KITOB – QALBGA POKLIK BAGʻIShLOVChI NUR

Kitob – insonni komillik sari yetaklashga xizmat qiladi. U insonning maʼnan yuksalishiga va yashirin isteʼdodining ochilishiga turtki boʻladi. Kitob oʻqigan insonning dunyoqarashli keng, fikrlash qobiliyati teran va tiniq boʻladi.

Guruch kurmaksiz boʻlmaganidek, kitoblar ham bari bir xil maʼnodor,  qiziqarli emas. Ular orasida yengil-yelpi uslubda yozilgan kitoblar ham uchraydi. Shunday kitoblar borki, u kitobni oʻqiganing sari oʻqib, ham uqib boraverasan, har gal oʻqiganingda olam-olam maʼno kelib chiqadi. Muhimi, kitob tanlashda adashmaslikdir.

Kitobning odamga foydali tomonlari judayam koʻp. Kitob mutolaasi orqali inson maʼnan boyib, stressdan qutulishi mumkin. Psixologlarning  fikriga qaraganda, mutolaa stress holatidan chiqishga 68 foiz yordam beradigan birinchi oʻrindagi yordamchi ekan. Kitob bizga har qanday vaziyatda eng yaxshi doʻst va hamroh boʻladi.

Bugungi kunda yoshlarning  kitobga boʻlgan eʼtibori kuchaydi. Buni inobatga olgan holda yurtimizda xalq kutubxonalari ochildi. Qipchoq ShFYdagi xalq kutubxonasi 2018-yilning sentyabr oyidan oʻz faoliyatini boshlagan edi. Kutubxona har xil badiiy, tarixiy, kasblarga doir kitob va gazeta-jurnallar bilan boyidi. Bugungi kunda uning aʼzolari 150 nafardan koʻp.

Kutubxonalarning koʻpayishi tufayli yoshlar oʻrtasida jinoyatchiliklar, xalq orasidagi qonunbuzarliklar kamayadi. Kitob insonlarni ezgulikka chorlaydi. U  qalblarni poklaydi, qalbi pok insonlar esa doim yaxshiliklar qiladi.

Qarshigʻa ALIMBOYeVA, 

Qipchoq ShFY.