Mahalla va oilani qoʻllab-quvvatlash boʻlimi qoshidagi Homiylik xayriyalarini muvofiqlashtirish markazi qanday faoliyat yuritmoqda?

Koronavirus infektsiyasi sababli davom etayotgan karantin davrida tumanimizdagi kam taʼminlangan, yakka-yolgʻiz hamda nogironligi boʻlgan fuqarolarning holidan xabar olish hamda oziq-ovqat xavfsizligini taʼminlash maqsadida tuman Mahalla va oilani qoʻllab-quvvatlash boʻlimi qoshida jamoatchilik asosida Homiylik xayriyalarini muvofiqlashtirish markazi tashkil etilgan edi. Navbatdagi lavhamiz mazkur markazning faoliyati xususida.

Mangʻit shahrining Qilichboy koʻchasida, Bolalar va oʻsmirlar sport maktabi  binosida joylashgan mazkur markaz homiylar bilan doimo gavjum boʻladi. Markazga oʻz faoliyatini amalga oshirishi uchun 2 ta “Damas” rusumli avtotransport vositasi ajratildi hamda Mahalla va oilani qoʻllab-quvvatlash boʻlimi, Yoshlar ittifoqi tuman Kengashi tomonidan koʻngilli volontyorlar biriktirilgan. Ehtiyojmand oilalar bilan muloqot qilish uchun 515 49 29, 515 40 21 telefon raqamlari uzluksiz xizmat koʻrsatmoqda. Markaz ishini yuritishga tuman  Mahalla va oilani qoʻllab-quvvatlash boʻlimi xodimi Madamin Kazakov masʼul qilib biriktirilgan. Yoshlar ittifoqi tuman Kengashi volontyorlari Maqsud Rajapov, Ravshanbek Reyimov, Bekzod Erkayev, Azamat Xidirov, Shuhrat va Hasan Yakubovlar, tuman Xalq taʼlimi boʻlimidan Farhod Jumaboyev, Muzaffar Madaminov, maktabgacha taʼlim boʻlimidan Soatboy Madraimovlar murojaatlarni qabul qilishda hamda mahsulotlarni aholi xonadonlariga yetkazib berishda yaqindan koʻmak berishmoqda. 

Koronavirus pandemiyasi davrida tuman aholisini, birinchi navbatda, yordamga muhtoj boʻlgan oilalarni oziq-ovqat mahsulotlari bilan bepul taʼminlash choralari koʻrilmoqda. Jumladan, dastlab mahallalardagi kam taʼminlangan, ijtimoiy himoyaga muhtoj, nogironligi boʻlgan oilalar, yakka-yolgʻiz keksalar roʻyxati shakllantirilib, ehtiyojmand oilalarga tadbirkorlar va koʻngillilarning xayriyalaridan yigʻilgan oziq-ovqat mahsulotlari tizimli ravishda yetkazib berilmoqda.

Markazga joriy yil 5-may holatiga jami 2223 kilogramm oʻsimlik yogʻi, 22 ming 620 kilogramm un, 1352 kilogramm shakar, 1336 kilogramm makaron, 2808 kilogramm kartoshka, 469 kilogramm piyoz, 1161 kilogramm guruch, 200 kilogramm mosh, 3000 dona tibbiy niqob, 45 ta turli gigiyena vositalari, 2592 kilogramm sabzavot mahsulotlari yigʻildi.

Markaz tomonidan asosan 1197 qisqa raqamiga murojaat qilgan 704 nafar fuqarolardan haqiqatda ehtiyojmand deb topilgan 345 nafariga hamda fuqarolar yigʻini tavsiyasiga asosan yordam koʻrsatildi. Oʻz mahallasiga homiylik qilishni istagan tadbirkorlar hamda markaz hamkorligida Oʻzbekiston mahallasi hududidagi 300 ta oilaga, Durunki mahallasi hududidagi 300 ta oilaga, Oʻrta qalʼa ovuli hududidagi 200 ta oilaga, turli oziq-ovqat mahsulotlari yetkazib berildi.

Shuningdek, 1182 nafar kam taʼminlangan, ijtimoiy himoyaga muhtoj nogironligi boʻlgan, boquvchisini  yoʻqotgan oilalarga 3400 kilogramm olma va 1200 kilogramm uzum mahsulotlari, 113 nafar yakka-yolgʻiz va oʻzgalar parvarishiga muhtoj nogiron keksalarga 336 kilogramm olma va uzum, 226 kilogramm shakar mahsulotlari yetkazib berildi. Hozirgi kunda markazda 870 kilogramm un, 730 litr oʻsimlik yogʻi, 104 kilogramm shakar, 1800 kilogramm sabzi, 65 kilogramm kartoshka mahsulotlar zahirasi mavjud. Bu mahsulotlar ehtiyojmandligi aniqlangan oilalarga yetkazib beriladi.

Mahalla va oilani qoʻllab-quvvatlash boʻlimi qoshida jamoatchilik asosida tashkil qilingan Homiylik xayriyalarini muvofiqlashtirish markazi hamda homiylarning xayriyalari muhtoj oilalarni qoʻllab-quvvatlashda muhim vosita boʻlmoqda.

Oygul RAJABOVA