“Obod va havfsiz mahalla” shiori ostida seminar tashkil qilindi

Butun mamlaktimizda boʻlgani kabi, tumanimizda ham barcha sohalarning rivojlanishi uchun qabul qilinayotgan qonun hujjatlarining ijrosini taʼminlash yuzasidan keng koʻlamli chora-tadbirlar amalga oshirilmoqda.

Tumanimizdagi Qilichboy ovulida davlatimiz rahbarining “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi Farmoni ijrosini taʼminlash maqsadida namunaviy seminar tashkil qilindi.

Seminarda Qoraqalpogʻiston Pespublikasi Mahalla va oilani qoʻllab quvvatlash vazirligi mutaxassisi Quvonch Tureniyozov, tuman hokimi oʻrinbosari, tuman Mahalla va oilani qoʻllab-quvvatlash boʻlimi boshligʻi Alisher Yoʻldoshev, boʻlim boshligʻining oʻrinbosari Bahodir Boltaboyev  va fuqarolar yigʻini raislari ishtirok etdilar.

Tadbirda taʼkidlanganidek, oʻtgan qisqa davrda aholi muammolarini aniqlash va hal etish boʻyicha “mahalla – sektor – Xalq qabulxonasi – mahalla” tamoyili asosida samarali hamkorlik tizimini joriy etish, mahallani xalq bilan davlat oʻrtasida ishonchli “koʻprik” boʻlishini amalda taʼminlash, oila va xotin-qizlarni qoʻllab-quvvatlash borasida kompleks chora-tadbirlar amalga oshirildi. Mazkur chora-tadbirlar natijasida hududlardagi mavjud muammolar oʻrganilib, bartaraf etildi va aholi uchun farovon turmush tarzi yaratildi. Tadbirkorlikni yoʻlga qoʻyish orqali ishsizlikni bartaraf etib, bandlikni taʼminlash maqsadida aholi uchun keng imkoniyatlar berildi. Kam taʼminlanganlar, yosh oilalar uchun yangidan turar joylar barpo etildi. Nogironlar, yakka-yolgʻiz yashovchi keksalar yashaydigan taʼmirtalab uylar esa taʼmirlab berildi. Hududlarni obodonlashtirish, koʻkalamzorlashtirish boʻyicha ham koʻlamli ishlar bajarildi.

Seminarda ishtirokchilarga Prezidentimizning “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi Farmonining mazmun-mohiyatini xususida tushunchalar berildi. Mazkur Farmon aholi osoyishtaligini taʼminlash, oila va xotin-qizlar bilan ishlash tizimini yangi darajaga olib chiqish, nuroniylar ijtimoiy faolligini oshirish, mahallani jinoyatchilikdan holi hududga aylantirishda fuqarolarning oʻzini oʻzi boshqarish organlari roli va mavqeini yanada mustahkamlashda muhim hujjat boʻlganligi alohida eʼtirof etildi.

“Obod va xavfsiz mahalla” shiori ostida tashkil qilingan mazkur seminarda ishtirokchilar ovul fuqarolar yigʻinida olib borilayotgan obodonlashtirish, bunyodkorlik ishlari bilan tanishib, hududda tadbirkorlik bilan shugʻillanish uchun yaratilgan sharoitlar va imkoniyatlar boʻyicha tadbirkorlar bilan muloqot qilindi. Muloqot davomida tadbirkorlarning muammo va takliflari oʻrganildi.

Shuningdek, fuqarolar yigʻinida “Mahalla – sektor – xalq qabulxonasi – mahalla” hamda  “Xavfsiz mahalla” shiori ostida amalga oshirilayotgan ishlar ham atroflicha oʻrganildi hamda kam taʼminlangan va kambagʻal oilalar bilan ishlash, ularni kambagʻallikdan chiqarish boʻyicha takliflar tinglandi.

Bu kabi seminarlar tumanning Xolimbeg, Durunki, Choykoʻl, Namuna, Tosh qalʼa ovul va mahallalarida ham oʻtkazildi.

Charos Arslonova, tuman hokimining axborot xizmati rahbari.