IShChI GURUH TOMONIDAN TUMANDAGI FUQAROLAR YIGʻINLARI FAOLIYaTI OʻRGANILDI

Yurtimizda azal-azaldan mahalla institutiga jamiyatning eng asosiy boʻgʻinlaridan biri sifatida qaralib kelinadi. Mahallani ota-bobolarimiz bejizga “Vatan ichra- kichik bir vatan” deb atashmagan. Chunki insonning Vatanga boʻlgan muhabbati, avvalo, oʻz oilasini, soʻngra oʻz mahallasi, qoʻni-qoʻshnilarini sevish, himoya qilish, ularning xizmatiga doimo tayyor turishdan boshlanadi. Inson mahallada unib-oʻsadi, kamol topadi.

Shu sababli ham yildan yilga jamiyatda mahalla institutining nufuzi va ahamiyatini yanada oshirishga, mahallani eng xavfsiz va obod hududga aylantirishga, mahallada yashovchi insonlarning tinch-farovon hayot kechirishlariga katta eʼtibor qaratilib, barcha shart-sharoitlar yaratilmoqda. Mamlakatimizda mahalla va oila instituti faoliyatini yanada takomillashtirish, oilani, ayniqsa, xotin-qizlarni qoʻllab-quvvatlash maqsadida tashkil qilingan Mahalla va oilani qoʻllab-quvvatlash vazirligi va uning joylardagi boʻlinmalari tomonidan samarali ishlar qilinmoqda.

Xususan, joriy yilning 12-may sanasida Qoraqalpogʻiston Respublikasi Mahalla va oilani qoʻllab-quvvatlash vazirining birinchi oʻrinbosari Maryam Ahmedova boshchiligidagi ishchi guruh tumanimizga fuqarolar yigʻinlari masʼul xodimlari faoliyatini oʻrganish va  ularga uslubiy-amaliy koʻmaklashish maqsadida tashrif buyurdi.

Masʼullar 3 ta kichik guruhlarga boʻlingan holda oʻrganish ishlarini olib bordilar. Xususan, Qoraqalpogʻiston Respublikasi Mahalla va oilani qoʻllab-quvvatlash vazirligi huquq-tartibot masalalari boʻyicha boʻlim boshligʻi Yemjar Mamutov va Amudaryo tumani Mahalla va oilani qoʻllab-quvvatlash boʻlimi obodonlashtirish, tomorqa va tadbirkorlikni rivojlantirish boʻyicha bosh mutaxassisi Otabek Ibragimovlar boshchiligidagi 1-guruh tumanimizdagi Toʻlqin va Choykoʻl ovullari, Qipchoq shaharchasi hamda Daryo boʻyi, Beshtom, Gulzor mahallalarida boʻlib, hududlardagi fuqarolar yigʻinlari masʼul xodimlari faoliyatini oʻrgandilar.

Shuningdek, Qoraqalpogʻiston Respublikasi Mahalla va oilani qoʻllab-quvvatlash vazirligi xotin-qizlarning ijtimoiy-siyosiy faolligini oshirish boʻlimi boshligʻi Yelza Ibraimova hamda tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarovalar ishtirokidagi 2-guruh Oʻrtaqalʼa va Qilichboy ovullari, Durunki, Boyovul, Doʻstlik, Ayoqchi mahallalarining fuqarolar yigʻinlarida oʻrganishni davom ettirdilar.

Qolaversa, Qoraqalpogʻiston Respublikasi Mahalla va oilani qoʻllab-quvvatlash vazirining birinchi oʻrinbosari Maryam Ahmedova hamda tuman Mahalla va oilani qoʻllab-quvvatlash boʻlimi bopshligʻi Alisher Yoʻldoshevlar ishtirokidagi 3-guruh ham tumandagi ovul va mahalla fuqarolar yigʻinlarida boʻlib, hududlarda soha masʼullari tomonidan olib borilayotgan ishlar bilan yaqindan tanishdilar. Jumladan, mutasaddi rahbarlar tumandagi Kuyukkoʻpir va Bobur ovullari, shuningdek, Qizilcholi va Arnaboʻyi mahallalaridagi fuqarolar yigʻinlari masʼullarining ish faoliyatini yaqinda oʻrganishdi hamda soha yuzasidan oʻzlarining taklif va tavsiyalarini berdilar.

Ishchi guruh vakillari dastlab tumanimizdagi mahallalar fuqarolar yigʻinlari joylashgan binolarning ahvoli, xonalari,  kompyuter jamlanmalari, telefon tarmogʻi, mebel va inventarlar bilan taʼminlanganligi, binoning fasadi, koridorlari, xonalarining koʻrgazmali materiallar bilan taʼminlanganligi va ularning sifati bilan yaqindan tanishdilar.

Soʻngra  fuqarolar yigʻinining asosiy faoliyat yoʻnalishlari boʻyicha komissiyalari, jamoatchilik tuzilmalarining shakllantirilganligi, ularning sifat tarkibi, fuqarolar yigʻinida mahalliy sharoitga mos “Yoʻl xaritasi”ning ishlab chiqilganligi, rais va uning oʻrinbosarlarining oylik, haftalik va kunlik ish rejalari mavjudligi, murojaatlar bilan ishlash holati ishchi guruh tomonidan oʻrganildi.

Oʻrganishlar natijasida aniqlangan xato va kamchiliklar yuzasidan mahalla fuqarolar yigʻini raisi va xodimlariga tegishli koʻrsatmalar va tavsiyalar berildi. Ishchi guruh aʼzolari mahallada yashovchi keksalar, kam taʼminlangan, ehtiyojmand, ijtimoiy himoyaga muhtoj, boquvchisini yoʻqotgan oilalar bilan ishlash holatini oʻrgandilar. Aholining oilaviy sharoiti, muammolari bilan tanishilib, ularga hozirgi karantin davrida amaliy yordam koʻrsatish boʻyicha amalga oshirilayotgan ishlarga ham toʻxtalishdi. Shuningdek, notinch va noqobil oilalar bilan ishlash holati, ogʻir turmush sharoitida yashovchi ayollarning oilaviy ahvolining toʻliq oʻrganilganligi, ogʻir turmushdan chiqarish boʻyicha belgilangan choralar hamda bajarilgan amaliy ishlarga ham alohida eʼtibor qaratildi.

Qolaversa, har bir mahallada “Obod va xavfsiz mahalla” tamoyili asosida olib borilgan ishlar ishchi guruh vakillari eʼtibori markazida boʻldi. Mahallalarning bahorgi mavsumda obodonlashtirish va koʻkalamzorlashtirish holati, oilalarning oʻz tomorqalaridan unumli foydalanish holati bilan tanishildi. Shu bilan birga mahallani eng xavfsiz hududga aylantirish, jinoyat va huquqbuzarliklarning oldini olish boʻyicha amalga oshirilayotgan profilaktik tadbirlar natijalari ham  koʻrib chiqildi. 

Charos Arslonova, tuman hokimligining Axborot xizmati.