QORAMON MAHALLASIDA AYoL-QIZLARGA EHTIROM KOʻRSATILDI

Ayol borki, olam munavvar. Ayolning oʻz farzandini oq yuvib, oq tarab, voyaga  yetkazgunicha, oila atalmish qoʻrgʻonning tinch-osoyishtaligini saqlashdagi xizmatlarini hech narsaga tenglashtirib boʻlmaydi. Nozikkina jussasida olamcha qudrat yashiringan ayol yurgan yoʻllardan gullar unadi, uning oʻziga xos saboti, matonati ila nainki xonadoni, balki chor-atrofi ham fayzga toʻladi.

Shu boisdan ham jamiyatimizda ayollarning roli ulkan. Ularning iqtidor va salohiyatini yana ham yuksaltirish maqsadida mamlakatimizda amalga oshirilayotgan ulugʻvor  oʻzgarishlarda faol ishtirokini taʼminlashga eʼtibor tobora kuchaytirilmoqda. Ayniqsa, xalqaro xotin-qizlar kuni bayramida ularga boʻlakcha hurmat-ehtirom koʻrsatiladi, el ardogʻida boʻladi.

Tumanimizning chekka hududida joylashgan Qoramon mahallasida ham ushbu sana qizgʻin nishonlandi. Mahallada oilalar mustahkamligini taʼminlash, azaliy qadriyatlarimiz va urf-odatlarimizning tarbiyaviy ahamiyatini keng targʻib qilishda alohida oʻrnak boʻlayotgan faol ayollar, onaxonlar va tengdoshlariga oʻqishda, ishda namuna boʻlayotgan qizlar mahalla hududidagi “Omon ota” toʻyxonasiga taklif qilindi.

Mahalla fuqarolar yigʻini raisi Murod Abdullayev rahbarligida mahalla hududidagi fermerlar homiyligida tashkil etilgan tadbirda nuroniy onaxonlar, ayol-qizlar uchun toʻkin dasturxon yozildi. Ularning shaʼniga iliq soʻzlar aytilib, sovgʻalar hadya qilindi.

Tadbirda ayol-qizlar bayramiga bagʻishlab namoyish etilgan musiqiy dastur barchaga bayram kayfiyatini hadya etdi. Oʻzlariga koʻrsatilgan eʼtibor va hurmatdan koʻngillari shod boʻlgan ovulning ayol-qizlari shoʻx va diltortar navolar, qoʻshiqlarni miriqib tingladilar, dildan yayrab hordiq chiqardilar.

Bir koʻngil – ming Kaʼba, deydi xalqimiz. Birovning koʻnglini koʻtarmoq esa unchalik mushkul ish emas. Ozgina mehr-eʼtibor, iliq soʻz har qanday oltin-u zardan aʼlo, inson koʻngli mehrdan yuksaladi, oʻzida olamcha qudrat tuyadi va hayotidan mamnunlik his qiladi. Shu boisdan ham bayramlarda nuroniy keksalarimiz, yaqinlarimizning duolarini olishga shoshamiz, ziyorat qilamiz. Yaxshi soʻzlarimiz bilan koʻngillarini ovlab, hayotiy saboq boʻluvchi xotiralarini tinglaymiz.

Mahallada istiqomat qiluvchi 5 nafar kam taʼminlangan oilalar bekalaridan ham tadbirkor Murod Ibragimov bayram bahona xonadonlariga borib xabar oldi va sovgʻalar berdi.

Shuningdek, mahallada sumalak qaynatish marosimi ham oʻtkazildi. Mahallada istiqomat qiluvchi tengdosh, sinfdosh joʻralar Tozaboy, Azamat, Farhod, Dilshod, Oʻtamurod, Otabeklar oilalari bilan birgalashib, har yili bir xonadonda sumalak uchun bugʻdoy undirishadi, uni hamjihatlikda qaynatishadi. Koʻklam kirib kelishini oʻziga xos bayram qilishadi.

Bu yil ham ular bayram oldidan koʻklamning ilk kunida hammani sumalakka chorlashdi. Inoqlikda oʻrnatilgan doshqozonlardagi sumalakni tobiga, maromiga yetguncha qaynatishdi. Birgalikda yangi faslning ilk kunini xursandchilik, shodu-xurramlik bilan qarshi olishdi. Ertasi kuni esa qarindoshlarga, koʻshnilarga hamjihatlikda yetilib pishgan totli sumalaklarni tarqatishdi.

Xullas, koʻklam, ayol-qizlar bayramlariga bagʻishlab oʻtkazilgan tadbir-u tantanalar Qoramon mahallasida yashovchi aholi yodida oʻchmas xotiralar qoldirgan kun boʻldi.

Oygul RAJABOVA.