86-sonli saylov uchastkasida seminar oʻtkazildi

Mamlakatimizda tobora yaqinlashib kelayotgan saylovlarga qizgʻin tayyorgarlik ishlari olib borilmoqda. Siyosiy partiyalar tomonidan saylovoldi targʻibot tadbirlari, seminarlar tashkil qilinmoqda. Saylov komissiyalari tomonidan seminarlar, davra suhbatlari oʻtkazilib, saylov jarayonlari, yurtimizdagi saylov tizimidagi oʻzgarishlar, ushbu muhim siyosiy jarayonga tayyorgarlik koʻrish, saylov oʻtkazish tartiblari toʻgʻrisida keng tushunchalar berilmoqda. Shunday seminarlardan biri 22-noyabr kuni tumanimizdagi 82-sonli umumtaʼlim maktabi binosida joylashgan 86-sonli saylov uchastkasida boʻlib oʻtdi.

Taʼkidlanganidek, boʻlajak saylovlar mamlakatimizni rivojlantirishning beshta muhim ustuvor yoʻnalishi boʻyicha Harakatlar strategiyasida oʻz ifodasini topgan ilgʻor demokratik gʻoyalarning amaldagi yana bir yorqin ifodasi boʻladi. Jamiyatimiz hayotidan koʻppartiyaviylik, fikrlar rang-barangligi, ochiqlik va oshkoralik, bagʻrikenglik tamoyillari tobora mustahkam va keng oʻrin olmoqda. Saylov tizimini yanada takomillashitirish yuzasidan qilinayotgan ishlar ushbu tamoyillarning bosh omili boʻlib xizmat qilmoqda.

86-sonli saylov uchastkasida tashkil qilingan seminar 22-dekabr kuni Oliy Majlis Qonunchilik palatasi, Qoraqalpogʻiston Pespublikasi Joʻqorgʻi Kengesi hamda mahalliy Kengashlarga boʻlib oʻtadigan saylovlarning demokratik tamoyillar asosida yuqori saviyada oʻtishini taʼminlash, fuqarolarning siyosiy-huquqiy madaniyatini yuksaltirishga qaratildi.

Seminarda tuman hokimi oʻrinbosari Alisher Yoʻldoshev, hokim oʻrinbosari xotin-qizlar qoʻmitasi raisi Maryam Ahmedova, Oʻzbekiston Pespublikasi Oliy Majlis qonunchilik palatasiga saylov oʻtkazuvchi 4-Amudaryo okrug saylov komissiyasi raisi Ashirboy Qoʻshayev, tuman hokimligi tashkiliy-nazorat guruhi rahbari Gʻulomjon Duysenbayev, mahalla raislari, okrug va uchastka saylov komissiyalari raislari qatnashdilar.

Seminarda saylov jarayoniga tayyorgarlik holatlari, uchastka saylov komissiyasi joylashgan binolarning tayyorligi, saylov kuni saylovchilarga yaratiladigan sharoitlar, komissiyaning faoliyatlari haqida tushunchalar berildi. Qolaversa, seminar ishtirokchilari yurtimizdagi saylov qonunchiligidagi oʻzgarishlar, Saylov kodeksi haqida maʼlumotlarga ega boʻldilar.

Aytish joizki, 86-sonli saylov uchastkasida Olmazor mahallasidagi 2 ming 150 nafar saylovchilar roʻyxatga olingan boʻlib, bu yerda komissiya aʼzolari va saylovchilar uchun barcha sharoitlar yaratilgan.