OʻRMONZORLARDA YoNGʻIN ChIQIShINING OLDI OLINMOQDA

Xalqimiz salomatligi, aholi istiqomat qiladigan hududlarning ekologik tozaligi koʻp jihatdan mamlakatimizdagi yashil hududlarning barqaror rivojlanishiga, bioxilma-xillikka bogʻliq. Mamlakatimizdagi yashil hududlar – oʻrmonlarni asrab-avaylash, har bir tup daraxtning sogʻlom, xavf-xatardan, ayniqsa, yongʻin balosidan xoli oʻsib-rivojlanishini taʼminlash oʻrmonzorlarning tabiiy ravishda koʻpayishiga imkon yaratadi. Shu bois, oʻrmonzorlarni asrab-avaylash, kengaytirish, yongʻin chiqishining oldini olish bilan bogʻliq tadbirlarga alohida eʼtibor bilan qaraladi. Bu borada tumanimizdagi yirik Qipchoq davlat oʻrmon xoʻjaligi xodimlari tomonidan tizimli ishlar olib borilmoqda.

Oʻzbekiston Respublikasi “Oʻrmon toʻgʻrisida”gi Qonunining  23-moddasiga muvofiq tuman hokimining Qipchoq davlat oʻrmon xoʻjaligining oʻrmon bilan qoplangan hududida yongʻin xavfsizligi mavsumini talofatsiz oʻtkazish toʻgʻrisidagi qaroriga koʻra, oʻrmon xoʻjaligi bilan chegaradosh hududlarda yashovchi aholi, mashina-traktor parklari, korxona va tashkilotlar, ovul va mahalla masʼullari oʻrtasida doimiy ravishda tushuntirish-targʻibot ishlari olib borilayotgani bois, soʻnggi yillarda xoʻjalik hududidagi oʻrmonzorlarda yongʻin chiqishi bilan bogʻliq noxush holatlar kuzatilmadi.

Qipchoq davlat oʻrmon xoʻjaligi hududi bilan chegaradosh Nazarxon, Toʻlqin, Qipchoq ovullari hamda Beshtom, Daryoboʻyi mahallalari aholisi, MTPlar, fermer va dehqon xoʻjaliklari rahbarlari bilan oʻtkazilayotgan uchrashuvlar, tushuntirish-targʻibot tadbirlariga huquqshunoslar, tuman yongʻin xavfsizligi boshqarmasi mutaxassislari ham jalb etilib, yongʻin chiqishiga sababchi boʻlgan shaxslar uchun qanday jazolar qoʻllanilishi boʻyicha keng tushunchalar berib borilmoqda.

Bundan tashqari, Qipchoq davlat oʻrmon xoʻjaligi maʼmuriyati tomonidan oʻrmonzorlarda tabiiy va texnogen turdagi favqulodda vaziyatlarda oʻrmon yongʻinining oldini olish va oqibatlarini bataraf etish boʻyicha dastur-reja ishlab chiqilib, ushbu dastur-rejaga asosan oʻrmon bilan chegaradosh hududlardagi MTPlar, idora-tashkilotlarning texnika vositalarini boshqaruvchi xodimlari, OFY va MFY aholi vakillari hamda oʻrmon xoʻjaligi xodimlaridan iborat shaxsiy tarkib tuzilgan boʻlib, xoʻjalik maʼmuriy binosida doimiy navbatchilik tashkil etilgan.

Oʻrmon bilan qoplangan ikkita yirik oʻrmon boʻlimida va barcha aylanmalardagi yongʻin xavfsizligi yoʻlaklari tozalanib, yoʻlaklar boʻylaridagi yongʻinga qarshi vositalar doimiy tayyor holatga keltirib qoʻyilgan. Aylanmalarda yongʻin oʻchirish asbob uskunalari, xususan, belkuraklar, ketmon,  panshaxa, har biri 20 litrlik, suvga toʻldirilgan idishlar, zamonaviy daraxt kesish asbob-anjomlari va boshqa zarur buyumlar taxt qilib qoʻyilgan.

Hozir ayni jazirama yoz payti. Erta bahorda unib chiqqan choʻl va dasht giyohlari allaqachon qurib-qovjirab qolgan. Shunday vaziyatda salgina qaltis harakat yoki salgina uchqun tufayli yongʻin chiqish xavfi mavjud. Shu bois, xoʻjalik mutaxassislari yongʻin chiqishining oldini olish borasidagi saʼy-harakatlarni yanada kengaytirib, joylarda kuzatuv tadbirlarini olib borishmoqda.

Shuni unutmasligimiz kerakki, musaffo havo bilan taʼminlashga xizmat qiluvchi yashil hududlarning xavfsizligini taʼminlash, yongʻindan asrab-avaylash har birimizning burchimizdir.

Maqsud NUREKEYeV, Qipchoq davlat oʻrmon xoʻjaligi boshligʻi.