Saxovatpesha tadbirkorlar tomonidan taqdim etilgan oziq-ovqat mahsulotlari Yangiobod mahallasidagi ehtiyojmand oilalarga tarqatildi

Bagʻrikenglik, saxovatlilik, bir-birovga muruvvatlilik, mehr-oqibat kabi olijanob xislatlar azal-azaldan oʻzbek xalqining qon-qoniga singib ketgan. Ne-ne sinovlarni, ne-ne ogʻir kunlarni yengib oʻtgan metin bardoshli, hokisor xalqimiz illo bugungi butun insoniyatga xavf solib turgan kutilmagan ofat – koronavirus pandemiyasini xam bir-birovga suyanchiq boʻlib, albatta, yengib oʻtadi.

Mana shunday qiyin kunlarda bizning mahallamizning saxovatpesha, olijanob tadbirkorlari  iqtisodiy qiyinchiliklarni boshdan kechirayotgan kam taʼminlangan, boquvchisini yoʻqotgan, nogironligi boʻlgan oilalarga oʻzlarining yordam qoʻllarini choʻzishmoqda.  Yangiobod mahallasida yashovchi tadbirkorlardan Rustam Yusupov, Oybek Kamolov, Ramatulla Yakubov, Hamro Xoʻjayev, yosh tadbirkorlar Oʻktam Ismoilov, Ravshan Ozodov, Gulbarchin Xolboyeva, Nargiza Qutlimurodova kabi saxovatpesha insonlar ayni el boshiga tashvish tushgan sinovli kunlarda ehtiyojmand aholiga yelkadosh boʻlish maqsadida tuman Mahalla va oilani qoʻllab-quvvatlash boʻlimi qoshida tashkil etilgan Homiylik xayriyalarini muvofiqlashtirish markaziga birlamchi oziq-ovqat mahsulotlarini taqdim etishmoqda. Tadbirkorlar tomonidan taqdim etilgan un, yogʻ, goʻsht, makaron, choy, shakar va boshqa oziq-ovqat mahsulotlarini  markaz volontyorlari hamda tegishli masʼullar manzillarga tarqatishmoqda.

20-21-aprel kunlari Yangiobod mahalla fuqarolar yigʻini tomonidan Markazga murojaat qilgan fuqarolarning oilaviy sharoiti oʻrganilib, haqiqiy muhtoj deb topilgan 80 ga yaqin xonadonga birlamchi oziq-ovqat mahsulotlari olib borib berildi. Bu eʼtibor va gʻamxoʻrlikdan mamnun boʻlgan oilalar Prezidentimizga, tadbirkorlarga, tuman mutasaddilariga, mana shunday xayrli ishlarning boshidan turgan barcha insonlarga oʻzlarining minnatdorliklarini izhor etdilar.

Navoiy xazratlarining shunday baytlari bor:

Kimki bir koʻngli buzugʻning xotirin shod aylagʻay,
Oncha borkim Kaʼba vayron oʻlgʻach obod aylagʻay.

Darxaqiqat,insondan yaxshi nom va yaxshi, savobli ishlar meros boʻlib qolar ekan, aziz umrimizni faqat va faqat ezgulikka baxsh etmoq kerak. Hech bir oila, hech bir inson eʼtibordan chetda emasligidan dalolat berguvchi bunday xayrli ishlar tumanimizda uzluksiz davom ettirilmoqda.

Zebo Rajabova, Yangiobod mahalla fuqarolar yigʻini raisi.