ULUGʻ BOBOKALONLARIMIZ IJODI OʻQUVChILAR TALQINIDA

Maktabimizda har yili buyuk bobokalonimiz A.Navoiy tavalludi kuni munosabati bilan adabiy-musiqiy tadbir tashkil etilib, sinflararo “Navoiy asarlari bilimdonlari” bellashuvlari, gʻazalxonlik kechalari oʻtkaziladi. Navoiyxonlik kechalari Boburxonlik davralarida davom etadi.

Joriy yilning 8-fevral sanasida boshlangan adabiy-musiqiy Navoiyxonlik kechasida oʻquvchilar tomonidan tayyorlangan stsenariy asosida Navoiyning yoshligi, kamolot pallasi, “Xamsa” asarining yaratilish tarixi, Alisher Navoiy tomonidan bunyod etilgan meʼmorchilik obidalari, ilm-maʼrifat sohasiga qoʻshgan katta hissasi sahna koʻrinishlari orqali chiroyli tarzda namoyish etildi.

Ayniqsa, maktabimizning aʼlochi oʻquvchisi, Navoiy asarlarining shaydosi Guljahon Davlatboyeva talqinidagi Navoiyning “Mahbub ul-qulub” asaridagi hikmatlar, insonlarga tanbeh-u maslahatlar barchaning diqqatiga sazovor boʻldi.

Navoiy ijodiga, ahli jahonni maftun etgan gʻazal va ruboiylari hamda  qitʼalariga qiziquvchi oʻquvchi-yoshlar buyuk bobokalonimiz qalamiga mansub asarlardan parchalarni ifodali, yoddan oʻqib berdilar.

Maktabimiz oʻquvchi-yoshlari uchun har galgidek fevral oyi mumtoz adabiyotimizning yirik namoyandalari – Mir Alisher Navoiy va Zahiriddin Muhammad Bobur dahosiga ehtirom tarzidagi tadbirlar bilan fayzli oʻtadi. Bobur tavalludiga bagʻishlab maktabimizda oʻtkazilgan maʼnaviy-maʼrifiy tadbir ham oʻzining juda katta tarbiyaviy ahamiyati bilan barchaga manzur boʻldi.

Oʻquvchilar Z.M.Bobur gʻazallari asosida bahri-baytlar aytishdi. “Boburnoma” asarining badiiy qimmati haqida oʻz fikrlarini bayon etishdi.
Tadbir yakunida Qangli Madaniyat markazi sanʼatkorlari tomonidan tayyorlangan musiqiy dastur namoyish etildi.

Gavhar XUDOYoROVA,
29-sonli maktab oʻqituvchisi.