TAʼLIM BERIB TARBIYaLASh – ZIMMAMIZDAGI MASʼULIYaTLI VAZIFA

Olmazor mahallasida joylashgan 82-sonli umumtaʼlim maktabi oʻtgan oʻquv yilida oʻz faoliyatini boshladi. Oldinlari Gulzor, Olmazor mahalla bolalari 3 ta maktabga boʻlinishib oʻqishar edi. Bu esa ota-onalarga ham, oʻquvchilarga ham ozroq muammo tugʻdirardi. Endilikda bolalar barcha sharoit, qulayliklarga ega boʻlgan yangidan tashkil qilingan ushbu maktabda tahsil olmoqdalar.

Bu maktabda tajribali, yuqori malakali oʻqituvchilar, jumladan biologiyadan Bahodir Doʻsimbetov, matematikadan oliy toifali oʻqituvchi Bobur Yusupov, rus tilidan tajribali fidoiy oʻqituvchi Saʼdulla Matchanovlar oʻquvchilarga sifatli taʼlim-tarbiya berishmoqda. Shuning bilan birga yetuk tajribaga ega  boshlangʻich sinf oʻqituvchilari, kuch-gʻayratga toʻla yosh oʻqituvchilar ham faoliyat olib bormoqdalar.

Bu maskanning tevarak-atrofi obod, inson koʻnglini yayratadi. Manzarali va mevali daraxtlar bilan maktab yanada fayzli.

Biz pedagoglar taʼlim sifatini oshirish borasida ham astoydil harakat qilmoqdamiz. Har bir fan oyligida reja asosida ishlar olib borilmoqda. Jumladan, fevral oyida ham tadbirlar olib borildi. Boshlangʻich sinf oʻqituvchilari matematikadan “Bilimdonlar bellashuvi” deb nomlangan tadbir oʻtkazdilar. Unda 3-4-sinf oʻquvchilari qatnashdilar.

Oʻquvchilar matematikaga doir 5 ta shart asosida oʻzaro bellashdilar. Sheʼriy masala, murakkab tenglamalar, koʻp amalli misollar yechish, boshqotirma yechish, sardorlar bellashuvida oʻquvchilar oʻzaro kuch sinashdi. Bunday tadbirlarda oʻquvchilar bilimli zukko boʻlishni oʻrganish bilan jamoat joylarda oʻzlarini qanday tutishni oʻrganadilar. Maʼnaviy ozuqa oladilar. Odob-axloq qoidalarini ham oʻrganadilar.

Taʼlim berib tarbiyalash, tarbiyalab taʼlim berish biz oʻqituvchilarning vazifamizdir. Shu bois bu yoʻlda biz bor kuch-gʻayratimizni sarflaymiz, masʼuliyatni his qilgan holda zimmamizdagi burchni bajarishga harakat qilamiz.

Nodira Sobirova, 82-sonli maktab oʻqituvchisi.