MAQSADIMIZ – VATANPARVAR YoShLARNI TARBIYaLASh

Oʻzbekiston mudofaasiga koʻmaklashuvchi “Vatanparvar” tashkilotining asosiy vazifasi Oʻzbekiston Respublikasi Qurolli Kuchlarining mudofaa qudratini mustahkamlashga koʻmaklashish, yoshlar va fuqarolarni mehnatga jalb etish, Vatanni himoya qilishga tayyorlash, yoshlar, fuqarolar oʻrtasida ona Vatanni himoya qilish haqidagi gʻoyalarni targʻib etish orqali ularni harbiy-vatanparvarlik ruhida tarbiyalash ishlarida koʻmaklashishdir

Mudofaaga koʻmaklashuvchi “Vatanparvar” tashkiloti tuman Kengashi oʻquv sport-texnika klubi tomonidan hamkor tashkilotlar bilan birgalikda 2019-yil davomida yoshlarni harbiy vatanparvarlik ruhida tarbiyalash maqsadida “Yosh chegarachi”, “Burgutlar”, “Temurbeklar” kabi harbiy sport oʻyinlari muntazam ravishda oʻtkazilib kelinmoqda. Ayniqsa,  sportning texnik va amaliy turlari boʻyicha olib borilayotgan tadbirlarda yuzlab tumanimiz yoshlari ishtirok etishmoqda. Havo miltigʻidan oʻq otish, yozgi biatlon kabi sport turlari boʻyicha oʻtkaziladigan Qoraqalpogʻiston Respublikasi birinchiligi musobaqalarida tumanimiz sportchi yoshlari faxrli oʻrinlarni egallab kelmoqdalar. Oʻtgan 2019-yilda yozgi biatlon  sport turi boʻyicha oʻtkazilgan Oʻzbekiston chempionatida Shuhrat Jumaboyev faxrli 3-oʻrinni egallab, sport ustaligiga nomzod normativini bajardi.

Bundan tashqari, 2019-yil davomida mudofaaga koʻmaklashuvchi “Vatanparvar” tashkiloti tuman Kengashi tomonidan 700 nafar yoshlar “V” va “BC” toifalaridagi haydovchilik guvohnomasiga ega boʻldilar.
“Vatanparvarlik oyligi” doirasida ham tumanimizdagi barcha oʻquv muassasalarida chaqiriqqacha yoshlarni tayyorlash va jismoniy tarbiya fani oʻqituvchilari bilan hamkorlikda “Ona Vatanimga xizmat qilaman”, “Burgutlar”, “Temurbeklar”, “Yosh chegarachi”, “Qasamyodim dilimda” kabi mavzularda madaniy-maʼrifiy tadbirlar, harbiy sport oʻyinlari tashkil qilindi. Bu tadbirlarda umumtaʼlim maktablarining 10-11-sinf oʻquvchilari faol ishtirok etishdi.

Vatanni sevish, unga sadoqat bilan xizmat qilish har bir insonning muqaddas burchi. Boʻlib oʻtgan tadbirlarda qalblarida vatanparvarlik tuygʻulari joʻsh urgan yoshlar oʻzlarining bilimdonliklarini, iqtidorlarini, jismoniy va maʼnaviy yetukliklarini namoyon etdilar.

Shuhrat KAMOLOV,
mudofaaga koʻmaklashuvchi “Vatanparvar” tashkiloti tuman Kengashi oʻquv sport-texnika klubi rahbari.