21-SONLI BOLALAR MUSIQA VA SANʼAT MAKTABI OʻQUVChILARI KOʻRGAZMA TAShKIL ETDILAR

Mana, bir yildirki, mamlakatimiz yoshlari hayotiga ezguliklar baxsh etib, qalblarida ilm-irfon sari intilish, kelajakka yuksak ishonch tuygʻularini uygʻotgan 5 ta muhim tashabbus doirasida keng miqyosli ishlar amalga oshirilmoqda. Ayniqsa, yoshlarning boʻsh vaqtlarini mazmunli oʻtkazish, ularni tasviriy sanʼat, musiqa, rassomlik, adabiyot va teatr sanʼatning boshqa turlariga qiziqishlarini qoʻllab-quvvatlash, qobiliyat va iqtidorlarini namoyon etishlari uchun zarur shart-sharoitlar yaratish maqsadida tizimli ishlar yoʻlga qoʻyilmoqda.

Qipchoq shaharchasidagi 11-sonli umumtaʼlim maktabida 21-sonli bolalar musiqa va sanʼat maktabining  tasviriy sanʼat yoʻnalishi boʻyicha oʻqituvchilari Rasul Aytjonov va Xonimjon Ismoilovalar rahbarligida “Men ona yurt shaydosiman” mavzusida rasmlar koʻrgazmasi tashkil etildi. Yosh ijodkorlarni keng jamoatchilikka yaqindan tanishtirish, ularni har tomonlama qoʻllab-quvvatlash maqsadida oʻtkazilgan koʻrgazma ochilishida  ishtirok etgan maktab masʼullari va oʻqituvchilar Prezidentimiz Shavkat Mirziyoyevning taʼlim, madaniyat, ilm-fan, adabiyot, sanʼat va sport sohalarini rivojlantirish, yoshlarga oid davlat siyosatini takomillashtirishga oid amaliy ishlaridan xalqimiz mamnun boʻlayotganini taʼkidladi. Shu oʻrinda fanga doir yangiliklar, toʻgaraklar faoliyati, oʻquvchilar uchun yaratilgan sharoitlar, imkoniyatlar haqida soʻz yuritdi. Shuningdek,  toʻgarak oʻqituvchilari tasviriy sanʼat faqat koʻrish mumkin boʻlgan narsalarnigina tasvirlab qolmay, balki ijodkorlar asarlarida hodisalarning vaqtinchalik rivojini ham aks ettirishini, insonning ruhiy qiyofasini, uning oʻzgalar bilan oʻzaro munosabatlarini ham tasvirlashini aytib oʻtdi.  

Koʻrgazmada 21-sonli bolalar musiqa va sanʼat maktabining tasviriy sanʼat yoʻnalishi boʻyicha tahsil olayotgan 11 nafar oʻquvchining ijodiy ishlari namoyish etildi. 11-sonli maktab binosida tashkil etilgan ushbu koʻrgazma oʻquvchilar, yosh musavvirlar, ularning ustozlari, ota-onalari bilan gavjum boʻldi.

Oʻquvchi-yoshlar tomonidan yaratilgan Vatanimiz manzaralari, milliy anʼana va qadriyatlarimiz, bahoriy goʻzalliklar aks ettirilgan kartinalar, ijod namunalari koʻrgazmada asosiy oʻrinni egalladi. Eng sara deb topilgan va namoyishga qoʻyilgan “Men ona yurt shaydosiman”, “Mening jonajon qishlogʻim”, “Amudaryo - aziz diyor” “Oʻzbekiston – tengi yoʻq Vatan” mavzularidagi rangtasvir janridagi asarlarni ishtirokchilar maroq bilan tomosha qildilar. Oʻz tengdoshlari ijodi bilan tanishish asnosida tadbir ishtirokchilarining qalblarida rassomlik sanʼatiga, ranglar jilosida tovlanayotgan ona yurt manzaralariga nisbatan mehr-muhabbat tuygʻulari uygʻondi. Oʻz navbatida oʻquvchilarning tasviriy sanʼat, ijodiy izlanishga oid bilimlarini yanada boyitdi.

Tadbirda bir guruh oʻquvchi-yoshlar oʻzlarining kelajakdagi orzulari haqida gapirib, Prezidentimiz tomonidan ilgari surilgan 5 ta muhim tashabbusning oʻz hayotlarida tutgan oʻrni va ahamiyati haqida oʻzaro fikr almashdilar.

Mazkur koʻrgazma “ustoz – shogird” anʼanalarining bardavomligini koʻrsatdi. Shuningdek, ijodkorlarning oʻzaro tajriba almashishi, yoshlarning bilim va tafakkurini kengaytirishda muhim ahamiyat kasb etdi.

R.YOʻLDOShEVA.