TAQDIRNING ULUGʻ TUHFASI

Aql-u shuurimizni yoritib turgan nur qaydan? Bu nur qachon vujudimizga mangu bahoriy nafas baxsh etdi? Qay kuni ana shu nur ogʻushida orzuning oydin yoʻllari sari dadil qadam qoʻydik? Qayerda? Albatta, maktabda! Bizga alifbe saboqlarini oʻrgatgan ustoz mehri bilan nurlanadi qalbimiz. Ana shu mehr ogʻushida orzular osmonida parvoz qilamiz, unib-oʻsamiz, hayot sinovlari aro toblanamiz. Bu – ilm-irfon yoʻli!

Nodiraxon ilk harfni tanib, alifbeni oʻrganganida hali maktabga ham chiqmagan edi. 11-sonli umumtaʼlim maktabida oʻzbek tili va adabiyot fani oʻqituvchilari boʻlib ishlovchi ota-onasi Saʼdulla ogʻa va Enajon opa barcha farzandlarini, juda erta ilm yoʻliga boshlagan ustoz boʻldilar. Nodiraxon 1-sinfga qadam qoʻyganida hijjalab oʻqish va yozishni ham oʻrganib olgan edi. Lekin zehni oʻtkir qizaloq aynan ota-onasi kabi til va adabyot yoʻnalishini emas, balki matematika fanini tanladi. 11-sonli maktabning matematika fani oʻqituvchisi (rahmatlik)  Allambergan Qurboniyozov, ayni kundagi maktab direktori, tajribali matematik Zulfiya Yusupovalardan bu fan sirlarini chuqur oʻrganishga kirishdi.

Nodiraning qiziqishlariga befarq boʻlmagan ota-onasi uni Oʻzbekiston Milliy Universiteti qoshidagi S.X.Sirojiddinov nomidagi matematika litseyiga olib borishdi. Test sinovlaridan muvaffaqiyatli oʻtgan Nodiraxon Otajonova 1992-1994-yillarda mazkur oʻquv dargohida tahsil oldi.

– Ustozlarim M.Mirzaahmedov va A.Saidovlardan doimo minnatdorman, –deydi Nodira oʻzini matematika fani sir-sinoatlariga oshno etgan ustozlarini eslarkan. – Ular meni juda avaylashardi, olisdan kelgan, deb hatto menga qoʻshimcha mashgʻulotlar oʻtish uchun ham vaqt ajratishardi.

Litseyni muvaffaqiyatli tugatgan Nodiraxon 1995-1999-yillarda Qoraqalpoq Davlat Universitetining amaliy matematika fakultetida tahsil olib, ushbu ilm dargohini muvaffaqiyatli tugatdi. Mana, 20-yildan oshdiki, u yosh avlodga matematika fanidan saboq berib kelmoqda.

Hayot intiluvchan, fidoyi insonlar uchun haqiqiy maktab va ustozdir. Nodiraxon oʻz faoliyati davomida maktabdan oʻziga ham ilm, ham kuch oldi, ana shu buyuk ustoz taʼlimi tufayli orzular yoʻlida intilishdan sira charchamadi, dadil olgʻa intildi. Bugun esa uning oʻzi koʻplab yoshlarga ustoz – 18-sonli umumtaʼlim maktabining oliy toifali matematika fani oʻqituvchisi.

Nodiraxonning oilaviy hayoti ham havas va hurmatga munosib. Umr yoʻldoshi Erkin Allamberganov ham oliy toifali matematika fani oʻqituvchisi. Ikkalasi bir dargohda, bir maqsad yoʻlida mehnat qilishadi. Biri-biridan aqlli, bilimdon farzandlarni tarbiyalab voyaga yetkazishmoqda.

– Qaynonam Aysha Ismoilova ham faxriy oʻqituvchi, – deydi mehr bilan Nodira. – 18-maktabda ishlab, nafaqaga  chiqqanlar.

Oiladagi oʻzaro mehr-oqibat, goʻzal maʼnaviy muhit farzandlar taʼlim-tarbiyasida ham oʻz ifodasini topgan. Nodiraxon bilan Erkinjonning katta oʻgʻli ham boʻlgʻusi matematika fani oʻqituvchisi, ayni paytda QDU matematika fakulteti talabasi. Yana bir oʻgʻli esa QDU qoshidagi akademik litseyda aniq fanlar yoʻnalishi boʻyicha tahsil olmoqda. Oʻquvchilari, shogirdlari orasida bilimlar bellashuvi, fanlar olimpiadasi gʻoliblari talaygina. Oʻzi bilan yonma-yon ishlayotgan, oʻqituvchilik kasbini tanlagan, mamlakatimizning turli hududlaridagi oʻquv dargohlarida matematika va iqtisodiyot yoʻnalishlarida tahsil olayotgan shogirdlari bisyor. Ularning har bir yutugʻidan Nodiraning koʻngli togʻday yuksaladi. Hayotda oʻz yoʻlini topib, elda obroʻ-eʼtibor topayotgan shogirdlarini koʻrganida, ularning “ustoz” deb samimiy boqib turishlarini his etganida qalbi quvonchga toʻladi. Mehnatlari el-yurt hayotiga fayz bagʻishlayotganidan ich-ichidan faxrlanadi. Ustoz uchun taqdirning eng ulugʻ tuhfasi ham shu – el-u halqqa manfaat yetkazgan mehnatining mevasini koʻrmoqdir. Nodiraxon Otajonova ana shunday baxt sohibasi.

Robiya YOʻLDOShEVA.