kasallik dunyo boʻyicha shu kungacha 12 milliondan ortiq odamda qayd qilinib, yarim milliondan koʻproq kishining oʻlimiga sababchi boʻldi. 10-iyul holatiga mamlakatimiz boʻyicha 11 ming 723 nafar kishi ushbu kasallikka chalinib, 52 nafar yurtdoshimiz vafot etdi.

Afsuski, Amudaryo tumanida ham koronavirus bilan kasallanish holatlari qayd etildi. Shu sababli tumanimiz 2020-yil 8-iyul sanasidan boshlab karantin darajasi boʻyicha “Qizil” toifaga oʻtkazildi.  Qolaversa, Pespublika maxsus komissiyasi qarori bilan 10-iyuldan 1-avgustga qadar respublika boʻyicha qator karantin cheklovlari joriy etildi.

Kasallik keng tarqalishining oldini olish maqsadida Amudaryo tumanida ham qator ishlar amalga oshirilmoqda. Jumladan, shu kunga qadar tuman boʻyicha 3853 nafar fuqarolar tibbiy kuzatuvga olingan. Shundan 291 nafari chet davlatlardan, 3562 nafari esa Toshkent shahri va boshqa viloyatlardan kelgan fuqarolar hisoblanadi. Tibbiy kuzatuvga olingan shaxslarning 3516 nafari bugungi kunda 14 kunlik karantindan chiqarilgan. Hozirda jami 337 nafar shaxs tibbiy kuzatuvda qolmoqda.

Kasallikka qarshi kurashish maqsadida tumanda maxsus himoya kiyimlari, dezinfektsiyalovchi moddalar va vositalar zaxirasi yetarli miqdorda yaratilgan. Tegishli soha xodimlari kuchaytirilgan tartibda ishga jalb etilib, barcha xududlarda profilaktik dezinfektsiya ishlari olib borilmoqda.

Tashkil etilgan ishchi guruh otryadlari tomonidan har kuni Dexqon bozori va savdo yarmarkalari, ovul va mahalla fuqarolar yigʻinlari hududidagi umumjamoat joylari, oziq-ovqat, maishiy xizmat obʼektlari, koʻp qavatli uylar va bolalar maydonchalari, xizmat koʻrsatuvchi tashkilot va karxonalarda dezinfektsiya tadbirlari amalga oshirilmoqda. Tuman xududiga kirib keluvchi yoʻllarda 3 ta postlar tashkil etilib, avtotransport vasitalarini avtomatik dezinfektsiya qilish ishlari olib borilmoqda.

Muntazam ravishda tuman sanitariya-epidemiologik osoyishtalik markazi, Ichki ishlar boʻlimi, Milliy gvardiya xodimlari bilan hamkorlikda karantin qoidalari boʻyicha tushuntirish-targʻibot ishlari davom ettirilmoqda.

Shu oʻrinda aytib oʻtmoqchimizki, har birimiz oʻzimiz va oila aʼzolarimiz salomatligi uchun qaygʻurishimiz, oʻz hayotimizni asrashga oʻzimiz masʼul ekanimizni unutmasligimiz lozim. Muhtaram Prezidentimiz taʼkidlaganlaridek, bu boradagi ishlarni “Temir intizom” asosida davom ettirishimiz kerak.

Aziz yurtdoshlar!

Shuni unutmangki, karantin talablariga rioya qilmaslik, ruxsat berilgan vaqtdan tashqari koʻchada va jamoat joylarida boʻlish, avtotransport vositalarini boshqarish tegishli tartibda maʼmuriy javobgarlikka sabab boʻladi!

Shunday ekan, hayotiy zarur ehtiyoj boʻlmasa, koʻchaga chiqmang! Niqob taqishni, qoʻlingizni tez-tez sovunlab yuvishni unutmang! Boshqalar bilan muloqot qilganda ijtimoiy masofani saqlang! Kasallikning dastlabki belgilari sezilgan zahoti “Tez yordam”ga murojaat qiling!

Fursatdan foydalanib, barchangizga sabr-toqat, mustahkam sogʻlik tilayman!

Hurmat bilan, S.Yoʻldashev - Amudaryo tumani hokimi.