45-sonli MTTda milliy va maʼnaviy qadriyatlarni ulugʻlovchi tadbirlar oʻtkazildi

Amudaryo tumanidagi 45-sonli maktabgacha taʼlim tashkilotida bolajonlarni milliy va maʼnaviy qadriyatlar bilan tanishtirish, ularni ijtimoiy va ijodiy jihatdan rivojlantirish maqsadida turli tadbirlar tashkil etilmoqda. Yaqinda ushbu taʼlim muassasasida “Navroʻz sayli” bayram tadbiri hamda “Adiblar bilan uchrashuv” nomli adabiy-maʼrifiy kecha boʻlib oʻtdi.  

Navroʻz ezgulik, yangilanish va tabiat uygʻonishi ramzi sifatida mamlakatimiz boʻylab keng nishonlanadi. Shu munosabat bilan 45-sonli maktabgacha taʼlim tashkilotida bolalar uchun bayram tadbiri tashkil etilib, unda milliy anʼanalarimiz va qadriyatlarimizning goʻzalligi namoyon etildi. Tadbirda bolajonlar milliy liboslarda sheʼr va qoʻshiqlar ijro etib, xalq oʻyinlarini namoyish qildilar. Shuningdek, Navroʻzga xos boʻlgan sumalak tayyorlash anʼanasi haqida maʼlumot berilib, uning mazmun-mohiyati tushuntirildi.  

Bolajonlarning maʼnaviy dunyosini boyitish, kitobga boʻlgan mehrini oshirish maqsadida tashkil etilgan adabiy-maʼrifiy kechada esa tarbiyalanuvchilar mashhur adib va shoirlarning ijodi bilan yaqindan tanishdilar. Ular oʻz sevimli qahramonlari obrazida sahna koʻrinishlarini namoyish etib, sheʼrxonlikda faol ishtirok etdilar. Tadbir doirasida adabiy viktorinalar va ijodiy chiqishlar ham uyushtirildi.  

Mazkur tadbirlar bolajonlarda milliy va maʼnaviy qadriyatlarga hurmat ruhini shakllantirish, ularning ijodiy qobiliyatlarini rivojlantirish hamda bilimga boʻlgan ishtiyoqini oshirishga xizmat qildi.

Yulduz Ortiqova, 45-sonli maktabgacha taʼlim tashkiloti tarbiyachisi.