MAMLAKATIMIZDA KEKSA AVLOD VAKILLARI DOIMO EʼZOZDA

Inson yoshi ulgʻaygan sari hayotga muhabbati ortarkan. Hayotni sevish, har kuni qandaydir ezgu ishni amalga oshirishga intilish tuygʻusi, nazarimda har bir keksa insonga xos xislat boʻlsa kerak. Ayniqsa, bugungiday dorulomon kunlar shukuhi insonning qalbida joʻshqinlik uygʻotadi. Koʻngil nimalarni istamaydi, deysiz? Koʻngil hech qachon qarimaydi, deganlari ham shu-da! Doim mehnat, yaratish quchogʻida yashagan inson nafaqaga chiqib, uy odami boʻlib qolishi anchayin zerikarli. Xudoga shukur, men nafaqada boʻlsam-da, oʻzim uchun qiziqarli, gashtli mashgʻulotlar bilan bandman. Baʼzilarga oʻxshab televizor qarshisiga mixlanib qolganim yoʻq. Televizor tomosha qilishning ham mavridi bor. Nevaralarim bilan tomorqada, bogʻ-rogʻda mehnat qilish juda yoqimli. Ayniqsa, mamlakatimizda biz keksa avlod vakillariga koʻrsatilayotgan hurmat va eʼtiborning cheki-chegarasi yoʻq. Pensiyamizni vaqtida yetkazib berishayapti. Sal xastalansak, patronaj shifokor va hamshiralar parvona. Sihatgohlarda davolanib, salomatligimizni mustahkamlashimiz uchun sharoitlar yetarli. Oʻzbekistondagi bir necha sogʻlomlashtirish maskanlari keksalar uchun doimo ochiq.

Mana yaqinda, 2020-yilning 20-may sanasida biz keksalarni qoʻllab-quvvatlash maqsadida yana bir muhim hukumat qarori qabul qilindi. Oʻzbekiston Respublikasi Vazirlar Mahkamasining “Keksalarni davlat tomonidan qoʻllab-quvvatlash tizimini yanada takomillashtirishning qoʻshimcha chora-tadbirlari toʻgʻrisida”gi Qarori va ushbu Qarorga  muvofiq ishlab chiqilib, amaliyotga tatbiq etilayotgan chora-tadbirlar Dasturi biz keksa avlod vakillarini yanada ruhlantirdi. Unga koʻra, keksalarni qoʻllab-quvvatlash va sogʻlomlashtirish, keksalar va faxriylarning ijtimoiy faolligini oshirishga  qaratilgan tadbirlarni amalga oshirish koʻzda tutilgan. Ayniqsa, fuqarolar yigʻinlarida keksa avlod vakillariga koʻmak beruvchi “Nuroniylar eʼzozimizda” koʻngilli patronaj yoshlar guruhi tashkil etilishi, har bir keksa va faxriy holidan xabar olinishi, yoshlar bilan nuroniylarning suhbatlarini oʻtkazish, ular uchun “Ehtirom, eʼzoz, eʼtibor” kontsert dasturlarini tashkil qilib, har yili noyabr oyida “Keksalar haftaligini oʻtkazish” boʻyicha chora-tadbirlar ishlab chiqilishi mamlakatimizda keksa avlod vakillariga koʻrsatilayotgan beqiyos gʻamxoʻrlikning ifodasidir.

Shuni mamnuniyat bilan qayd etishni istardimki, biz keksa avlod vakillariga nisbatan bu kabi mehr va gʻamxoʻrlik avvallari, toʻgʻrisi, bunchalik boʻlgan emas. Pensiyalarimizni vaqtida ololmasdan, qanchalar sargardon boʻlardik. Ijtimoiy faolligimiz borasida umuman hech qanday amaliy tadbir boʻlmasdi. Soʻnggi  yillarda keksalarning ijtimoiy faolligini oshirishga qaratilgan koʻplab chora-tadbirlar amalga oshirildi. Yuqoridagi Qaror bilan esa bu kabi chora-tadbirlar miqyosi yanada kengaytirilishi belgilab qoʻyildi. Har bir mahalla guzarida keksalarning dam olishi, jismoniy tarbiya va sport bilan shugʻullanishlari, mumtoz musiqa asarlarini tinglab, orom olishlari uchun sharoitlar yaratish, ularning qiziqishlari boʻyicha muloqot klublari tashkil etish, “Har kuni 5 ming qadam” shiori ostida piyoda yurish mashgʻulotlarini oʻtkazish biz keksalar sogʻligi, joʻshqin hayot tarzi uchun oʻta muhim ahamiyat kasb etadi. Qaror bilan endilikda keksalar uchun mamlakat boʻylab imtiyozli va maroqli sayohatlar tashkil etish koʻzda tutilgani qalbimizga quvonch bagʻishladi.

Dunyoning qaysidir puchmoqlarida uysiz, vatansiz, mehrga zor yashayotgan keksalar borligini televizor orqali deyarli har kuni koʻrib, bilib turibmiz. Qaydadir notinch, urushlar girdobida azob chekayotgan keksalar bor. Nonga, hatto bir qultum suvga zor, yelkasini yopmoq uchun kiyimga zor keksalar.., birgina tunni tinch oʻtkazishni Allohdan iltijo qilib soʻrayotgan keksalar... juda koʻp dunyoda. Lekin bizning oromga chulgʻangan diyorimizda biz keksalar uchun koʻrsatilayotgan eʼzoz, eʼtibor, ragʻbat va gʻamxoʻrlikning cheki-chegarasi yoʻq. “Keksalarni davlat tomonidan qoʻllab-quvvatlash tizimini yanada takomillashtirishning qoʻshimcha chora-tadbirlari toʻgʻrisida”gi hukumat Qarori ana shu eʼtibor va gʻamxoʻrlikni yana bir pogʻonaga koʻtardi. Albatta, biz buning qadriga yetishimiz, oʻsib kelayotgan yosh avlod oldidagi burch va masʼuliyatimizni teran his qilgan holda yashashimiz, oʻz hayot tajribalarimiz, maslahatlarimiz bilan yosh avlod qalbida vatanparvarlik, xalqparvarlik, umuminsoniy va maʼnaviy qadriyatlarimizga muhabbat tuygʻularini yanada mustahkamlashga hissa qoʻshishimiz zarur. Chunki oʻtayotgan har bir kunimizda ezgu ishlarimiz aks etib tursa, bu biz keksalarning ona Vatan ravnaqiga maʼnaviy hissamiz boʻladi.

Gulbahor OʻROZOQOVA,
Chordara mahallasi mehnat faxriysi.